Di Wɔl we De Rawnd Jɛriko

WETIN mek di wɔl we de rawnd Jɛriko de fɔdɔm? I tan lɛk se na big bɔm dɔn fɔdɔm pan am. Bɔt dɛn tɛm dɛn de, dɛn nɔ bin gɛt bɔm ɛn dɛn nɔ bin ivin gɛt gɔn. Na ɔda mirekul Jiova du so! Lɛ wi lan aw dis apin.

Jiova tɛl Jɔshwa se: ‘Yu ɛn yu fɛtman dɛn fɔ mach rawnd di tɔŋ. Una mach rawnd am fɔ siks dez; wan tɛm fɔ de. Una kɛr di oli bɔks we una de go. Sɛvin prist dɛn fɔ waka bifo di oli bɔks ɛn dɛn fɔ de blo ɔn.’

Jiova kɔntinyu fɔ tɔk se: ‘We di sɛvin de rich, una fɔ mach rawnd di tɔŋ sɛvin tɛm. Dɔn mek di prist dɛn blo di ɔn dɛn fɔ lɔng tɛm ɛn mek ɔlman ala lawd wan. Ɛn di wɔl go fɔdɔm!’

Jɔshwa ɛn di pipul dɛn du wetin Jiova se. Nɔbɔdi nɔ bin de tɔk we dɛn bin de mach. Dɛn nɔ bin de tɔk natin. Na di ɔn dɛn we dɛn de blo ɛn dɛn fut in sawnd nɔmɔ pɔsin go yɛri. Di pipul dɛn na Jɛriko go mɔs dɔn fred. Yu de si da rɛd rop we ɛng na da winda? Yu no udat in winda dande? Na Reab in winda. I dɔn du wetin di tu man dɛn we bin kam luk aw Jɛriko tan, tɛl am fɔ du. Ɔl in fambul dɛn de insay in os wit am.

We di sɛvin de rich, di fɛtman dɛn ɛn di prist dɛn mach rawnd di tɔŋ sɛvin tɛm. Dɔn, di prist dɛn blo dɛn ɔn dɛn ɛn di fetman dɛn ala lawd wan. Na de di wɔl fɔdɔm. Dɔn Jɔshwa tɛl dɛn se: ‘Una kil ɔlman na di tɔŋ ɛn una bɔn di tɔŋ. Una bɔn ɔltin insay de. Na di silva, di gold, di kɔpa ɛn di ayɛn dɛn nɔmɔ una fɔ tek. Una kam wit dɛn ɛn put dɛn na di ples usay dɛn de kip di jɛntri na Gɔd in Os.’

Jɔshwa tɛl di tu man dɛn we bin kam luk aw Jɛriko tan, se: ‘Una go na Reab in os ɛn pul in ɛn in fambul dɛn kɔmɔt na di tɔŋ.’ So natin nɔ du Reab ɛn in fambul dɛn, jɔs lɛk aw di tu man dɛn bin prɔmis am.