Sɔlɔmɔn Bil di Tɛmpul

BIFO Devid day, i sho Sɔlɔmɔn aw Jiova want mek i bil di tɛmpul. Sɔlɔmɔn bigin fɔ bil di tɛmpul insay di ia we mek fɔ we i de rul. Ɛn i tek sɛvin ɛn af ia fɔ bil am. Na bɔku bɔku man dɛn bil di tɛmpul. Dɛn yuz plɛnti mɔni fɔ bil di tɛmpul bikɔs na bɔku gold ɛn silva dɛn bil am wit.

Di tɛmpul gɛt tu impɔtant rum dɛn, jɔs lɛk di tɛnt we Mozis bin bil fɔ wɔship Jiova. Bɔt dɛn rum ya big pas di wan dɛn we bin de na di tɛnt. Sɔlɔmɔn mek dɛn put di oli bɔks insay wan pan di rum dɛn na di tɛmpul.

We dɛn dɔn fɔ bil di tɛmpul, dɛn mek wan big pati. Sɔlɔmɔn nil dɔŋ bifo di tɛmpul ɛn pre, lɛk aw yu de si na di pikchɔ. Sɔlɔmɔn pre to Jiova se: ‘Di ɛvin nɔ ivin du fɔ yu, ɛn dis tɛmpul sɛf nɔ go du fɔ yu. Bɔt duya lisin to yu pipul dɛn we dɛn tɔn na dis ples fɔ pre to yu.’

We Sɔlɔmɔn pre dɔn, faya kɔmɔt na ɛvin. Di faya bɔn ɔl di animal dɛn we dɛn bin dɔn put fɔ sakrifays. Ɛn wan brayt layt kɔmɔt na ɛvin ɛn shayn ɔlsay na di tɛmpul. Dis sho se, Jiova bin de lisin ɛn i bin gladi fɔ di tɛmpul ɛn fɔ Sɔlɔmɔn in prea. Di pipul dɛn lɛf fɔ wɔship na di tɛnt we Mozis bin bil, ɛn dɛn bigin wɔship na di tɛmpul.

Fɔ lɔng tɛm, Sɔlɔmɔn bin de rul di pipul dɛn fayn ɛn di pipul dɛn bin gladi. Bɔt Sɔlɔmɔn mared bɔku uman dɛn we nɔto Izrɛlayt, ɛn dɛn uman ya nɔ de wɔship Jiova. Yu de si di uman we de wɔship di aydɔl na di pikchɔ? Afta sɔm tɛm, Sɔlɔmɔn in wɛf dɛn mek i bigin wɔship ɔda gɔd dɛn. Yu no wetin apin we Sɔlɔmɔn bigin wɔship ɔda gɔd dɛn? I nɔ bin de trit di pipul dɛn fayn igen. I bin de du di pipul dɛn bad bad tin dɛn, ɛn dis mek di pipul dɛn at pwɛl.

Dis mek Jiova vɛks pan Sɔlɔmɔn, ɛn i tɛl am se: ‘A de kam pul di kiŋdɔm na yu an, ɛn a go gi am to ɔda pɔsin. A nɔ go du dis di tɛm we yu de, bɔt a go du am di tɛm we yu pikin de rul.’ Lɛ wi si aw dis bin apin.