Di Wɔd dɛn we Wan An Rayt

LUK wetin de apin naya. Na big big pati di pipul dɛn gɛt so. Di kiŋ na Babilɔn we nem Bɛlshaza, kɔl bɔku bigman dɛn fɔ kam na dis pati. Bɛlshaza na Nɛbukanɛza in granpikin. I mek dɛn yuz di gold kɔp dɛn, di silva kɔp dɛn ɛn di bol dɛn we Kiŋ Nɛbukanɛza pul na Jiova in tɛmpul na Jerusɛlɛm. Bɔt i nɔ tu te, dɛn si wan an de rayt na di wɔl. Dis mek ɔlman fred.

Di kiŋ ala se mek dɛn go kɔl in sɛnsman dɛn. Dɔn, i tɛl dɛn se: ‘Ɛnibɔdi we rid wetin rayt na di wɔl ɛn tɛl mi wetin i min, a go gi am plɛnti fayn fayn tin dɛn. Ɛn a go mek i bi di tɔd bigman we go rul na di kiŋdɔm.’ Bɔt ɔl di sɛnsman dɛn nɔ ebul rid wetin rayt na di wɔl, ɛn dɛn nɔ no wetin i min.

Di kiŋ in mama yɛri di nɔys, so i kam na di rum usay dɛn de it. Dɔn i tɛl di kiŋ se: ‘Duya, lɛ dis nɔ mek yu fred. Wan man de na yu kiŋdɔm we no bɔt dɛn tin ya. We yu granpa na bin kiŋ, i mek di man bi di edman fɔ ɔl in sɛnsman dɛn. Na di man in nem Daniɛl. Sɛn mek dɛn go kɔl am. I go tɛl yu wetin ɔl dɛn tin ya min.’

So wantɛm wantɛm, dɛn kam wit Daniɛl to di kiŋ. Fɔs, Daniɛl tɛl di kiŋ se i nɔ want di fayn fayn tin dɛn we di kiŋ bin dɔn se i go gi di pɔsin we no wetin di raytin min. Dɔn, Daniɛl bigin tɛl am wetin mek Jiova mek Nɛbukanɛza lɛf fɔ bi kiŋ fɔ sɔm tɛm. Daniɛl tɛl Bɛlshaza se: ‘Yu granpa bin tu prawd ɛn na dat mek Jiova bin pɔnish am.’

Daniɛl tɛl Bɛlshaza bak se: ‘Pan ɔl we yu no wetin apin to Nɛbukanɛza, yu stil prawd lɛk am. Yu dɔn mek dɛn kam wit di kɔp dɛn ɛn di bol dɛn we dɛn pul na Jiova in tɛmpul, ɛn de drink pan dɛn. Yu de rɛspɛkt dɛn lay lay gɔd dɛn we dɛn mek wit stik ɛn ston, bɔt yu nɔ de rɛspɛkt di Gɔd we mek ɔltin. Na dat mek Gɔd mek di an rayt dɛn tin ya.’

Daniɛl se: ‘Di tin dɛn we rayt na di wɔl na: MINI, MINI, TIKƐL ɛn PASIN.’

Daniɛl ɛksplen to am se: ‘MINI min se Gɔd dɔn kɔnt ɔmɔs tɛm lɛf fɔ lɛ yu rul, ɛn i no di tɛm we yu rul go dɔn. TIKƐL min se Gɔd dɔn we yu pan skel, ɛn i dɔn si se yu nɔ bɛtɛ. PASIN min se Gɔd go gi yu kiŋdɔm to di pipul dɛn we go kɔmɔt na Midya ɛn Pashya.’

We Daniɛl bin stil de tɔk, di pipul dɛn we kɔmɔt na Midya ɛn Pashya bin dɔn kam fɔ fɛt di pipul dɛn na Babilɔn. Dɛn kil di pipul dɛn na di tɔŋ ɛn dɛn kil Bɛlshaza. So di tin dɛn we bin rayt na di wɔl apin da sem nɛt de. Bɔt wetin go apin to di Izrɛlayt dɛn naw? Wi go no bɔt dat leta, bɔt fɔs lɛ we si wetin apin to Daniɛl.