Ɛnjɔy Famili Layf
Yu fil se famili dɛn go rili gladi?
Aw dat go apin?
Yu sabi ɛni famili we gɛt wanwɔd ɛn gladi at lɛk dɛn wan ya na dis pepa? Bɔku famili tide dɔn skata. Wok nɔ de, man ɛn uman dɛn de pat, pipul dɛn at pwɛl, uman dɛn gɛt pikin dɛn we nɔ gɛt papa—ɔl dis dɔn mek famili layf nɔ swit. Wan masta sabi bukman we no bɔt mared se: “Ɔlman dɔn sabi wetin go bi we pipul dɛn mared, if dɛn go las ɔ dɛn go skata.”
Way mek bɔku prɔblɛm de mit famili dɛn tide? Aw wi go ɛnjɔy famili layf?
Aw Famili Layf Bigin?
Fɔ lɛ wi ansa dɛn kwɛstyɔn ya, wi fɔ no fɔs usay mared ɛn famili layf bigin. If sɔmbɔdi de we bigin fambul biznɛs—di Wan we mek wi ɔl—ɔlman na di famili fɔ luk to am fɔ mek i tɛl dɛn wetin fɔ du; bikɔs na i no bɛtɛ bɔt famili layf ɛn aw wi go ɛnjɔy am.
Jizɔs bin tɔk bɔt aw Gɔd mek di fɔs man ɛn uman, ɛn bin tɔk wetin dɛn bin dɔn rayt insay di Baybul, i se: “Mek nɔbɔdi nɔ pat man ɛn uman we Gɔd dɔn jɔyn lɛkɛ wan pɔsin.”—Matyu 19:4-6.
So wetin Jizɔs Krays bin tɔk na tru. Na Gɔd mek man ɛn uman ɛn gi dɛn gud mared os. Na Gɔd mek mared fɔ di fɔs man ɛn uman ɛn se, di man ɛn in wɛf “go de wan ples, ɛn dɛn tu go de lɛkɛ se dɛn na wan pɔsin.” (Jɛnɛsis 2:22-24, New World Translation) Fɔ se di prɔblɛm dɛn we famili dɛn de gɛt tide, na bikɔs dɛn nɔ de du wetin de insay di Baybul?
Aw fɔ Gɛt Gud Mared-Os?
As yu no, dis wɔl de mek pipul de du tin dɛn we dɛn want fɔ dɛnsɛf nɔmɔ. Wan man we no bɔku tin bɔt mɔni biznɛs bin tɛl sɔm pipul we kɔmɔt kɔlɛj na Amɛrika se: “Gridi nɔ bad. Yu go gridi ɛn stil gladi wit yusɛf.” Want-want fɔ gɛt bɔku prɔpati nɔ go mek wi gɛt gladi at. Want-want na wan pan di big prɔblɛm dɛn we de ambɔg di mared-os, bikɔs i de mek pipul dɛn west bɔku tɛm ɛn spɛn bɔku mɔni. Apat frɔm dat, lɛ wi luk jɛs tu Baybul pasej dɛn we go ɛp wi no wetin de mek wi gɛt gladi at.
“I bɛtɛ lɛ yu de na os wit lɔv ɛn nɔ gɛt bɛtɛ tin fɔ it, pas fɔ gɛt bɔku tin fɔ it dɔn pis nɔ de.”
“I bɛtɛ lɛ yu it dray bred wit kolat pas fɔ de it am ɛn bekin [wit] dombolo.”
Dɛn pawaful, ɛn? Jɛs tink bɔt aw di wɔl bin fɔ de, if na dis ɔl famili dɛn fɔ de du! Di Baybul de sho aw ɔlman na di famili fɔ trit dɛnsɛf. Lɛ wi si wetin di Baybul tɛl ɔlman na di famili fɔ du.
Maredman: “Lɛk [yu] wɛf lɛkɛ aw [yu] lɛk [yu] yon bɔdi.”—Lɛta Fɔ Ɛfisɔs 5:28-30.
I simpul, bɔt na tru! Di Baybul tɛl maredman dɛn fɔ ‘rɛspɛkt dɛn wɛf dɛn.’ (Pita In Fɔs Lɛta 3:7) I go du dis we i de gɛt tɛm fɔ in wɛf, tek kia ɛn ol am fayn, ɔndastand ɛn sho am se i go lɛk am te go. I fɔ tek wetin in wɛf de tɔk siriɔs ɛn lisin to am. Yu nɔ fil se di famili go bɛtɛ if di man de trit in wɛf lɛk aw i go want mek dɛn trit am?—Matyu 7:12.
Mareduman: “Rɛspɛkt [yu] man.”—Lɛta Fɔ Ɛfisɔs 5:33.
Fɔ mek di famili gladi, mareduman fɔ ɛp in man so dat in man go ebul fɔ du di impɔtant tin dɛn na di os. Gɔd bin want mareduman fɔ ɛp in man. Yu nɔ fil se if mareduman rɛspɛkt ɛn sɔpɔt in man, di famili go gladi?
Maredman ɛn Mareduman: “Di man we mared nɔ fɔ gɛt ɔda uman ɛn di wɛf nɔ fɔ gɛt ɔda man.”—Di Ibru Pipul Dɛn 13:4.
We maredman ɛn mareduman nɔ liv fri layf, dɛn mared-os go bɛtɛ, bɔt if dɛn liv fri layf di mared-os go skata. (Prɔvabs 6:27-29, 32) Di Baybul se: “Yu fɔ liv api wan wit yu wɛf, ɛnjɔy di uman we yu mared wɛn una yɔŋ . . . Wetin fɔ mek yu put an pan uman we nɔto yu yon?”—Prɔvabs 5:18-20.
Mama ɛn Papa dɛn: “Gi pikin gud trenin so dat wɛn i dɔn big, i nɔ go fɔgɛt di trenin.”—Prɔvabs 22:6.
We mama ɛn papa dɛn gɛt tɛm fɔ dɛn pikin dɛn ɛn lisin to dɛn, di famili go bɛtɛ. Na in mek di Baybul tɛl mama ɛn papa dɛn fɔ tich dɛn pikin dɛn tin we rayt we dɛn sidɔm na os, we dɛn de waka, we dɛn ledɔn ɛn we dɛn grap. Pantap dat di Baybul se, mama ɛn papa dɛn fɔ kɔrɛkt dɛn pikin dɛn as dis go sho se dɛn lɛk dɛn.—Lɛta Fɔ Ɛfisɔs 6:4.
Pikin dɛn: “Una we na pikin, una fɔ de du wetin di wan dɛn we bɔn una tɛl una fɔ du; na di rayt tin dat we Kristiɛn fɔ du.”—Lɛta Fɔ Ɛfisɔs 6:1.
I nɔ izi fɔ yɛri yu mama ɛn papa wɔd insay dis wɔl we ɔlman de du wetin i want. Bɔt yu nɔ fil se i fayn fɔ mek wi du wetin di Wan we bigin fambul biznɛs tɛl wi fɔ du? Na in no di tin we wi go du we go mek ɔlman na di os gladi. So du ɔl wetin yu ebul fɔ du fɔ yɛri yu mama ɛn papa wɔd. Tray fɔ lɛf ɛnitin na dis wɔl we bad.—Prɔvabs 1:10-19.
We ɔlman na di famili du wetin di Baybul se, di famili go bɛtɛ. Nɔto naw nɔmɔ di famili go ɛnjɔy bɛtɛ layf, bɔt dɛn go gɛt chans fɔ de na di nyu wɔl we Gɔd prɔmis wi bambay. (Pita In Sɛkɛn Lɛta 3:13; Rɛvɛleshɔn 21:3, 4) So mek am abit fɔ mek yu ɛn yu famili stɔdi di Baybul togɛda! Bɔku famili na di wɔl dɔn si se di advays we de na wan buk insay Inglish, dɔn ɛp dɛn. Di buk nem The Secret of Family Happiness.
Pas nɔmɔ sɔmtin rayt nia de O, bɔt ɔl di skripchɔ dɛn kɔmɔt na di Gud Nyus Fɔ Ɔlman Baybul.