Di Wan Dɛn We Bi Jizɔs In Disaypul

PAN ɔl Gɔd in savant dɛn we dɔn liv na dis wɔl, udat na di bɛst?— Dat na tru, na Jizɔs Krays. Yu tink se wi go ebul tan lɛk am?— Wɛl, di Baybul se Jizɔs sɛt ɛgzampul we wi fɔ fala. Ɛn i want wi fɔ bi in disaypul.

Yu no wetin i min fɔ bi Jizɔs in disaypul?— I min bɔku tin. Fɔs, wi fɔ lan frɔm am. Bɔt nɔto dat nɔmɔ. Wi fɔ rili biliv wetin i se. If wi du dat, wi go du wetin i tɛl wi fɔ du.

Bɔku pipul dɛn se dɛn biliv Jizɔs. Bɔt yu tink se na dɛn ɔl na Jizɔs in rial disaypul?— Nɔ, bɔku pan dɛn nɔto Jizɔs in rial disaypul. Dɛn kin go na chɔch. Bɔt plɛnti pan dɛn nɔ de tek tɛm fɔ lan wetin Jizɔs bin tich. Na di wan dɛn nɔmɔ we de fala Jizɔs in ɛgzampul na dɛn na in disaypul.

Lɛ wi tɔk bɔt sɔm pan di wan dɛn we na bin Jizɔs in disaypul di tɛm we i bin de na dis wɔl. Wan pan di fɔs pipul dɛn we bi Jizɔs in disaypul na Filip. Filip go fɛn in padi Natanyɛl (we dɛn de kɔl bak Batalomyu), we yu de si ɔnda dis tik. We Natanyɛl kam to Jizɔs, Jizɔs se: ‘Luk man we kɔmɔt Izrɛl fɔ tru, i nɔ gɛt no bɛnbɛn.’ Natanyɛl bin sɔprayz ɛn aks se: ‘Aw yu no mi?’

Jizɔs se: ‘A bin si yu we yu bin de ɔnda da fig stik bifo Filip kɔl yu.’ Natanyɛl bin wɔnda we Jizɔs bin no usay i bin de, so Natanyɛl se: “Yu na Gɔd in Pikin! Yu na di Kiŋ na Izrɛl!”—Jɔn 1:​49.

Ɔda pipul dɛn bin dɔn bi Jizɔs in disaypul di de bifo Filip ɛn Natanyɛl bi in disaypul. Udat na dɛn pipul ya? Andru ɛn in brɔda Pita, wit Jɔn; ɛn sɔntɛm Jɔn in brɔda we na Jems. (Jɔn 1:​35-51) Leta dɛn go bak to dɛn fishin biznɛs. Dɔn wan de we Jizɔs bin de waka nia di si we de na Galili, i si Pita ɛn Andru de sɛn dɛn nɛt na di si fɔ kech fish. Jizɔs kɔl dɛn. I se: ‘Una kam bi mi disaypul.’

We Jizɔs go bifo smɔl, i si Jems ɛn Jɔn. Dɛn bin de na dɛn bot wit dɛn papa; dɛn bin de pach pach dɛn fishin nɛt dɛn. Jizɔs kɔl dɛn fɔ mek dɛnsɛf fala am. Wetin yu bin fɔ du if Jizɔs bin kɔl yu? Yu bin fɔ dɔn go wit am wantɛm wantɛm?— Dɛn man dɛn ya no udat Jizɔs bi. Dɛn no se na Gɔd sɛn am. So wantɛm wantɛm dɛn lɛf dɛn fishin biznɛs ɛn fala Jizɔs.—Matyu 4:​18-22.

We dɛn man dɛn ya kam bi Jizɔs in disaypul, yu tink se afta dat dɛn bin de du wetin rayt ɔltɛm?— Nɔ-o. Mɛmba se dɛn man dɛn ya bin de agyu bɔt udat impɔtant pas dɛn ɔl. Bɔt dɛn bin lisin to Jizɔs ɛn dɛn bin rɛdi fɔ chenj. If wi rɛdi fɔ chenj, wisɛf go bi Jizɔs in disaypul.

Jizɔs bin de kɔl ɔlkayn pipul dɛn fɔ bi in disaypul. Wan tɛm, wan yɔŋ man we bin gɛt bɔku mɔni ɛn pawa bin aks Jizɔs wetin i go du fɔ gɛt layf we go de sote go. We dis yɔŋ man bin se i dɔn de obe Gɔd in lɔ dɛn frɔm we i smɔl te i dɔn big, Jizɔs tɛl am se: ‘Kam bi mi disaypul.’ Yu no wetin apin?—

Wɛl, we di man kam fɔ no se fɔ bi Jizɔs in disaypul impɔtant pas fɔ gɛt bɔku mɔni, in at bin pwɛl bad. I nɔ bi Jizɔs in disaypul bikɔs i bin lɛk in mɔni pas aw i bin lɛk Gɔd.—Lyuk 18:​18-25.

Afta Jizɔs bin dɔn de prich fɔ lɛk wan ia siks mɔnt, i pik 12 pan in disaypul dɛn fɔ bi in apɔsul dɛn. Di apɔsul dɛn na di man dɛn we Jizɔs bin sɛn fɔ du spɛshal wok. Yu no dɛn nem dɛn?— Lɛ wi si if yu go ebul lan dɛn nem dɛn. Luk di pikchɔ dɛn na di nɛks pej, ɛn si if yu go ebul kɔl dɛn nem dɛn. Dɔn tray fɔ kɔl dɛn ɔfɛd.

Leta wan pan di 12 apɔsul dɛn kam fɔ bi bad pɔsin. Udat na dis apɔsul? Na bin Judas Iskariɔt. Afta sɔm tɛm, dɛn pik ɔda disaypul fɔ jɔyn di apɔsul dɛn. Yu no in nem?— In nem na Matayas. Leta Pɔl ɛn Banabas dɛnsɛf bi apɔsul dɛn, bɔt dɛn nɔ bin jɔyn di 12 apɔsul dɛn.—Di Apɔsul Dɛn Wok [Akt] 1:​23-26; 14:​14.

As wi bin lan na Chapta 1 insay dis buk, Jizɔs bin lɛk smɔl pikin dɛn. Wetin mek?— Na bikɔs i bin no se sɔm pikin dɛnsɛf kin bi in disaypul. Infakt, plɛnti tɛm di we aw pikin dɛn kin se sɔntin kin mek ivin big pɔsin go want fɔ lisin ɛn want fɔ lan mɔ bɔt di Gret Ticha.

Bɔku uman dɛnsɛf bin bi Jizɔs in disaypul. Sɔm bin de travul wit am we i de go na ɔda tɔŋ dɛn fɔ prich. Meri Magdalin, Joana, ɛn Suzana bin de go wit am. Sɔntɛm na dɛn bin de kuk fɔ am ɛn bruk in klos dɛn.—Lyuk 8:​1-3.

Yu want fɔ bi Jizɔs in disaypul?— Mɛmba se fɔ tɔk se wi na wan pan Jizɔs in disaypul nɔ min se wi na in disaypul. Wi fɔ biev lɛk in disaypul ɛnisay we wi de, nɔto we wi de na mitin nɔmɔ. Yu go ebul tink bɔt sɔm ples dɛn we i impɔtant fɔ biev lɛk Jizɔs in disaypul?—

Yɛs, wi fɔ du so na os. Wan ɔda ples we wi go biev lɛk Jizɔs in disaypul na wi skul. Wetin yu ɛn mi nɔ fɔ ɛva fɔgɛt na dat fɔ bi Jizɔs in tru tru disaypul, wi fɔ biev lɛk Jizɔs ol de, ɛvride, no mata usay wi de.