LƐSIN 5
Us Bɛnifit Yu Go Gɛt we Yu Go Wi Mitin Dɛn?
Ajɛntina
Salon
Bɛljɔm
Maleshya
Bɔku pipul dɛn dɔn lɛf fɔ go usay dɛn bin de wɔship Gɔd. Dɛn du dis bikɔs dɛn nɔ ebul fɔ gɛt ansa to dɛn kwɛstyɔn dɛn ɛn nɔbɔdi nɔ de de we de kɔrej dɛn. Wetin mek wi want lɛ yu go na wi mitin dɛn? Wetin yu go si we yu go de?
Yu go si pipul dɛn we kia ɛn we gɛt lɔv. Di tɛm we di apɔsul dɛn bin de, Kristian dɛn bin de na difrɛn difrɛn kɔngrigeshɔn dɛn. Dɛn bin de ol mitin dɛn fɔ wɔship Gɔd, fɔ stɔdi di Baybul, ɛn fɔ ɛnkɔrej dɛnsɛf. (Di Ibru Pipul Dɛn 10:24, 25) We di Kristian dɛn bin de kam togɛda fɔ wɔship Jiova, dɛn kin fil se dɛn de wit dɛn tru tru brɔda ɛn sista dɛn. (Sɛkɛn Lɛta Fɔ Tɛsalonayka 1:3; Jɔn In Tɔd Lɛta 14, 15) Wi de falamakata di we aw dɛn bin de ol dɛn mitin ɛn wi de ɛnjɔy am.
Yu go lan aw fɔ du di tin dɛn we de na di Baybul. Di Baybul se trade trade, man, uman, ɛn pikin dɛn bin de wɔship Gɔd togɛda. Na da sem we de wisɛf de wɔship tide. Sɔm man dɛn de we kin tich wi aw fɔ du di tin dɛn we de na di Baybul. (Ditarɔnɔmi 31:12; Nɛimaya 8:8) Ɔlman kin ebul fɔ tɔk ɛn siŋ we di tɛm rich. Dis kin gi wi chans fɔ tɔk bɔt di op we wi gɛt.—Di Ibru Pipul Dɛn 10:23.
Yu go biliv Gɔd mɔ ɛn mɔ. Di apɔsul Pɔl bin tɛl wan kɔngrigeshɔn se: “A want si una bad bad fɔ mek . . . a go ɛp una fɔ waka klos Gɔd mɔ bay aw a biliv pan Krays ɛn unasɛf go ɛp mi bay aw unasɛf biliv pan am.” (Lɛta Fɔ Rom 1:11, 12) We wi kin de na mitin ɔltɛm wit wi brɔda ɛn sista dɛn, go ɛp wi fɔ biliv Gɔd tranga wan ɛn fɔ du di tin dɛn we de na di Baybul.
Wi want lɛ yu kam na di mitin dis wik so dat yu go si ɔl dɛn tin ya fɔ yusɛf. Wi go gladi fɔ si yu. Wi mitin dɛn ɔl na fri. Wi nɔ de aks pipul dɛn fɔ gi mɔni.
Udat dɛn wi de falamakata fɔ ol mitin?
Us bɛnifit yu go gɛt we yu go wi mitin dɛn?