Wetin Mek Wi Kin Drɛs Fayn fɔ Go Wi Mitin Dɛn?

Yu go mɔs dɔn si se wi kin drɛs fayn fɔ go wi mitin dɛn. Wetin mek wi kin drɛs fayn?

I de sho se wi de rɛspɛkt Gɔd. Na tru se nɔto wetin wi de wɛr Gɔd de wach. (Fɔs Samiɛl 16:7) Bɔt we wi de go fɔ wɔship Gɔd, wi want fɔ sho se wi de rɛspɛkt in ɛn di wan dɛn we wi ɔl de wɔship. If yu gɛt fɔ go to di prɛsidɛnt na yu kɔntri, aw yu go drɛs? Yu go drɛs fayn bikɔs in na bigman na yu kɔntri. Semweso, we wi de go na mitin, di we aw wi de drɛs fɔ sho se wi de rɛspɛkt Gɔd we na “di King we bin de, we de naw ɛn we go de sote go.” We wi drɛs fayn fɔ go mitin, wi de sho se wi rɛspɛkt di ples usay wi de wɔship Gɔd.—Fɔs Lɛta To Timoti 1:17.

I de sho se wi de du wetin di Baybul se. Di Baybul se Kristian dɛn fɔ “tek tɛm pik di klos we dɛn de wɛr, ɛn dɛn fɔ drɛs gud” lɛk pɔsin we de fred Gɔd. (Fɔs Lɛta To Timoti 2:9, 10) Fɔ ‘tek tɛm pik di klos we wi de wɛr’ min se wi nɔ fɔ wɛr klos we de mek wi bɔdi de na do. Fɔ “drɛs gud” min se wi nɔ fɔ wɛr dɔti klos ɔ drɛs kialɛs wan. Dis advays nɔ min se wi ɔl fɔ drɛs di sem we. Wi ɔl gɛt difrɛn we fɔ drɛs. Di we aw wi de drɛs “go mek pipul want fɔ yɛri ɛn biliv dɛn tin we wi de lan dɛn bɔt Gɔd” ɛn “dɛn go prez Gɔd.” (Taytɔs 2:10; Pita In Fɔs Lɛta 2:12) We wi drɛs fayn fɔ go mitin, wi go mek pipul dɛn tɔk gud tin dɛn bɔt Jiova.

Ɛnibɔdi kin kam na di Kiŋdɔm Ɔl ilɛksɛf i nɔ gɛt fayn klos fɔ wɛr. Fɔ drɛs fayn nɔ min se pas wi wɛr klos we fayn tumɔs ɔ fɔ wɛr klos we dia pasmak.

• Wetin mek wi fɔ drɛs fayn fɔ wɔship Gɔd?

• Wetin di Baybul tɔk bɔt aw wi fɔ drɛs?