Aw Wi Go Rɛdi fɔ di Mitin Dɛn?

If yu na pɔsin we de stɔdi di Baybul wit Jiova Witnɛs dɛn, i go mɔs bi se bifo una bigin stɔdi, yu kin dɔn rid di say dɛn we una gɛt fɔ stɔdi. I go fayn mek yu de du di sem tin bifo yu go di mitin dɛn so dat yu go bɛnifit mɔ.

Fɛn tɛm ɛn ples fɔ stɔdi. Ustɛm mɔ yu kin ebul fɔ pe atɛnshɔn pan sɔntin? Na ali mɔnin bifo yu bigin du ɛnitin ɔ na nɛt we ɔlman dɔn slip? Ilɛksɛf yu nɔ kin ebul fɔ stɔdi fɔ lɔng tɛm, na fɔ fɛn tɛm fɔ stɔdi, ɛn tray mek natin nɔ pwɛl am. Fɛn say we kwayɛt fɔ stɔdi, ɛn mek natin nɔ ambɔg yu we yu de stɔdi. Na fɔ ɔt yu redio, tɛlivishɔn, ɔ fon. I fayn fɔ pre fɔs bifo yu bigin stɔdi. Dat go ɛp yu fɔ fɔgɛt bɔt ɔl di tin dɛn we de wɔri yu, ɛn dis go mek yu ebul pe atɛnshɔn mɔ pan di stɔdi.—Lɛta Fɔ Filipay 4:6, 7.

Mak di ansa dɛn, ɛn fɛn sɔntin we yu go want fɔ tɔk bɔt na di mitin. Tray fɔs fɔ ɔndastand wetin una gɛt fɔ stɔdi. Tink bɔt di tɔpik ɛn tray fɔ si aw di tɔpik ɛn di sɔbɛdin dɛn de tɔk bɔt di sem tin. Luk di pikchɔ dɛn ɛn fɛn di ansa fɔ di kwɛstyɔn dɛn we dɛn go aks afta di stɔdi. Dɔn rid di paregraf dɛn wan bay wan ɛn fɛn di ansa dɛn fɔ di kwɛstyɔn dɛn. Rid ɔl di skripchɔ dɛn we dɛn nɔ kot, ɛn tray fɔ si aw dɛn de tɔk bɔt wetin de na di paregraf dɛn. (Di Apɔsul Dɛn Wok [Akt] 17:11) We yu si di ansa fɔ di kwɛstyɔn, drɔ layn ɔnda am so dat yu go ebul fɔ mɛmba di ansa. We yu kam na di mitin, tray fɔ es yu an ɔp ɛn tɔk aw yu ɔndastand wetin yu bin dɔn stɔdi.

We yu de stɔdi di tɔpik dɛn we wi gɛt fɔ tɔk bɔt na di mitin dɛn, yu go lan nyu tin dɛn na di Baybul.—Matyu 13:51, 52.

• Wetin go ɛp yu fɔ rɛdi fɔ di mitin dɛn?

• Wetin yu fɔ du so dat yu go ebul fɔ ansa kwɛstyɔn dɛn na di mitin?