Aw Yu Go Ebul Kam Nia Gɔd?

1. Na ɔlman in prea Gɔd de lisin?

Gɔd want mek ɔlman na di wɔl pre to am. (Sam 65:2) Bɔt, nɔto ɔlman in prea i de lisin. Fɔ ɛgzampul, Gɔd nɔ de lisin to maredman we nɔ de trit in wɛf fayn, in prea. (Pita In Fɔs Lɛta 3:7) We di Izrɛlayt dɛn bin kɔntinyu fɔ du bad, Gɔd nɔ bin lisin to dɛn prea. So wi si se prea na sɔntin we wi nɔ fɔ ple wit. Bɔt pan ɔl dat, Gɔd de fɔgiv pipul dɛn we de du bad bad tin dɛn, if dɛn lɛf fɔ du bad.​—Rid Prɔvabs 28:9; Di Apɔsul Dɛn Wok [Akt] 3:19.

Wach di fim we gɛt di taytul: Na Ɔlman in Prea Gɔd De Lisin?

2. Aw wi fɔ pre?

Prea na wan we fɔ wɔship Gɔd. So na to Jiova nɔmɔ wi fɔ pre. (Matyu 4:10; 6:9) Wi ɔl de sin, so wi fɔ yuz Jizɔs in nem we wi de pre bikɔs na in kam day fɔ wi sin dɛn. (Jɔn 14:6) Jiova nɔ want lɛ wi kram prea dɛn ɔ tɔk di sem tin ɔltɛm we wi de pre. Ɛn i nɔ want lɛ wi pul wi prea dɛn na preabuk. I want lɛ wi prea dɛn kɔmɔt na wi at.​—Rid Matyu 6:7; Lɛta Fɔ Filipay 4:6, 7.

Jiova de ivin yɛri we wi de pre na wi at. (Fɔs Samiɛl 1:12, 13) I want lɛ wi pre to am ɔltɛm, lɛk we wi grap na mɔnin, we wi want slip na nɛt, bifo wi it, ɛn we wi gɛt prɔblɛm.​—Rid Sam 55:22; Matyu 15:36.

3. Wetin mek Kristian dɛn de ol mitin?

I nɔ izi fɔ kam nia Gɔd tide bikɔs bɔku pipul dɛn nɔ biliv am, ɛn dɛn de tɔk se wetin Gɔd dɔn prɔmis nɔ go ɛva bi. (Sɛkɛn Lɛta To Timoti 3:1, 4; Pita In Sɛkɛn Lɛta 3:3, 13) So wi fɔ de go mitin fɔ mek wi de ɛnkɔrej wisɛf.​—Di Ibru Pipul Dɛn 10:24, 25.

We wi de go nia pipul dɛn we lɛk Gɔd, dat go ɛp wi fɔ go nia Gɔd. We yu go na Jiova Witnɛs dɛn mitin dɛn, yu go ebul lan frɔm ɔda pipul dɛn fayn ɛgzampul.​—Rid Lɛta Fɔ Rom 1:11, 12.

4. Aw yu go ebul kam nia Gɔd?

Yu go ebul kam nia Gɔd we yu tink bɔt di tin dɛn we yu dɔn lan na di Baybul. Dɔn, yu fɔ tink bɔt di tin dɛn we Jiova de du, di advays we i de gi, ɛn di prɔmis dɛn we i dɔn mek. We wi pre ɛn tink bɔt dɛn tin ya, wi go no aw Gɔd lɛk wi ɛn aw i gɛt sɛns.​—Rid Jɔshwa 1:8; Sam 1:1-3.

Yu go ebul kam nia Gɔd if yu gɛt fet. Fet tan lɛk flawa. Flawa kin gro fayn if dɛn wata am ɔltɛm. So wisɛf go mek wi fet gro if wi kɔntinyu fɔ tink bɔt di tin dɛn we mek wi biliv Gɔd.​—Rid Matyu 4:4; Di Ibru Pipul Dɛn 11:1, 6.

5. Us bɛnifit yu go gɛt we yu kam nia Gɔd?

Jiova kia fɔ di wan dɛn we lɛk am. I go kɔba dɛn lɛ natin nɔ mek dɛn lɛf fɔ biliv am. Ɛn i nɔ go gri mek ɛnitin ambɔg dɛn op fɔ gɛt layf we go de sote go. (Sam 91:1, 2, 7-10) I nɔ want lɛ wi du ɛnitin we go mek wi nɔ gɛt wɛlbɔdi ɛn gladi at. Jiova de tich wi aw fɔ ɛnjɔy wi layf.​—Rid Sam 73:27, 28; Jems 4:4, 8.