Ribɛka Bin Want fɔ Mek Jiova Gladi

Ribɛka na bin uman we lɛk Jiova. In man in nem na Ayzak. Insɛf bin lɛk Jiova. Aw Ribɛka ɛn Ayzak mitɔp? Aw Ribɛka bin sho se i want fɔ mek Jiova gladi? Bifo wi tɔk bɔt dat, lɛ wi tɔk smɔl bɔt Ribɛka in man we na Ayzak.

Ayzak in mama ɛn papa na Ebraam ɛn Sera. Dɛn bin de na wan tɔŋ we dɛn kɔl Kenan. Di pipul dɛn we bin de na Kenan nɔ bin de wɔship Jiova. Bɔt Ebraam bin want fɔ mek Ayzak mared uman we de wɔship Jiova. So i sɛn in savant fɔ go fɛn wɛf fɔ Ayzak na wan ples we dɛn kɔl Eran, usay in fambul dɛn de. Sɔntɛm, di savant we i bin sɛn na Ɛlieza.

Ɛlieza bin go wit ɔda savant dɛn we de wok fɔ Ebraam. Di say we dɛn bin de go bin rili fa. Dɛn go wit tɛn kamɛl dɛn we bin tot it ɛn gift dɛn. Aw Ɛlieza go no us uman fɔ pik fɔ Ayzak? We Ɛlieza ɛn di ɔda savant dɛn rich na Eran, dɛn tinap nia wan watawɛl bikɔs Ɛlieza bin no se i nɔ go tu te pipul dɛn go mɔs kam gɛt wata. So Ɛlieza bin pre to Jiova ɛn tɛl am se: ‘If a aks wan yɔŋ uman fɔ gi mi wata ɛn i gi mi ɛn mi kamɛl dɛn wata, a go no se na dis uman yu dɔn pik.’

Afta sɔm tɛm, Ribɛka kam na di watawɛl. Di Baybul se Ribɛka bin fayn pasmak. Ɛlieza bin tɛl Ribɛka fɔ gi am wata. Ribɛka tɛl am se: ‘Oke, a go gɛt wata fɔ yu ɛn yu kamɛl dɛn.’ Jɔs tink bɔt dat! We kamɛl dɛn dɔn tɔsti, dɛn kin drink bɔku bɔku wata. So Ribɛka bin gɛt fɔ go na di watawɛl bɔku bɔku tɛm. Yu de si am na di pikchɔ we i de wok tranga wan?— Ɛlieza bin sɔprayz aw Jiova ansa in prea.

Ɛlieza bin gi Ribɛka bɔku fayn fayn tin dɛn. Ribɛka bin tɛl Ɛlieza ɛn di ɔda savant dɛn fɔ go na in papa in os. We dɛn rich de, Ɛlieza ɛksplen wetin mek Ebraam sɛn am ɛn aw Jiova dɔn ansa in prea. Ribɛka in famili bin gladi fɔ mek i go mared to Ayzak.

Bɔt yu tink se Ribɛka bin want fɔ mared to Ayzak?— Ribɛka bin no se na Jiova sɛn Ɛlieza to dɛn. So we Ribɛka in pipul dɛn aks am if i want fɔ go na Kenan fɔ go mared to Ayzak, i bin se: ‘Yɛs, a want fɔ go.’ Wantɛm wantɛm, i go wit Ɛlieza. We dɛn rich na Kenan, in ɛn Ayzak mared.

Bikɔs Ribɛka bin du wetin Jiova want, Jiova bin blɛs am. Afta lɔng lɔng tɛm, na frɔm Ribɛka in famili dɛn bɔn Jizɔs. If yu tan lɛk Ribɛka ɛn mek Jiova gladi, Jiova go blɛs yu.