Devid Nɔ Bin De Fred

Wetin yu kin du we yu de fred?— Sɔntɛm yu kin rɔn go to yu mama ɛn papa. Bɔt ɔda pɔsin de we go ebul ɛp yu. I gɛt pawa pas ɔlman. Yu no udat na dis pɔsin?— Na Jiova Gɔd. Lɛ wi tɔk bɔt wan yɔŋ man na di Baybul we nem Devid. I bin no se Jiova go ɛp am ɔltɛm, so i nɔ bin de fred.

Frɔm di tɛm we Devid bin smɔl, in mama ɛn papa bin de tich am fɔ lɛk Jiova. Dis bin mek Devid nɔ bin de fred ivin we sɔm tin dɛn bin de apin to am we bin fɔ mek i fred. I bin no se Jiova na in Padi ɛn I go ɛp am. Wan tɛm, we Devid bin de kia fɔ sɔm ship dɛn, wan big layɔn bin kam kech wan pan di ship dɛn. Yu no wetin Devid bin du? I bin rɔnata di layɔn ɛn kil am wit in ɛmti an! Wan ɔda tɛm bak, we wan animal we dɛn kɔl bia bin kam fɔ kech in ship dɛn, i bin kil am! Udat yu tink se bin de ɛp Devid?— Na Jiova bin de ɛp am.

Wan ɔda tɛm bin de we Devid bin sho se i nɔ de fred. Na di tɛm we di Izrɛlayt dɛn bin de fɛt sɔm pipul dɛn we dɛn kɔl di Filistin dɛn. Wan pan di Filistin sojaman dɛn bin tɔl pasmak, na bin jayant! I nem na Golaya. Dis jayant bin de provok Jiova ɛn di Izrɛlayt dɛn. Golaya bin chalenj di Izrɛlayt sojaman dɛn fɔ kam fɛt am. Bɔt ɔl di Izrɛlayt sojaman dɛn bin de fred fɔ fɛt am. We Devid yɛri bɔt dat, i bin tɛl Golaya se: ‘A go fɛt yu! Jiova go ɛp mi, ɛn a go ebul yu!’ Yu tink se Devid bin gɛt maynd?— Yɛs, i bin gɛt maynd pasmak. Yu want fɔ no wetin bin apin afta dat?

Devid bin tek fayv ston dɛn ɛn wan tin we dɛn kin yuz fɔ sɛn ston, fɔ go fɛt dis jayant. We Golaya si se Devid na smɔl bɔbɔ, i bigin laf Devid. Bɔt Devid bin tɛl am se: ‘Yu de kam fɛt mi wit sɔd, bɔt mi, a abop pan Jiova.’ Dɔn i put wan ston pan di tin we dɛn kin yuz fɔ sɛn ston, dɔn i bigin rɔn go to Golaya ɛn sɛn di ston pan am. Di ston go insay Golaya in ed! Na de i fɔdɔm na grɔn ɛn day! Di Filistin dɛn so fred dat dɛn ɔl rɔnawe. Aw smɔl bɔbɔ lɛk Devid bin ebul dis jayant?— Na bikɔs Jiova bin ɛp am ɛn Jiova bin gɛt pawa pas dis jayant fa fawe!

Us lɛsin yu lan frɔm Devid in stori?— Yu dɔn lan se Jiova gɛt pawa pas ɔlman. Ɛn in na yu Padi. So ɛnitɛm we yu fred, mɛmba se Jiova go ɛp yu fɔ gɛt maynd!