PAT FAYV
Kam Bak to di “Pɔsin We De Mɛn Una ɛn We De Gyad Una Mek Natin Bad Nɔ Mit Una”
Yu tink se ɛni wan pan dɛn prɔblɛm dɛn ya we wi dɔn tɔk bɔt insay dis buk de afɛkt yu? If na so i bi, dɛn nɔto yu wan. Bɔku pan Gɔd in fetful savant dɛn lɛk di wan dɛn we bin de insay di tɛm we dɛn bin de rayt di Baybul ɛn di wan dɛn we de insay wi yon tɛm, dɔn gɛt dɛn sem kayn prɔblɛm dɛn ya. Jɔs lɛk aw Jiova bin ɛp dɛn fɔ bia wit dɛn prɔblɛm dɛn ya, na so i go ɛp yusɛf fɔ bia.
Jiova go ɛp yu as yu kam bak to am
NA FƆ biliv se Jiova go ɛp yu as yu kam bak to am. I go ɛp yu nɔ fɔ wɔri, nɔ fɔ kɔntinyu fɔ vɛks we pɔsin du yu bad, ɛn fɔ gɛt kolat ɛn pis bikɔs yu gɛt klin kɔnshɛns. Dat go mek yu want fɔ sav Jiova bak wit yu kɔmpin Kristian dɛn. Wetin apin to yu fiba lɛk wetin bin apin to fɔstɛm Kristian dɛn, so na dat mek di apɔsul Pita bin rayt dɛn se: “Una bin tan lɛkɛ ship we dɔn lɛf fɔ fala di man we de mɛn dɛn, so dɛn nɔ sabi rod igen, bɔt naw Gɔd dɔn briŋ una kam bak to di pɔsin we de mɛn una ɛn we de gyad una mek natin bad nɔ mit una.”—Pita In Fɔs Lɛta 2:25.
Fɔ kam bak to Jiova na di bɛst tin we yu go du. Wetin mek? Yu go mek Jiova in at gladi. (Prɔvabs 27:11) Jiova de fil, so di tin dɛn we wi de du kin afɛkt am. Bɔt Jiova nɔ de fos wi fɔ lɛk am ɛn fɔ sav am. (Ditarɔnɔmi 30:19, 20) Wan masta sabi bukman we de stɔdi bɔt di Baybul bin tɔk se: “Nɔbɔdi nɔ go opin yu at fɔ yu. Na yusɛf fɔ opin am.” We wi rili lɛk Jiova, dat go ɛp wi fɔ opin wi at to am. We wi du dis, wi go gi am fayn gift; dat na fɔ kɔntinyu fɔ du wetin Jiova want. Dat de mek Jiova gladi. Fɔ tru, natin nɔ de we wi go kɔmpia wit di gladi at we wi go gɛt if wi wɔship Jiova di rayt we.—Di Apɔsul Dɛn Wok [Akt] 20:35; Rɛvɛleshɔn 4:11.
We yu bigin fɔ wɔship Jiova di rayt we, yu go satisfay as yu de lan bɔt am. (Matyu 5:3) Aw dat go bi? Pipul dɛn na di wɔl kin wɔnda, ‘Wetin mek wi de na dis wɔl?’ Dɛn rili want fɔ no wetin mek Gɔd mek wi. Mɔtalman dɛn want fɔ no bikɔs na so Jiova mek dɛn. I mek wi fɔ gɛt bɛtɛ layf bay we wi sav am. Wi go gɛt gladi at we wi de wɔship Jiova bikɔs wi lɛk am.—Sam 63:1-5.
Duya, na fɔ no se Jiova want yu fɔ kam bak to am. Wetin fɔ mek yu biliv dat? Tink bɔt dis: Di brɔda dɛn pre gud wan we dɛn bin de rayt dis buk. Sɔntɛm, na wan ɛlda ɔ yu kɔmpin Kristian na in sho yu dis buk. Dis bin mek yu rid am ɛn du wetin i se. Ɔl dis de pruv se Jiova nɔ fɔgɛt yu. Bifo dat, smɔl smɔl i want mek yu kam bak to am.—Jɔn 6:44.
Wi go gɛt kolat bay we wi no se Jiova nɔ de fɔgɛt in savant dɛn we dɔn lɛf fɔ sav am. Na dis wan sista we nem Dona bin gladi fɔ no. I bin tɔk se: “Smɔl smɔl a bin dɔn lɛf di trut, bɔt bɔku tɛm a kin de tink bɔt wetin de na Sam 139:23, 24 we se: ‘PAPA GƆD, luk mi bɛtɛ bɛtɛ wan mek yu no wetin de na mi at; tɛst mi, mek yu no wetin a de tink si if a de tink bɔt ɛni bad tin, ɛn briŋ mi kam na di rod we go mek a gɛt layf we go de sote go.’ A bin no se a nɔ fɔ miks pan ɔl di tin dɛn we pipul dɛn de du na di wɔl, ɛn a no se na Jiova in ɔganayzeshɔn a bin nid fɔ de. A bigin fɔ si se Jiova nɔ ɛva lɛf mi; a bin jɔs nid fɔ kam bak to am. Ɛn a rili gladi we a du dat!”
“A bigin fɔ si se Jiova nɔ ɛva lɛf mi; a bin jɔs nid fɔ kam bak to am”
Wi rili de pre mek yusɛf gɛt di ‘gladi at we Jiova de gi.’ (Nɛimaya 8:10) Yu nɔ go ɛva rigrɛt we yu kam bak to Jiova.