Jekɔp Gɛt di Blɛsin

Ayzak ol 40 ia we i mared Ribɛka. I bin rili lɛk am. As tɛm de go, dɛn bɔn tu bɔypikin dɛn; dɛn na bin twin.

Di big bɔypikin bin nem Isɔ, ɛn di smɔl wan nem Jekɔp. Isɔ bin lɛk fɔ kɔmɔt, ɛn i bin sabi ɔntin. Bɔt Jekɔp bin lɛk fɔ sidɔm na os.

Trade trade, na di big bɔypikin, dɛn bin de gi bɔku land ɛn mɔni we in papa day. Dɛn bin de kɔl dis, blɛsin we pikin de gɛt frɔm in papa. Insay Ayzak in famili, di blɛsin min bak se di pɔsin go de pat pan di prɔmis dɛn we Jiova bin dɔn mek to Ebraam. Isɔ nɔ bin bisin bɔt dɛn prɔmis dɛn de, bɔt Jekɔp bin no se dɛn rili impɔtant.

Wan de, we Isɔ dɔn kɔmɔt ɔntin ol de, i kam na os taya taya wan. I smɛl di fayn it we Jekɔp bin de kuk, ɛn i se: ‘A rili angri! Gi mi sɔm pan di rɛd styu!’ Jekɔp se: ‘A go gi yu, bɔt fɔs prɔmis mi se yu go gi mi di rayt we yu gɛt as fɔs bɔypikin.’ Isɔ se: ‘A nɔ kia bɔt di rayt we a gɛt as fɔs bɔypikin! Yu kin tek am. Na it nɔmɔ mi want fɔ it.’ Yu tink se na di rayt tin Isɔ bin du? Nɔ-o, nɔto di rayt tin. Isɔ bin giwe sɔntin we rili valyu, jɔs fɔ wan bol styu.

We Ayzak bin dɔn ol, dat na bin di tɛm fɔ blɛs in big bɔypikin. Bɔt Ribɛka bin ɛp di smɔl bɔypikin we na Jekɔp fɔ gɛt di blɛsin. We Isɔ kam fɔ no dis, i rili vɛks, ɛn i plan fɔ kil in twin brɔda. Ayzak ɛn Ribɛka bin want fɔ protɛkt Jekɔp, so dɛn tɛl am se: ‘Go de wit yu mama in brɔda, Leban, te yu brɔda in at kol.’ Jekɔp lisin to di advays we in mama ɛn papa gi am, ɛn i rɔn fɔ in layf.