Mozis Bin Disayd fɔ Wɔship Jiova

Na Ijipt, dɛn bin sabi Jekɔp in famili as di Izrɛlayt dɛn. Afta Jekɔp ɛn Josɛf bin day, wan nyu Fɛro bin bigin fɔ rul. I bin de fred se di Izrɛlayt dɛn dɔn bigin fɔ pawaful pas di Ijipshian dɛn. So dis bin mek Fɛro mek di Izrɛlayt dɛn bi slev dɛn. I bin fos dɛn fɔ mek blɔk dɛn ɛn fɔ wok tranga wan na di fil dɛn. Bɔt di mɔ we di Ijipshian dɛn bin de fos dɛn fɔ wok tranga wan, na di mɔ di Izrɛlayt dɛn bin de bɔku. Bikɔs Fɛro nɔ bin lɛk dat, i bin pas lɔ fɔ mek dɛn kil ɔl di bɔypikin dɛn we di Izrɛlayt dɛn bin de bɔn. Yu ebul tink bɔt aw di Izrɛlayt dɛn go dɔn fred?

Wan Izrɛlayt uman we nem Jokabɛd bin gɛt wan fayn yɔŋbebi we na bɔypikin. Fɔ protɛkt di pikin, i bin put am insay wan baskɛt ɛn ayd am na di gras dɛn na Riva Nayl. Di yɔŋbebi in sista we nem Miriam bin de kɔna say de wach fɔ si wetin go apin.

Fɛro in galpikin bin kam was na di riva, ɛn i bin si di baskɛt. Insay di baskɛt, i bin si wan yɔŋbebi de kray ɛn i bin fil sɔri fɔ am. Miriam bin aks am se: ‘Mek a go fɛn wan uman we go mɛn di pikin fɔ yu?’ We Fɛro in galpikin se yɛs, Miriam go kam wit dɛn mama, Jokabɛd. Fɛro in galpikin bin tɛl am se: ‘Tek dis yɔŋbebi, mɛn am fɔ mi, a go pe yu.’

We di pikin big, Jokabɛd go wit am to Fɛro in galpikin we gi am nem Mozis, ɛn mɛn am lɛk in yon bɔypikin. I mɛn Mozis as prins ɛn i bin ebul fɔ gɛt ɛnitin we i want. Bɔt Mozis nɔ bin ɛva fɔgɛt Jiova. I no se in nɔto Ijipshian bɔt in na Izrɛlayt. Ɛn i bin disayd fɔ sav Jiova.

We Mozis bin ol 40 ia, i bin disayd fɔ ɛp in pipul dɛn. We Mozis bin si wan Ijipshian man de bit wan Izrɛlayt slev, i nak di Ijipshian man wit ɔl in trɛnk ɛn dat bin mek di man day. Mozis bin ayd di bɔdi na di sansan. We Fɛro bin kam fɔ no wetin apin, i bin tray fɔ kil Mozis. Bɔt Mozis bin rɔnawe go na wan land we nem Midian. Jiova bin de kia fɔ am we i bin de de.