Dɛn Nɔ Bin Du Wetin Dɛn Prɔmis

Jiova tɛl Mozis se: ‘Kam mit mi ɔp di mawntin. A go rayt mi lɔ dɛn pan tu flat ston dɛn ɛn gi dɛn to yu.’ Mozis go ɔp di mawntin ɛn de de fɔ 40 dez ɛn 40 nɛt. We i bin de de, Jiova rayt di Tɛn Kɔmandmɛnt pan tu flat ston dɛn ɛn gi am to Mozis.

Afta smɔl tɛm pas, di Izrɛlayt dɛn bin tink se Mozis dɔn lɛf dɛn. Dɛn tɛl Erɔn se: ‘Wi want pɔsin fɔ lid wi. Mek wan gɔd fɔ wi!’ Erɔn se: ‘Una gi mi di gold dɛn we una gɛt.’ I mɛlt di gold ɛn mek wan kaw pikin. Di pipul dɛn se: ‘Na dis kaw pikin na wi gɔd we pul wi kɔmɔt na Ijipt.’ Dɛn bigin fɔ wɔship di kaw pikin we dɛn mek wit gold ɛn dɛn mek pati. Na bad tin dɛn bin du? Yɛs, bikɔs di pipul dɛn bin dɔn prɔmis se na Jiova nɔmɔ dɛn go wɔship. Bɔt dɛn nɔ bin du wetin dɛn dɔn prɔmis.

Jiova bin si wetin dɛn bin de du, ɛn i tɛl Mozis se: ‘Go bak to di pipul dɛn. Dɛn dɔn lɛf fɔ obe mi, ɛn dɛn de wɔship lay lay gɔd.’ Mozis kam dɔŋ di mawntin wit di tu flat ston dɛn.

As Mozis bin de kam nia di kamp, i yɛri di pipul dɛn de siŋ. Dɔn i si dɛn de dans ɛn butu bifo di kaw pikin. Mozis bin rili vɛks. I trowe di tu flat ston dɛn na grɔn ɛn dɛn brok. Wantɛm wantɛm, i pwɛl di lay lay gɔd we dɛn mek. Dɔn i aks Erɔn se: ‘Uskayn tin di pipul dɛn du yu we mek yu du dis kayn bad tin?’ Erɔn tɔk se: ‘Nɔ vɛks. Yu sabi aw dɛn pipul dɛn ya de. Dɛn bin want gɔd, so a put dɛn gold dɛn na faya ɛn dis kaw pikin kɔmɔt!’ Erɔn nɔ bin fɔ dɔn du dat. Mozis go bak ɔp di mawntin ɛn beg Jiova fɔ mek i fɔgiv di pipul dɛn.

Jiova bin fɔgiv di wan dɛn we bin rɛdi fɔ obe am. Yu ebul fɔ si wetin mek i bin rili impɔtant fɔ lɛ di Izrɛlayt dɛn fala wetin Mozis bin de tɛl dɛn?