Dɛn Tɔn Dɛn Bak pan Jiova

Afta sɔm tɛm, we di Izrɛlayt dɛn bin de na di wildanɛs, Kora, Detan, Abayram, ɛn 250 ɔda pipul dɛn bin tɔn dɛn bak pan Mozis. Dɛn bin tɛl am se: ‘Wi dɔn taya wit yu! Wetin mek na yu fɔ bi wi lida ɛn Erɔn bi wi ay prist? Jiova de wit wi ɔl nɔto wit yu ɛn Erɔn nɔmɔ.’ Jiova nɔ bin gladi fɔ dat. I si am se na in dɛn dɔn tɔn dɛn bak pan!

Mozis bin tɛl Kora ɛn di wan dɛn we de sɔpɔt am se: ‘Una kam na di tabanakul tumara, ɛn una tek tin dɛn fɔ ol faya ɛn put insɛns pan dɛn. Jiova go sho udat i dɔn pik.’

Di nɛks de, Kora ɛn di 250 man dɛn bin go mit Mozis na di tabanakul. Jiova bin tɛl Mozis ɛn Erɔn se: ‘Una kɔmɔt nia Kora ɛn in man dɛn.’

Pan ɔl we Kora bin go to Mozis na di tabanakul, Detan, Abayram, ɛn dɛn famili dɛn nɔ bin gri fɔ go. Jiova bin tɛl di Izrɛlayt dɛn fɔ kɔmɔt nia Kora, Detan, ɛn Abayram dɛn tɛnt dɛn. Wantɛm wantɛm, di Izrɛlayt dɛn kɔmɔt nia dɛn. Detan, Abayram, ɛn dɛn famili dɛn bin tinap na do nia dɛn tɛnt dɛn. Wantɛm wantɛm, di grɔn opin ɛn swɛla dɛn ɔl! Na di tabanakul, faya kɔmɔt ɔp ɛn bɔn Kora wit in 250 man dɛn.

Dɔn Jiova tɛl Mozis se: ‘Mek ɔl di lida dɛn na ich trayb na Izrɛl kam wit in staf ɛn rayt in nem pan am. Bɔt rayt Erɔn in nem pan di staf fɔ Livay in trayb. Dɔn put di staf dɛn na di tabanakul. A go mek flawa gro pan di pɔsin we a pik, in staf.’

Di nɛks de, Mozis kam wit ɔl di staf dɛn ɛn sho di lida dɛn. Flawa bin dɔn gro pan Erɔn in staf, ɛn i bin gɛt rɛp frut. Na dis we Jiova bin sho se i dɔn pik Erɔn fɔ bi ay prist.