Wan Nyu Lida ɛn Tu Uman dɛn we Gɛt Maynd

Afta we Jɔshwa bin dɔn lid Jiova in pipul dɛn fɔ lɔng tɛm, i bin day we i ol 110 ia. We i bin de alayv, di Izrɛlayt dɛn bin de wɔship Jiova. Bɔt afta we Jɔshwa day, dɛn bigin fɔ wɔship aydɔl dɛn, jɔs lɛk aw di Kenanayt dɛn bin de du. Bikɔs di Izrɛlayt dɛn nɔ bin kɔntinyu fɔ fala Jiova, dat bin mek i alaw wan Kenanayt kiŋ we nem Jabin fɔ mek tin tranga fɔ dɛn. Di pipul dɛn beg Jiova fɔ ɛp dɛn. So Jiova gi dɛn wan nyu lida we nem Berak. I gɛt fɔ ɛp di pipul dɛn fɔ kam bak to Jiova.

Dɛbora we na bin uman prɔfɛt bin sɛn kɔl Berak. I bin gɛt wan mɛsej fɔ am we kɔmɔt frɔm Jiova. I bin tɛl am se: ‘Tek 10,000 man dɛn ɛn go mit Jabin in sojaman dɛn na di watasay we de na Kishɔn. Na de yu go win Sisera we na di lida fɔ Jabin in sojaman dɛn.’ Berak tɛl Dɛbora se: ‘A go go bɔt na mi ɛn yu fɔ go.’ Na de Dɛbora se: ‘A go go wit yu. Bɔt no se nɔto yu go kil Sisera. Jiova dɔn tɔk se na uman go kil am.’

Dɛbora bin go wit Berak ɛn in sojaman dɛn ɔp Mawnt Tebɔ fɔ go rɛdi fɔ di fɛt. As Sisera yɛri bɔt dis so, i gɛda in wɔ chariɔt dɛn ɛn sojaman dɛn na wan watasay we de dɔŋ di mawntin. Dɛbora tɛl Berak se: ‘Tide na di de we Jiova go mek yu win.’ Berak ɛn in 10,000 sojaman dɛn bin go dɔŋ di mawntin fɔ go mit Sisera in pawaful sojaman dɛn.

Jiova mek di wata we de na Kishɔn bɔku. Sisera in wɔ chariɔt dɛn bin fasin insay di pɔtɔpɔtɔ. Sisera lɛf in chariɔt ɛn bigin fɔ rɔn. Berak ɛn in sojaman dɛn win Sisera in sojaman dɛn, bɔt Sisera bin ɛskep! I rɔnawe go ayd na wan uman we nem Jeɛl in tɛnt. Jeɛl bin gi am milk fɔ drink ɛn kɔba am wit blankit. Dis bin mek dis fɛtman we dɔn taya bigin fɔ slip dip dip wan. So Jeɛl waka saful ɛn tek wan shap ayɛn we dɛn kin yuz fɔ fiks tɛnt na grɔn ɛn nak am insay dis bad man in ed. I day.

Berak kam luk fɔ Sisera. Jeɛl kɔmɔt na do ɛn se: ‘Kam insay. A go sho yu di man we yu de luk fɔ.’ Berak go insay ɛn si Sisera ledɔm in day wan. Berak ɛn Dɛbora prez Jiova wit wan siŋ, bikɔs i bin mek dɛn win dɛn ɛnimi dɛn. Afta ɔl dis, di Izrɛlayt dɛn bin gɛt pis fɔ 40 ia.