Rut ɛn Naomi

Wan tɛm we wan bad bad angri bin de na Izrɛl, wan Izrɛlayt uman we nem Naomi bin go na Moab wit in man ɛn in tu bɔypikin dɛn. Afta sɔm tɛm, Naomi in man day. In bɔypikin dɛn mared Rut ɛn Ɔpa, ɛn dɛn ɔl tu na bin Moabayt uman dɛn. I sɔri fɔ no se afta sɔm tɛm, Naomi in bɔypikin dɛn bak day.

We Naomi yɛri se di bad bad angri na Izrɛl dɔn dɔn, i disayd fɔ go bak. Rut ɛn Ɔpa bin go wit am, bɔt we dɛn de na rod de go, Naomi tɛl dɛn se: ‘Una na bin gud wɛf dɛn to mi bɔypikin dɛn ɛn gud dɔtɛnlɔ dɛn to mi. A want mek una ɔl tu mared bak. Una go bak na Moab.’ Di uman dɛn tɔk se: ‘Wi lɛk yu! Wi nɔ want fɔ lɛf yu.’ Naomi bin kɔntinyu fɔ tɛl dɛn fɔ go. So Ɔpa go bak, bɔt Rut lɛf wit Naomi. Naomi tɛl am se: ‘Ɔpa de go bak to in pipul dɛn ɛn in gɔd dɛn. Go wit am, ɛn go usay yu mama de.’ Bɔt Rut tɛl am se: ‘A nɔ go lɛf yu. Yu pipul dɛn go bi mi pipul dɛn, ɛn yu Gɔd go bi mi Gɔd.’ Aw yu tink se Naomi bin fil we Rut se dis?

Rut ɛn Naomi rich na Izrɛl di tɛm we dɛn jɔs bigin avɛst bali. Wan de, Rut go fɔ go gɛda di bali we lɛf afta we dɛn dɔn avɛst na wan man we nem Boaz in fam, ɛn in na bin Reab in bɔypikin. I bin dɔn yɛri se Rut na Moabayt uman we dɔn de wit Naomi fɔ lɔng tɛm. I tɛl in wokman dɛn fɔ lɛf sɔm bali so dat Rut go ebul fɔ gɛda am.

Da ivintɛm de, Naomi aks Rut se: ‘Na udat in fam yu wok tide?’ Rut ansa se: ‘Na wan man we nem Boaz in fam.’ Naomi tɛl am se: ‘Boaz na wan pan mi man in fambul dɛn. Kɔntinyu fɔ de wok na in fam wit dɛn ɔda yɔŋ uman dɛn. Yu sef we yu de de.’

Rut kɔntinyu fɔ wok na Boaz in fam te di tɛm fɔ avɛst dɔn. Boaz bin notis se Rut de wok tranga wan ɛn in na gud uman. Trade trade, if man day ɛn i nɔ bɔn bɔypikin, wan pan in fambul dɛn go mared di uman we i day lɛf. So Boaz mared Rut. Dɛn bɔn bɔypikin we nem Obɛd, ɛn i leta bi Kiŋ Devid in granpa. Naomi in padi dɛn bin rili gladi. Dɛn tɔk se: ‘Fɔs, Jiova bin gi yu Rut we na gud pɔsin to yu, ɛn naw yu dɔn gɛt granpikin. Mek Jiova gɛt di prez.’