Jonɛtan Bin Gɛt Maynd ɛn Nɔ De Kɔmɔt Biɛn Pɔsin

Kiŋ Sɔl in fɔs bɔypikin we nem Jonɛtan na bin fɛtman we rili gɛt maynd. Devid bin tɔk se Jonɛtan fast pas igul, ɛn i strɔng pas layɔn. Wan de, Jonɛtan bin si 20 Filistin sojaman dɛn ɔp wan il. I tɛl di man we de ol in tin dɛn we i de yuz fɔ fɛt se: ‘Wi go atak dɛn if Jiova sho wi sayn. If di Filistin dɛn tɛl wi fɔ go ɔp di il, wi go no se na di rayt tɛm dat fɔ atak dɛn.’ Di Filistin dɛn ala lawd wan se: ‘Una kam ɔp fɔ fɛt wi!’ So di tu man dɛn go ɔp di il ɛn win di sojaman dɛn.

Bikɔs Jonɛtan na bin Sɔl in fɔs bɔypikin, na in fɔ bin dɔn bi di nɛks kiŋ afta in papa. Jonɛtan bin no se na Devid Jiova bin dɔn pik fɔ bi di nɛks kiŋ na Izrɛl; bɔt i nɔ bin jɛlɔs am fɔ dat. Jonɛtan ɛn Devid na bin tayt padi dɛn. Dɛn bin prɔmis se dɛn go protɛkt ɛn kia fɔ dɛnsɛf. Jonɛtan bin gi Devid in klos, sɔd, bo, ɛn bɛlt fɔ sho se dɛn na padi dɛn.

We Devid bin de rɔnawe pan Sɔl, Jonɛtan bin go to am ɛn tɛl am se: ‘Tinap tranga wan ɛn gɛt maynd. Jiova dɔn pik yu fɔ bi kiŋ. Mi papa sɛf no dat.’ Yu go lɛk fɔ gɛt gud padi we tan lɛk Jonɛtan?

Jonɛtan bin put in layf pan denja bɔku tɛm fɔ ɛp in padi. I bin no se Kiŋ Sɔl bin want fɔ kil Devid, so i tɛl in papa se: ‘Yu go gɛt sin if yu kil Devid, bikɔs i nɔ du ɛnitin we bad.’ Sɔl bin rili vɛks pan Jonɛtan. Afta sɔm tɛm, Sɔl ɛn Jonɛtan day togɛda we dɛn go fɛt wɔ.

Afta we Jonɛtan day, Devid luk fɔ Jonɛtan in bɔypikin we nem Mɛfiboshɛt. We Devid si Mɛfiboshɛt, i tɛl am se: ‘Bikɔs yu papa na bin gud padi to mi, a go kia fɔ yu te yu day. Yu go de na mi os ɛn it na mi tebul.’ Devid nɔ bin ɛva fɔgɛt in padi Jonɛtan.