Dɛn Pɔnish Wan Wikɛd Kwin

We Kiŋ Eab bin de na in winda na in os na Jɛzriɛl, i si wan man we nem Nebɔt in fam. Eab bin want dis fam, so i tray fɔ bay am frɔm Nebɔt. Bɔt Nebɔt nɔ gri fɔ sɛl am to am, bikɔs i bin de agens Jiova in Lɔ fɔ sɛl land we yu famili lɛf gi yu. Yu tink se Eab bin gladi bikɔs Nebɔt bin disayd fɔ du di rayt tin? Nɔ. Eab bin vɛks bad. I nɔ bin de kɔmɔt na in rum, ɛn i nɔ bin de gri fɔ it, bikɔs i bin rili vɛks.

Eab in wikɛd wɛf we nem Jezibɛl tɛl am se: ‘Na yu na di kiŋ na Izrɛl. Yu ebul fɔ gɛt ɛnitin we yu want. A go gɛt da land de fɔ yu.’ I rayt lɛta dɛn to di bigman dɛn na di siti. I tɛl dɛn fɔ lay pan Nebɔt se i kɔs Gɔd ɛn mek dɛn ston am te dɛn kil am. Di bigman dɛn du wetin Jezibɛl tɛl dɛn fɔ du, ɛn afta dat, Jezibɛl tɛl Eab se: ‘Nebɔt dɔn day. Na yu gɛt di fam naw.’

Nebɔt nɔto in na di wangren pɔsin we nɔ du ɛnitin bad we Jezibɛl kil. Jezibɛl kil bɔku pipul dɛn we bin lɛk Jiova. I bin de wɔship lay lay gɔd dɛn, ɛn i bin de du bɔku ɔda bad tin dɛn. Jiova bin si ɔl di bad tin dɛn we Jezibɛl du. Wetin i go du to Jezibɛl?

Afta we Eab day, in bɔypikin we nem Jɛoram bin bi kiŋ. Dɔn Jiova bin sɛn wan man we nem Jeu fɔ go pɔnish Jezibɛl ɛn in famili.

Jeu rayd in chariɔt fɔ go na Jɛzriɛl, usay Jezibɛl bin de. Jɛoram go mit Jeu ɛn aks am se: ‘Mi ɛn yu gɛt pis?’ Jeu tɛl am se: ‘Wi nɔ go ɛva gɛt pis wans yu mama, Jezibɛl, de kɔntinyu fɔ du bad bad tin dɛn.’ Jɛoram tray fɔ tɔn in chariɔt fɔ rɔnawe. Bɔt Jeu kil am wit in aro.

Dɔn Jeu go na Jezibɛl in os. We Jezibɛl yɛri se Jeu de kam, i go put mekɔp na in fes, mek in ia, ɛn wet fɔ Jeu ɔp na in winda. We Jeu rich na Jezibɛl in os, Jezibɛl nɔ grit am wit rɛspɛkt. Jeu tɛl Jezibɛl in savant dɛn we bin tinap nia am se: “Una trowe am oba di winda!” Dɛn push Jezibɛl oba di winda, i fɔdɔm na grɔn, ɛn day.

Afta dat, Jeu kil Eab in 70 bɔypikin dɛn, ɛn i klin di land bay we i pul ɔl di wan dɛn we de wɔship Beal. Yu ebul fɔ si se Jiova no ɔltin, ɛn i go pɔnish di wan dɛn we de du bad tin dɛn we di rayt tɛm rich?