Jiova in Pawaful Ami

Di kiŋ we bin de na Siria, we nem Bɛnedad bin kɔntinyu fɔ atak di Izrɛlayt dɛn. Bɔt di prɔfɛt we nem Ilaysha bin de wɔn di kiŋ na Izrɛl ɛnitɛm we dɛn kam fɔ atak dɛn, so dis bin mek i ebul fɔ rɔnawe. So Bɛnedad bin disayd fɔ kech Ilaysha. I bin kam fɔ no se Ilaysha de na wan siti we nem Dotan, ɛn i bin sɛn in Sirian sojaman dɛn fɔ go kech am.

Di Sirian sojaman dɛn kam na Dotan na nɛt. Di nɛks mɔnin, Ilaysha in savant go na do, ɛn i si se bɔku bɔku sojaman dɛn de rawnd di siti. I fred ɛn i ala se: ‘Ilaysha, wetin wi fɔ du?’ Ilaysha tɛl am se: ‘Di wan dɛn we de wit wi bɔku pas di wan dɛn we de wit dɛn.’ Da sem tɛm de, Jiova mek Ilaysha in savant si bɔku bɔku ɔs ɛn chariɔt dɛn we gɛt faya na di mawntin dɛn we de rawnd di siti.

We di Sirian sojaman dɛn bin tray fɔ kech Ilaysha, i pre se: ‘Jiova, duya mek lɛ dɛn ɔl blayn.’ Wantɛm wantɛm, di sojaman dɛn nɔ bin no usay dɛn de, pan ɔl we dɛn bin ebul fɔ si. Ilaysha tɛl di sojaman dɛn se: ‘Una de na di rɔng siti. Una fala mi mek a go sho una di man we una de luk fɔ.’ Dɛn fala Ilaysha te dɛn go na Sameria usay di kiŋ na Izrɛl bin de.

Di tɛm we di Sirian sojaman dɛn bin kam fɔ no usay dɛn de, dɛn nɔ bin ebul fɔ du natin igen. Di kiŋ na Izrɛl aks Ilaysha se: ‘Mek a kil dɛn?’ Yu tink se Ilaysha yuz dis chans fɔ du bad to di pipul dɛn we bin want fɔ du am bad? Nɔ. Ilaysha tɔk se: ‘Nɔ kil dɛn. Gi dɛn tin fɔ it ɛn mek dɛn go.’ So di kiŋ bin mek big pati fɔ dɛn ɛn mek dɛn go.