Jɔn Pripia di Rod

Jɔn we na Zɛkaraya ɛn Ilizabɛt dɛn pikin, bin bi prɔfɛt we i dɔn big. Jiova bin yuz Jɔn fɔ tich pipul dɛn se di Mɛsaya de kam. Bifo Jɔn prich na di tɛmpul ɛn tɔŋ dɛn, na di wildanɛs i bin de prich. Pipul dɛn bin de kɔmɔt na Judia ɛn ɔlsay na Jerusɛlɛm fɔ kam lan frɔm Jɔn. I bin de tich dɛn se dɛn nid fɔ lɛf fɔ du bad bad tin dɛn if dɛn want fɔ mek Gɔd gladi. Bɔku pan dɛn bin lisin to Jɔn ɛn lɛf fɔ du bad, ɛn Jɔn baptayz dɛn na di Jɔdan Riva.

Jɔn bin de liv simpul layf. I bin de wɛr klos dɛn we dɛn mek wit kamɛl ia, ɛn i bin de it grasɔpa ɛn ɔni. Pipul dɛn bin rili want fɔ no bɔt Jɔn. Ivin di Faresi ɛn di Sadyusi dɛn we prawd bin de kam fɔ si am. Jɔn tɛl dɛn se: ‘Una nid fɔ chenj ɛn lɛf fɔ du bad. Una nɔ tink se una spɛshal jɔs bikɔs una se una na Ebraam in pikin dɛn. Dat nɔ min se una na Gɔd in pikin dɛn.’

Bɔku pipul dɛn bin kam to Jɔn ɛn aks am se: ‘Wetin wi fɔ du fɔ mek Gɔd gladi?’ Jɔn tɛl di Ju dɛn se: ‘If yu gɛt tu kot, na fɔ gi wan to pɔsin we nid am.’ Yu no wetin mek i tɛl dɛn dat? I bin want mek in disaypul dɛn no se if dɛn want fɔ mek Gɔd gladi, dɛn nid fɔ lɛk dɛn kɔmpin dɛn.

Jɔn tɛl di wan dɛn we de kɔlɛkt taks se: ‘Una fɔ ɔnɛs ɛn nɔ mek kruk pan ɛnibɔdi.’ I tɛl di sojaman dɛn se: ‘Una nɔ tɛk brayb ɛn una nɔ lay.’

Prist dɛn ɛn Livayt dɛn bin kam to Jɔn ɛn aks am se: ‘Udat na yu? Wi ɔl want fɔ no.’ Jɔn se: ‘Mi na di vɔys na di wildanɛs we de tɛl pipul dɛn bɔt Jiova, jɔs lɛk aw Ayzaya bin dɔn tɔk.’

Pipul dɛn bin lɛk wetin Jɔn bin de tich dɛn. Bɔku pan dɛn tink se na Jɔn na di Mɛsaya. Bɔt i tɛl dɛn se: ‘Sɔmbɔdi we pawaful pas mi de kam. A nɔ ivin fit fɔ pul in sandal dɛn na in fut. A de yuz wata fɔ baptayz una, bɔt na oli spirit i go yuz fɔ baptayz pipul dɛn.’