Setan Tɛmt Jizɔs

Afta Jizɔs baptayz, di oli spirit ɛp am fɔ go na di wildanɛs. I nɔ it ɛnitin fɔ 40 dez, ɛn dat mek i rili angri. So Setan kam fɔ tɛmt Jizɔs ɛn tɛl am se: ‘If yu na Gɔd in Pikin fɔ tru, tɔn dɛn ston ya to bred.’ Bɔt Jizɔs kot frɔm di Skripchɔ dɛn ɛn tɛl am se: ‘Dɛn rayt se nɔto it nɔmɔ go mek yu kɔntinyu fɔ liv. Yu nid fɔ du ɔl wetin Jiova se.’

Afta dat, Setan tɛmt Jizɔs fɔ di sɛkɔn tɛm. I tɛl Jizɔs se: ‘If yu na Gɔd in Pikin fɔ tru, jomp kɔmɔt na di say we ay pas ɔl na di tɛmpul ɛn kam dɔŋ. Dɛn rayt se Gɔd go sɛn in enjɛl dɛn fɔ kech yu.’ Jizɔs kot bak frɔm di Skripchɔ dɛn se: ‘Dɛn rayt se yu nɔ fɔ tɛst Jiova.’

Dɔn Setan sho Jizɔs ɔl di kiŋdɔm dɛn na di wɔl wit dɛn jɛntri ɛn glori, ɛn i tɛl am se: ‘A go gi yu ɔl dɛn kiŋdɔm dɛn ya wit dɛn glori if yu wɔship mi wan tɛm nɔmɔ.’ Bɔt Jizɔs ansa se: ‘Kɔmɔt na ya Setan! Dɛn rayt se na Jiova nɔmɔ yu fɔ wɔship.’

Na de Setan go, ɛn enjɛl dɛn kam gi Jizɔs tin fɔ it. Frɔm da tɛm de, Jizɔs bigin prich di gud nyuz bɔt di Kiŋdɔm. Na da wok de Jiova sɛn am fɔ kam du na di wɔl. Pipul dɛn bin lɛk wetin Jizɔs de tich dɛn, ɛn dɛn bin de fala am ɛnisay we in go.