Jizɔs Pafɔm Bɔku Mirekul Dɛn

Jizɔs bin kam na dis wɔl fɔ tɔk bɔt di gud nyuz bɔt Gɔd in Kiŋdɔm. Jiova bin gi Jizɔs oli spirit fɔ pafɔm mirekul dɛn fɔ sho wi wetin Jizɔs go du we i bi Kiŋ. I bin ebul fɔ mɛn ɔlkayn sik. Ɛnisay we i de go, bɔku pipul dɛn we sik de kam to am fɔ ɛp dɛn, ɛn i de mɛn dɛn. I mek di wan dɛn we blayn si, di wan dɛn we dɛf yɛri, pipul dɛn we nɔ ebul waka de waka, ɛn i fri di wan dɛn we gɛt dimɔn dɛn. Ivin if dɛn tɔch di ɛj pat pan in klos, dɛn de wɛl. Pipul dɛn bin de fala Jizɔs ɛnisay we i go. Pan ɔl we sɔntɛnde i kin want fɔ de in wangren, i nɔ ɛva drɛb ɛnibɔdi we want fɔ kam nia am.

Wan tɛm, pipul dɛn kam wit wan man we nɔ ebul fɔ waka na wan os usay Jizɔs bin de. Bɔt di os bin ful-ɔp wit bɔku pipul dɛn ɛn dat mek dɛn nɔ ebul fɔ go insay. So dɛn mek wan ol na di ruf ɛn pas am dɔŋ to Jizɔs. Dɔn Jizɔs tɛl di man se: ‘Grap mek yu waka.’ We i du dat, di pipul dɛn kɔle.

Wan ɔda tɛm, as Jizɔs rich na wan vilej, tɛn man dɛn we gɛt lɛprɔsi tinap fa ɛn ala se: ‘Jizɔs, duya ɛp wi!’ Dɛn tɛm dɛn de, dɛn nɔ bin de alaw pipul dɛn we gɛt lɛprɔsi fɔ go nia ɔda pipul dɛn. Jizɔs tɛl di man dɛn fɔ go na di tɛmpul, jɔs lɛk aw Jiova in Lɔ se pipul dɛn we gɛt lɛprɔsi fɔ du afta we dɛn dɔn wɛl. As dɛn de go na di tɛmpul, dɛn wɛl. We wan pan di man dɛn we bin gɛt lɛprɔsi kam fɔ no se i dɔn wɛl, i go bak fɔ go tɛl Jizɔs tɛnki ɛn fɔ prez Gɔd. Pan di tɛn man dɛn, na dis wangren man bin tɛl Jizɔs tɛnki.

Wan uman we dɔn sik fɔ 12 ia bin rili want fɔ lɛ dɛn mɛn am. I go biɛn Jizɔs ɛn tɔch di ɛj pat pan in klos. Wantɛm wantɛm, i wɛl. We dat apin, Jizɔs aks se: “Udat tɔch mi?” Di uman bin fred, bɔt i go bifo Jizɔs ɛn tɛl am di tru. Jizɔs ɛnkɔrej am bay we i tɛl am se: ‘Mi pikin, go wit kolat.’

Wan ɔfisa we nem Jayrɔs bin beg Jizɔs se: ‘Duya kam na mi os! Mi smɔl galpikin sik bad bad wan.’ Bɔt bifo Jizɔs rich na Jayrɔs in os, di titi bin dɔn day. We Jizɔs rich de, i si se bɔku pipul dɛn dɔn kam fɔ kray wit di famili. Jizɔs tɛl dɛn se: ‘Una nɔ kray; na slip di pikin de slip.’ Dɔn i tek di titi in an ɛn tɛl am se: “Mi pikin, grap!” I grap wantɛm wantɛm, ɛn Jizɔs tɛl in mama ɛn papa fɔ gi am tin fɔ it. Jɔs tink bɔt aw dis go dɔn mek in mama ɛn papa fil!