Natin Nɔ Stɔp Dɛn

Wan man we nɔ ebul fɔ waka kin sidɔm ɛn beg ɛnide na di tɛmpul in get. Wan aftanun, i si Pita ɛn Jɔn de go na di tɛmpul. Di man tɛl dɛn se: ‘Duya, una gi mi sɔntin.’ Pita tɛl am se: ‘A gɛt sɔntin we bɛtɛ pas mɔni fɔ gi yu. Insay Jizɔs in nem, grap ɛn waka!’ Dɔn Pita ɛp di man fɔ grap, ɛn i bigin fɔ waka! Di pipul dɛn rili gladi we dɛn si dis mirekul ɛn dis bin mek bɔku pipul dɛn kam fɔ bi Kristian.

Bɔt di prist dɛn ɛn Sadyusi dɛn bin vɛks. Dɛn arɛst di apɔsul dɛn ɛn kɛr dɛn go na kɔt ɛn aks dɛn se: ‘Udat gi una di pawa fɔ mɛn dis man?’ Pita tɛl dɛn se: ‘Wi gɛt pawa frɔm Jizɔs Krays we una kil.’ Di bigman dɛn pan Gɔd biznɛs ala se: ‘Stɔp fɔ tɔk bɔt Jizɔs!’ Bɔt di apɔsul dɛn tɛl dɛn se: ‘Wi go tɔk bɔt am. Wi nɔ go stɔp.’

As dɛn lɛf Pita ɛn Jɔn, dɛn go to di ɔda disaypul dɛn ɛn tɛl dɛn bɔt wetin apin. Dɛn pre togɛda ɛn tɛl Jiova se: ‘Duya ɛp wi mek wi gɛt maynd so dat wi go kɔntinyu fɔ du yu wok.’ Jiova bin gi dɛn in oli spirit, ɛn dɛn kɔntinyu fɔ prich ɛn mɛn pipul dɛn. Bɔku bɔku pipul dɛn bin kam fɔ bi Kristian. Di Sadyusi dɛn bin de rili jɛlɔs di apɔsul dɛn, ɛn dɛn put dɛn na prizin. Bɔt na nɛt, Jiova bin sɛn wan enjɛl we opin di prizin domɔt dɛn ɛn tɛl di apɔsul dɛn se: ‘Una go bak na di tɛmpul ɛn go tich de.’

Na mɔnin, dɛn bin tɛl di Sanɛndrin, di bigman dɛn pan Gɔd biznɛs dɛn kɔt se: ‘Di prizin domɔt dɛn lɔk, bɔt di man dɛn we dɛn arɛst dɔn go! Dɛn de na di tɛmpul de tich pipul dɛn!’ Dɛn arɛst di apɔsul dɛn bak ɛn kɛr dɛn go na di Sanɛndrin. Di ay prist tɛl dɛn se: ‘Wi tɛl una se una nɔ fɔ tɔk bɔt Jizɔs!’ Bɔt Pita ansa se: “Na Gɔd wi fɔ obe as rula, nɔto mɔtalman.”

Di bigman dɛn pan Gɔd biznɛs bin so vɛks dat dɛn bin want fɔ kil di apɔsul dɛn. Bɔt wan Faresi we nem Gameliɛl tinap ɛn tɔk se: ‘Una tek tɛm! I go bi se Gɔd de wit dɛn man dɛn ya. Una rili want fɔ fɛt agens Gɔd?’ Dɛn lisin to in advays. Afta we dɛn bit di apɔsul dɛn, dɛn tɛl dɛn bak fɔ lɛf fɔ prich, ɛn dɛn lɛf dɛn mek dɛn go. Bɔt dat nɔ bin mek di apɔsul dɛn lɛf fɔ prich. Dɛn kɔntinyu fɔ prich di gud nyuz wit maynd na di tɛmpul ɛn frɔm os to os.