STƆDI 8

Ilɔstreshɔn we De Tich Lɛsin

Matyu 13:34, 35

WETIN FƆ DU: Yuz simpul ilɔstreshɔn dɛn we go mek pipul dɛn want fɔ lisin ɛn we de tich di impɔtant pɔynt dɛn.

Pik simpul ilɔstreshɔn. Jɔs lɛk Jizɔs, yuz smɔl smɔl tin dɛn fɔ ɛksplen big tin dɛn, ɛn simpul tin dɛn fɔ ɛksplen tin dɛn we nɔ izi. Nɔ tɔk bɔt tin dɛn we go mek pipul dɛn nɔ ɔndastand di ilɔstreshɔn. Mek shɔ se di tin dɛn we yu de tɔk bɔt na yu ilɔstreshɔn rili fit di lɛsin we yu de tich. Dat go mek di wan dɛn we de lisin nɔ go kɔnfyus bikɔs sɔm pan di tin dɛn we yu de tɔk bɔt nɔ mek sɛns ɔ nɔ fit di lɛsin.

Wach di tin dɛn na di wɔl, stɔdi wi buk ɛn magazin dɛn, ɛn lisin to pipul dɛn we sabi tich. As yu de du dat, tink bɔt ilɔstreshɔn dɛn we yu go ebul yuz fɔ mek yu sabi tich. Kip dɛn ilɔstreshɔn dɛn ya na sef say so dat yu go yuz am.
Tink bɔt wetin go bɛnifit di wan dɛn we de lisin to yu. Pik ilɔstreshɔn dɛn we gɛt fɔ du wit sɔntin we pipul dɛn kin du ɛn we dɛn lɛk. Tek tɛm mek yu ilɔstreshɔn nɔ ɔfɛnd dɛn ɔ mek dɛn shem.
Tich di men pɔynt. Pe atɛnshɔn pan ilɔstreshɔn dɛn we de tich di men pɔynt, nɔto pan tin dɛn we nɔ impɔtant. Mek shɔ se di wan dɛn we de lisin to yu nɔ jɔs mɛmba di ilɔstreshɔn bɔt dɛn fɔ mɛmba bak wetin dɛn lan frɔm di ilɔstreshɔn.