LƐSIN 51

Aw Yu Go Mek Jiova Gladi bay Wetin Yu De Tɔk?

Printɛd Ɛdishɔn

We Jiova bin mek wi, i gi wi wan wɔndaful gift; dat na di tɔk we wi de ebul fɔ tɔk. Fɔ se i bisin bɔt di we aw wi de yuz da gift de? Yɛs, i bisin bɔt dat! (Rid Jems 1:26.) So aw wi go yuz di tɔk we wi ebul fɔ tɔk fɔ mek Jiova gladi?

1. Aw wi fɔ yuz di gift fɔ tɔk?

Di Baybul tɛl wi se: “Una kɔntinyu fɔ ɛnkɔrej una kɔmpin dɛn ɛn ɛp una kɔmpin dɛn fɔ tinap tranga wan.” (1 Tɛsalonians 5:11) Yu tink bɔt ɛnibɔdi we nid ɛnkɔrejmɛnt? Wetin yu go du fɔ mek i fil fayn? Mek di pɔsin no se yu rili bisin bɔt am. Sɔntɛm yu kin tɛl am wetin yu rili lɛk bɔt am. Yu tink bɔt ɛni skripchɔ we yu go yuz fɔ ɛnkɔrej pɔsin we yu sabi? Bɔku skripchɔ dɛn de we yu kin pik frɔm. Mɛmba bak se di we aw yu de tɔk sɔntin, go rili ɛnkɔrej ɔda pipul dɛn. So na fɔ tɔk fayn ɛn tek tɛm tɔk ɔltɛm.—Prɔvabs 15:1.

2. Uskayn tɔk dɛn wi fɔ avɔyd?

Di Baybul se: “Lɛ rɔtin wɔd nɔ kɔmɔt na una mɔt.” (Rid Ɛfishians 4:29.) Dis min se wi nɔ fɔ yuz bad wɔd dɛn ɔ tɔk tin dɛn we de mek ɔda pipul dɛn fil bad. Dɔn wi fɔ avɔyd fɔ de kongosa ɔda pipul dɛn ɛn fɔ tɔk bad tin fɔ pwɛl dɛn nem.—Rid Prɔvabs 16:28.

3. Wetin go ɛp wi fɔ tɔk fayn wɔd dɛn?

Bɔku tɛm, di tin dɛn we wi de tɔk bɔt ɔda pipul dɛn, de sho aw wi de fil ɛn wetin wi de tink bɔt dɛn. (Lyuk 6:45) So wi nid fɔ tren wisɛf fɔ pe atɛnshɔn pan gud tin dɛn; dat na ɛnitin we rayt, ɛnitin we klin, ɛnitin we go mek pɔsin sho lɔv, ɛn ɛnitin we pɔsin go tɔk fayn bɔt. (Filipians 4:8) Fɔ ɛp wi fɔ pe atɛnshɔn pan dɛn tin dɛn de, wi fɔ tek tɛm pik wi padi dɛn ɛn di tin dɛn we wi de yuz fɔ ɛnjɔy wisɛf. (Prɔvabs 13:20) Ɔda tin bak we go ɛp wi na we wi tink bifo wi tɔk. Tink bɔt aw wetin yu tɔk go afɛkt ɔda pipul dɛn. Di Baybul se: “Wɔd we pɔsin nɔ tink bɔt bifo i pul na mɔt, kin kɔt shap lɛk sɔd, bɔt [udat] gɛt sɛns, wɛn i tɔk, i kin mek pɔsin at kol.”—Prɔvabs 12:18.

LAN MƆ

Lan bɔt aw yu go tɔk di kayn we we go mek Jiova gladi ɛn we go ɛnkɔrej ɔda pipul dɛn.

4. Tek tɛm wit wetin yu de tɔk

Sɔntɛnde, wi ɔl kin tɔk tin dɛn we wi kin rigrɛt leta. (Jems 3:2) Rid Galeshians 5:22, 23, dɔn una tɔk bɔt dɛn kwɛstyɔn dɛn ya:

Uswan pan dɛn kwaliti dɛn ya yu fɔ pre fɔ, so dat yu go tek tɛm wit wetin yu de tɔk? Aw dɛn kwaliti dɛn ya go ɛp yu?

Rid 1 Kɔrintians 15:33, dɔn una tɔk bɔt dis kwɛstyɔn:

Aw yu padi dɛn ɛn di tin dɛn we yu de yuz fɔ ɛnjɔy yusɛf, go afɛkt di we aw yu de tɔk?

Pikchɔ Dɛn: Tin dɛn we de mek wan maredman de tɔk bad to in wɛf. 1. I kin lisin to bad myuzik dɛn. 2. I de gladi we i de wach bɔksin wit in padi na tɛlivishɔn. — Wetin kin afɛkt di we aw wi de tɔk?

Pikchɔ Dɛn: Tin dɛn we de mek da sem maredman tɔk fayn to in wɛf. 1. I de rid di Baybul. 2. In ɛn in wɛf de tɔk wit dɛn padi na Kiŋdɔm Ɔl. — Wetin kin afɛkt di we aw wi de tɔk?

Rid Ɛkliziastis 3:1, 7, dɔn una tɔk bɔt dis kwɛstyɔn:

Ustɛm i go fayn fɔ mek yu sɛt mɔt ɔ fɔ wet fɔ fayn tɛm fɔ se sɔntin?

5. Tɔk gud tin bɔt ɔda pipul dɛn

Aw yu go avɔyd fɔ tɔk bad tin bɔt ɔda pipul dɛn? Ple di VIDIO, dɔn una tɔk bɔt di kwɛstyɔn dɛn we de dɔŋ.

VIDIO: Tɔk Dɛn Wɔd we Go Ɛp Ɔda Pipul Dɛn (4:07)

Insay di vidio, wetin mek dis brɔda bin want fɔ chenj di we aw i de tɔk to ɔda pipul dɛn?
Wetin i du fɔ chenj?

Rid Ɛkliziastis 7:16, dɔn una tɔk bɔt dis kwɛstyɔn:

Wetin wi fɔ mɛmba we wi want fɔ tɔk bad bɔt pɔsin?

Rid Ɛkliziastis 7:21, 22, dɔn una tɔk bɔt dis kwɛstyɔn:

Aw dɛn vas dɛn ya go ɛp yu nɔ fɔ vɛks we sɔmbɔdi tɔk bad tin bɔt yu?

6. Tek tɛm tɔk to di wan dɛn na yu famili

Jiova want wi fɔ tɔk to di wan dɛn na wi famili fayn wan ɛn di kayn we we de sho se wi lɛk dɛn. Ple di VIDIO, dɔn una tɔk bɔt di kwɛstyɔn we de dɔŋ.