WE YU GO FƐN PƆSIN BAK
LƐSIN 7
Nɔ Taya fɔ Ɛp Pipul Dɛn
Prinsipul: “Dɛn kɔntinyu fɔ tich ɛn tɔk bɔt di gud nyuz.”—Akt 5:42.
Wetin Pɔl Bin Du?
1. Wach di VIDIO, ɔ rid Akt 19:8-10. Dɔn tink bɔt dɛn kwɛstyɔn dɛn ya:
Aw Pɔl bin kɔntinyu fɔ ɛp di wan dɛn we want fɔ no mɔ ɛn nɔ giv-ɔp we sɔm pipul dɛn bin de agens am?
Ɔmɔs tɛm Pɔl bin go bak fɔ tich dɛn pipul ya we bin want fɔ no mɔ, ɛn aw lɔng i du dat fɔ?
Wetin Wi Lan Frɔm Pɔl?
2. Wi nid fɔ yuz mɔ tɛm ɛn ɛfɔt fɔ du ritɔn visit ɛn stat Baybul stɔdi.
Falamakata Pɔl
3. Ajɔst yu shɛdul fɔ mit-ɔp wit di ɔda pɔsin in yon tɛm. Aks yusɛf: ‘Ustɛm ɛn usay na di bɛst ples fɔ go fɛn di pɔsin?’ ‘Ustɛm ɛn usay i go lɛk fɔ tɔk to mi?’ Rɛdi fɔ go fɛn di pɔsin, ilɛksɛf di tɛm nɔ fayn fɔ yu.
4. Mek apɔyntmɛnt wit di pɔsin. Ɛnitɛm yu ɛn di pɔsin tɔk dɔn, tray fɔ mek shɔ se una gɛt patikyula tɛm we una go tɔk bak. Mek shɔ se yu go mit am na di ples ɛn tɛm we una arenj.
5. Nɔ giv-ɔp. Nɔ kwik fɔ tink se pɔsin we nɔ kin de na os ɔltɛm ɔ we kin bizi nɔ want fɔ no mɔ bɔt di Baybul. (1 Kɔr. 13:4, 7) Bifo dat, wi fɔ kɔntinyu fɔ ɛp pipul dɛn. Bɔt wi fɔ mek shɔ se wi yuz wi tɛm di bɛst we.—1 Kɔr. 9:26.