DI BAYBUL IN ANSA TO SƆM KWƐSTYƆN DƐN

Di Baybul rili na Gɔd in Wɔd?

Gɔd in Wɔd fɔ bi spɛshal buk, ɛn na so di Baybul de. Dɛn dɔn print plɛnti Baybul dɛn insay bɔku bɔku langwej dɛn. Di sɛns we de insay di Baybul gɛt di pawa fɔ chenj pipul dɛn, ɛn ɛp dɛn fɔ du di rayt tin.—Rid Fɔs Lɛta Fɔ Tɛsalonayka 2:13; Sɛkɛn Lɛta To Timoti 3:16.

Wi no se di Baybul na frɔm Gɔd i kɔmɔt bikɔs i de tɛl wi di kɔrɛkt tin bɔt wetin gɛt fɔ apin tumara bambay. No mɔtalman nɔ de we go ebul fɔ du dat. Fɔ ɛgzampul, lɛ wi tɔk smɔl bɔt di buk na di Baybul we na Ayzaya. Wan pan di skrol dɛn usay dɛn bin dɔn rayt dis buk fɔ lɛk ɔndrɛd ia so bifo Jizɔs bɔn, bin de insay wan kev nia di Dɛd Si. Dis buk bin tɔk se tɛm go kam we nɔbɔdi nɔ go de igen na wan ples we dɛn kɔl Babilɔn. Dis bin apin afta Jizɔs bin dɔn kɔmɔt na di wɔl fɔ lɔng tɛm.—Rid Ayzaya 13:19, 20; Pita In Sɛkɛn Lɛta 1:20, 21.

Aw dɛn bin rayt di Baybul?

Dɛn bin tek lɛk 1,600 ia fɔ rayt di Baybul. Na lɛk 40 man dɛn rayt di Baybul, ɛn dɛn rayt bɔt di sem tin, wan pɔsin nɔ se wan tin dɔn di ɔda pɔsin se ɔda tin. Aw dɛn bin ebul fɔ du dat? Dɛn bin ebul fɔ du dat bikɔs na Gɔd bin de tɛl dɛn wetin fɔ rayt.—Rid Sɛkɛn Samiɛl 23:2.

Sɔntɛnde, Gɔd bin de yuz enjɛl dɛn, vishɔn, ɛn drim fɔ tɔk to di man dɛn we rayt di Baybul. Plɛnti tɛm, Gɔd kin jɔs sho dɛn wetin fɔ rayt bɔt, ɛn alaw dɛn fɔ fɛn di rayt wɔd we dɛn go yuz fɔ rayt in mɛsej.—Rid Rɛvɛleshɔn 1:1; 21:3-5.