Jiova Na Wi Tayt Padi

1. We Gɔd mek wi lɛk aw i tan, wetin na di tin dɛn we wi ebul fɔ du?

PIPUL DƐN kin tɔk plɛnti tɛm se: “As yu si dis pikin so, yu dɔn si in papa.” Ɛn dat na tru, plɛnti pikin dɛn kin fiba dɛn mama ɛn papa. Pikin dɛn kin gɛt sɔm abit dɛn we dɛn mama ɛn papa gɛt. Jiova, we na wi Papa na ɛvin, na in gi wi layf. (Sam 36:9) Ɛn wi we na in pikin dɛn, kin fiba am pan sɔm tin dɛn. Gɔd mek wi lɛk aw i tan. So wi ebul fɔ tink, fɔ disayd, ɛn fɔ mek tayt tayt padi.—Jɛn. 1:26.

2. Wetin go mek Jiova bi wi Padi?

² Jiova kin bi wi tayt Padi. Wi go ebul bi Gɔd in padi bikɔs Gɔd lɛk wi, ɛn bikɔs wi de sho se wi biliv pan in ɛn in Pikin. Jizɔs bin se: “Gɔd so lɛk mɔtalman dat i gi in wangren Pikin we i lɛk; so dat ɛnibɔdi we biliv pan am nɔ go day, bɔt i go gɛt layf we go de sote go.” (Jɔn 3:16) Plɛnti ɛgzampul dɛn de bɔt pipul dɛn we dɔn ɛnjɔy tayt padi biznɛs wit Jiova. Lɛ wi tɔk bɔt tu pan dɛn.

“EBRA[A]M . . . NA MI PADI”

3, 4. We i kam pan padi biznɛs wit Jiova, wetin wi go se bɔt Ebraam ɛn in gret gret granpikin dɛn?

³ Jiova bin tɔk bɔt di papa fɔ ɔl di Izrɛlayt dɛn. I bin se: “Ebra[a]m . . . na mi padi.” (Ayz. 41:8) Insay Sɛkɛn Kronikul 20:7 dɛn kɔl Ebraam Gɔd in padi. Wetin ɛp da fetful man de fɔ mek i go bi tayt padi wit di Gɔd we mek am? Na bikɔs Ebraam bin biliv pan Gɔd tranga tranga wan.—Jɛn. 15:6; rid Jems 2:21-23.

⁴ Ivin di Izrɛlayt dɛn we na Ebraam in gret gret granpikin dɛn, bin gɛt Jiova as dɛn Papa ɛn Padi. Bɔt, dɛn bin pwɛl dɛn padi biznɛs wit Gɔd. Aw? Na bay we dɛn lɛf fɔ biliv ɔl di tin dɛn we Jiova bin dɔn tɔk se i go du fɔ dɛn.

5, 6. (a) Aw Jiova dɔn bi yu padi? (b) Us kwɛstyɔn dɛn wi fɔ de tink bɔt?

⁵ Di mɔ yu lan bɔt Jiova, na di mɔ yu go biliv am; ɛn dat go mek yu lɛk am mɔ ɛn mɔ. Tink bɔt di tɛm we yu kam fɔ no se Gɔd na tru tru pɔsin, ɛn na sɔmbɔdi we yu go ebul fɔ mek yu tayt padi. Ɛn yu kam fɔ lan se wi ɔl dɔn gɛt sin, bikɔs Adam nɔ bin du wetin Gɔd want. Dɔn, yu kam fɔ ɔndastand se ɔl mɔtalman dɔn kɔmɔt nia Gɔd. (Kɔl. 1:21) Yu kam fɔ no bak se wi Papa na ɛvin nɔto pɔsin we de fa frɔm wi, ɛn i kia bɔt wi. We wi lan se Jiova gi in wangren Pikin we na Jizɔs fɔ kam day fɔ wi ɛn biliv pan di day we i day, na frɔm da tɛm de wi bigin fɔ mek padi biznɛs wit Gɔd.

⁶ We wi tink bɔt aw wi kam fɔ no Jiova, wi fɔ de aks wisɛf se: ‘A de tray fɔ mek mi padi biznɛs wit Gɔd tayt mɔ ɛn mɔ? Di biliv we a biliv Jiova we na mi Padi, ɛn di lɛk we a lɛk am, de go bifo ɛvride?’ Wan ɔda pɔsin we bin gɛt tayt padi biznɛs wit Jiova na Gidyɔn. Lɛ wi tɔk bɔt in fayn ɛgzampul ɛn si aw wi go falamakata am.

“PAPA GƆD NA PIS”

7-9. (a) Us wɔndaful tin bin apin to Gidyɔn? Wetin bin apin afta dat? (Luk di pikchɔ nia dis atikul in taytul.) (b) Aw wi go gɛt padi biznɛs wit Jiova?

⁷ Jɔj Gidyɔn bin sav Jiova insay di tɛm we bad bad tin dɛn bin de mit di Izrɛlayt dɛn afta dɛn bin dɔn go na di land we Gɔd bin dɔn prɔmis dɛn. Di Jɔj Dɛm chapta 6 tɔk se Jiova in enjɛl bin go mit Gidyɔn na Ofra. Da tɛm de, di Midianayt dɛn bin de trɛtin di Izrɛlayt dɛn. Na dat mek we Gidyɔn bin de pul wan it we dɛn kɔl wit, pan di stik i bin de ayd na di ples usay dɛn de pul wayn so dat di Midianayt dɛn nɔ go si di wit. So Gidyɔn bin sɔprayz we di enjɛl go mit am ɛn kɔl am “man we brev ɛn gɛt trɛnk.” Gidyɔn aks di enjɛl if Jiova, we dɔn pul di Izrɛlayt kɔmɔt na Ijipt, go rili ɛp dɛn. We di enjɛl de tɔk wetin Gɔd tɛl am, i tɛl Gidyɔn se Jiova go ɛp dɛn.

⁸ Gidyɔn bin de wɔnda aw i go ebul “fri Izrɛl kɔmɔt na di Midianayt dɛn an.” Jiova tɛl am se ‘i go de wit am ɛn i go mek i ebul kil ɔl di Midianayt dɛn lɛk we dɛn go kil wan pɔsin.’ (Jɔj 6:11-16) Gidyɔn bin stil de tink bɔt aw dis go bi, so i aks fɔ sayn. Di we aw Gidyɔn bin tɔk to Jiova sho se i bin no se Jiova na tru tru Pɔsin.

⁹ Di tin we bin apin nɛks bin mek Gidyɔn biliv wetin Jiova tɛl am, ɛn dat bin mek i kam nia Gɔd mɔ. Gidyɔn bin mek it ɛn gi di enjɛl we Jiova bin sɛn to am. We di enjɛl tɔch di it wit wan stik we i bin gɛt, di it kech faya. Dat bin mek Gidyɔn no se na Jiova bin rili sɛn di enjɛl. So Gidyɔn ala se: “O Lɔd mi PAPA GƆD, tide, a dɔn si PAPA GƆD in enjɛl fes to fes.” (Jɔj 6:17-22) Bɔt yu tink se dat bin stɔp Gidyɔn fɔ mek i nɔ lan mɔ bɔt Gɔd? Nɔto so i bi atɔl! Infakt, dis bin mek Gidyɔn sabi Jiova gud gud wan, ɛn dat bin gi am kolat. Aw wi no dat? Na bay di nem we Gidyɔn kɔl di ɔlta we i bil na da ples de; i kɔl am Jiova Shalɔm we min “PAPA GƆD na pis.” (Rid Di Jɔj Dɛm 6:23, 24.) We wi de tink gud wan bɔt wetin Jiova de du fɔ wi ɛvride, wi go kam fɔ no se in na wi tru tru Padi. Di mɔ wi de pre to Gɔd ɔltɛm, na di mɔ wi go gɛt kolat, ɛn na di mɔ wi padi biznɛs wit am go tayt.

UDAT ‘FIT FƆ GO INSAY JIOVA IN OS FƆ WƆSHIP’?

10. Wetin Sam 15:3, 5 se Jiova want wi fɔ du fɔ mek wi go bi in padi?

¹⁰ Fɔ mek wi go bi Jiova in padi, sɔm tin dɛn de we wi fɔ du. Insay Sam 15, Devid bin siŋ bɔt wetin wi fɔ du fɔ mek wi go ‘fit fɔ go insay Jiova in os fɔ wɔship.’ Dis min se wi fɔ bi Gɔd in padi. (Sam 15:1) Lɛ wi tɔk bɔt tu pan di tin dɛn we wi fɔ du. Fɔs, wi nɔ fɔ tɔk bad bɔt pɔsin. Ɛn sɛkɔn, wi fɔ du wetin rayt pan ɔltin we wi de du. We Devid bin de tɔk bɔt pɔsin we go fit fɔ go insay Jiova in os fɔ wɔship, i se dis pɔsin “nɔ de pwɛl in kɔmpin in nem . . . na pɔsin we nɔ de tek brayb fɔ lay pan pipul.”—Sam 15:3, 5.

11. Wetin mek wi fɔ lɛf fɔ tɔk bad bɔt pɔsin?

¹¹ Insay wan ɔda Sam we Devid rayt, i se: “I fɔ lɛf fɔ tɔk bad tɔk.” (Sam 34:13) If wi nɔ lisin to dis advays, wi padi biznɛs wit wi Papa na ɛvin go pwɛl. Infakt, fɔ lay pan pɔsin na wan pan di tin dɛn we Jiova in ɛnimi we na Setan, kin du. Di wɔd “Dɛbul” kɔmɔt frɔm wan wɔd insay Grik we min “kongosa, ɔ pɔsin we de tɔk bad bɔt ɔda pɔsin.” We wi de tek tɛm tɔk bɔt ɔda pipul dɛn, dis go mek wi kɔntinyu fɔ bi Jiova in padi. Wi fɔ tek tɛm mɔ wit di we aw wi de trit di ɛlda dɛn na di kɔngrigeshɔn.—Rid Di Ibru Pipul Dɛn 13:17; Jud In Lɛta 8.

12, 13. (a) Wetin mek wi fɔ du wetin rayt pan ɔltin we wi de du? (b) Wetin dat go du to ɔda pipul dɛn?

¹² Apat frɔm dat, ɛnibɔdi we na Jiova in savant fɔ du wetin rayt to ɔda pipul dɛn. Di apɔsul Pɔl bin se: “Una pre fɔ wi ɔltɛm. Wi no gud wan se wi dɔn du ɔl wetin wi no se wi fɔ du, bikɔs wi . . . want du wetin rayt ɔltɛm.” (Ibru 13:18) Bikɔs ‘wi want du wetin rayt ɔltɛm,’ wi nɔ fɔ tek advantej pan wi kɔmpin Kristian dɛn. Fɔ ɛgzampul, if wi kɔmpin Kristian de wok fɔ wi, wi fɔ trit am fia wan, ɛn pe am ɔmɔs wi bin dɔn se wi go pe am. As Kristian dɛn, wi fɔ du wetin rayt to ɔlman. Ɛn if na wi de wok fɔ wi kɔmpin Kristian, wi nɔ fɔ tek advantej pan am. Dat min se wi nɔ fɔ fil se di pɔsin we wi de wok fɔ, fɔ trit wi fayn pas wi kɔmpin dɛn we wi ɔl de wok.

¹³ Bɔku tɛm, wi kin yɛri we pipul dɛn de prez Jiova Witnɛs dɛn bikɔs dɛn de du wetin rayt ɔltɛm. Fɔ ɛgzampul, di dayrɛktɔ na wan big kɔmni bin si se Jiova Witnɛs dɛn na pipul dɛn we de du wetin dɛn se. I bin se: “Una kin du ɔl di tin dɛn we una dɔn gri fɔ du.” (Sam 15:4) Dis kayn tin kin ɛp fɔ mek wi padi biznɛs wit Jiova kɔntinyu. Apat frɔm dat, i kin mek pipul dɛn prez wi Papa na ɛvin.

ƐP ƆDA PIPUL DƐN FƆ BI GƆD IN PADI

14, 15. We wi de prich, aw wi go ɛp ɔda pipul dɛn fɔ bi Jiova in padi?

¹⁴ Bɔku pipul dɛn biliv se Gɔd de, bɔt bɔku pan di wan dɛn we wi kin prich to nɔ de si am as dɛn tayt Padi. Aw wi go ɛp dɛn pipul ya fɔ bi Gɔd in padi? We Jizɔs bin de sɛn 70 pan in disaypul dɛn fɔ go prich, i bin se: “Ɛni os we una go, una fɔ se fɔs, ‘Mek Gɔd blɛs ɔlman na dis os!’ If pɔsin de we want di blɛsin, i go gɛt di blɛsin we una pre mek i gɛt; bɔt if pɔsin nɔ de we want di blɛsin, di blɛsin we una dɔn gi am go kam bak to una.” (Lyuk 10:5, 6) Wi go ɛp pipul dɛn fɔ lan di tru, if wi tɔk fayn to dɛn. Ɛn di we aw wi de tɔk, kin ivin mek di wan dɛn we nɔ kin want fɔ lisin to wi, lisin to wi di nɛks tɛm we wi mit dɛn.

¹⁵ We wi mit pipul dɛn we de dip dip wan insay lay lay rilijɔn ɔ we biliv pan tin dɛn we dɛn fɔstɛm pipul dɛn bin de du we nɔ de na di Baybul, wi fɔ kɔntinyu fɔ trit dɛn fayn; lɛk se dɛn na wi padi. Plɛnti pipul dɛn dɔn taya fɔ si di bad bad tin dɛn we de apin na di wɔl. We dɛn pipul ya kam na Kiŋdɔm Ɔl fɔ lan di tru bɔt Gɔd, wi fɔ tɔk fayn to dɛn. Wi kin si bɔku ɛgzampul dɛn na di atikul dɛn we kin gɛt di taytul “The Bible Changes Lives.”

WI DE WOK WIT WI TAYT PADI

16. Aw wi go bi Jiova in padi ɛn ‘jɔyn an fɔ du in wok’?

¹⁶ We pipul dɛn kin wok togɛda, dat kin mek dɛn bi tayt padi. Ɔl di wan dɛn we dɔn gi dɛn layf to Jiova, go ebul fɔ bi in padi ɛn “jɔyn an fɔ du Gɔd in wok.” (Rid Fɔs Lɛta Fɔ Kɔrint 3:9.) Fɔ tru, as wi de prich to pipul dɛn ɛn mek dɛn bi Jizɔs in disaypul, wi de ebul fɔ ɔndastand mɔ di wɔndaful kwaliti dɛn we wi Papa na ɛvin, gɛt. Wi de si aw in oli spirit de ɛp wi fɔ ebul du di prichin wok gud gud wan.

17. Aw wi asɛmbli ɛn kɔnvɛnshɔn dɛn de sho se Jiova na wi Padi?

¹⁷ Di mɔ wi de prich to pipul dɛn, na di mɔ wi de bi Jiova in tayt tayt padi. Fɔ ɛgzampul, wi de si aw Jiova de mek pipul dɛn we nɔ lɛk wi, nɔ de ebul fɔ stɔp di prichin wok. I dɔn de gayd wi ɔl dɛn tɛm ya. Ɛn i de kɔntinyu fɔ yuz di mitin dɛn ɛn di buk dɛn ɛn ɔda tin dɛn fɔ tich wi. Di kɔnvɛnshɔn ɛn asɛmbli dɛn we wi kin gɛt, de sho se wi Papa na ɛvin, sabi gud wan wetin na wi prɔblɛm ɛn wetin wi nid. Wan famili bin rayt bɔt wan kɔnvɛnshɔn se: “Di program rili tɔch wi at. I mek wi no se Jiova rili lɛk wi ɔl ɛn want fɔ mek wi bɛtɛ.” Wan man ɛn in wɛf we kɔmɔt na Jamani, bin go wan spɛshal kɔnvɛnshɔn na Ayriland. Afta di kɔnvɛnshɔn, dɛn bin tɔk se dɛn bin rili lɛk di we aw di brɔda ɛn sista dɛn trit dɛn fayn na di kɔnvɛnɛhɔn. Dɛn tɔk bak se: “Bɔt na Jiova ɛn in Kiŋ Jizɔs Krays, wi go tɛl tɛnki mɔ. Na dɛn dɔn mek wi de insay dis famili we gɛt wanwɔd. Wi nɔ jɔs de tɔk se wi gɛt wanwɔd, bɔt wi de ɛnjɔy am ɛvride. Di kayn we aw dɛn trit wi fayn na di kɔnvɛnshɔn na Dɔblin, go mek wi go de tink ɔltɛm bɔt di wɔndaful chans we wi gɛt fɔ sav wi gret Gɔd wit una ɔl.”

PADI DƐN KIN TƆK TO DƐNSƐF

18. Wetin wi fɔ aks wisɛf bɔt di we aw wi de tɔk to Jiova?

¹⁸ Pipul dɛn padi biznɛs kin tayt mɔ ɛn mɔ we dɛn de tɔk to dɛnsɛf. Tide, bɔku pipul dɛn kin yuz Intanɛt ɛn mobayl fon fɔ tɔk to ɔda pipul dɛn. Bɔt, we wi ɛn wi tayt Padi we na Jiova, wi kin tɔk? Wi Padi “de ansa wi prea.” (Sam 65:2) Bɔt na ɔmɔs tɛm wi kin tɔk to am?

19. If wi nɔ no aw fɔ tɛl wi Papa na ɛvin aw wi de fil, wetin go ɛp wi fɔ du dat?

¹⁹ Nɔtɔ ɔl Gɔd in savant dɛn kin ebul fɔ opin dɛn at ɛn tɛl am aw dɛn de fil. Bɔt rili, na dat Jiova want mek wi du we wi de pre to am. (Sam 119:145; Lam. 3:41) Ilɛksɛf wi nɔ no aw fɔ tɔk di we aw wi de fil, sɔntin de we go ɛp wi. Pɔl bin rayt to di Kristian dɛn na Rom se: “Wi nɔ no aw fɔ pre, na Gɔd in Spirit insɛf de tɔk to Gɔd fɔ wi; di pini we i de pini gɛt minin to Gɔd we mɔtalman nɔ ebul ɔndastand ɔ tɔk. Gɔd, we no wetin mɔtalman want nain at, no wetin di Spirit min, bikɔs di Spirit de beg Gɔd fɔ in pipul dɛn ɛn i de tɔk wetin Gɔd insɛf want.” (Rom 8:26, 27) We wi rid ɛn tink gud wan bɔt wetin de na Baybul buk dɛn lɛk Job, Di Sam Dɛm, ɛn Prɔvabs, dat go ɛp wi fɔ ebul tɛl Jiova aw rili wi de fil.

20, 21. Wetin na di advays we Pɔl gi wi na Lɛta Fɔ Filipay 4:6, 7?

²⁰ We bad bad tin de mit wi, lɛ wi mɛmba di advays we Pɔl bin gi to di Kristian dɛn na Filipay. I bin se: “Una nɔ fɔ mek ɛnitin wɔri una, bɔt una fɔ de pre bɔt ɔltin. Wɛn una de pre, una fɔ aks Gɔd fɔ ɛnitin we una want ɛn una fɔ tɛl am tɛnki.” We wi pre to Jiova dis kayn we, dat go mek wi gɛt tru tru kolat. Na dat mek Pɔl tɔk bak se: “Gɔd go gi una kol at, we mɔtalman nɔ ebul ɔndastand, we nɔ go mek ɛnitin wɔri una, bikɔs una gɛt wanwɔd wit Jizɔs Krays.” (Fil. 4:6, 7) Wi fɔ tɛl Gɔd tɛnki ɔltɛm fɔ we i gi wi kolat so dat natin nɔ go wɔri wi.

²¹ Prea de ɛp fɔ mek wi padi biznɛs wit Jiova tayt mɔ ɛn mɔ. So lɛ wi “de pre ɔltɛm.” (1 Tɛs. 5:17) Lɛ dis tin we wi dɔn stɔdi, ɛp wi fɔ kɔntinyu fɔ mek wi padi biznɛs wit Gɔd tayt mɔ ɛn mɔ ɛn du wetin i want wi fɔ du. Ɛn lɛ wi tink gud wan bɔt di blɛsin dɛn we wi go ɛnjɔy bikɔs Jiova na wi Papa, wi Gɔd, ɛn wi Padi.