Aw Yu Go Ebul Ɛp Yu Fambul dɛn We Nɔto Jiova Witnɛs?

WAN tɛm, Jizɔs Krays bin tɛl wan man we bin want fɔ fala am se: “Go na yu os to yu pipul dɛn, ɛn tɛl dɛn wetin di Masta dɔn du fɔ yu ɛn aw i dɔn sɔri fɔ yu.” I go mɔs bi se na wan ples we dɛn kɔl Gadara, Jizɔs bin tɔk dɛn wɔd ya. Gadara bin de nia di si na Galili. Dɛn wɔd ya we Jizɔs bin tɔk sho wi se i ɔndastand wan men tin we mɔtalman lɛk fɔ du, dat na fɔ tɛl in fambul dɛn bɔt di tin dɛn we impɔtant to am.—Mak 5:19.

Tide sɛf, na so pipul dɛn kin du. Bɔt sɔm kɔntri dɛn lɛk fɔ du dat pas ɔda kɔntri dɛn. We sɔmbɔdi kin bigin fɔ wɔship di tru Gɔd we na Jiova, i kin want fɔ tɛl in fambul dɛn bɔt di nyu tin dɛn we i dɔn biliv. Bɔt aw i go ebul tɔk to in fambul dɛn bɔt Jiova, pan ɔl we dɛn de na ɔda rilijɔn ɔ dɛn nɔ biliv Gɔd atɔl? Di Baybul gɛt fayn fayn advays dɛn we go ɛp wi fɔ du dat.

‘WI DƆN SI DI MƐSAYA’

Insay di tɛm we di apɔsul dɛn bin de, Andru na bin wan pan di fɔs pipul dɛn we no se Jizɔs na di Mɛsaya. Yu no udat fɔs i go tɛl? Di Baybul se: “Andru go fɛn in brɔda Pita wantɛm ɛn tɛl am se, ‘Wi dɔn si di pɔsin we Gɔd sɛn fɔ sev ɔlman, di wan we dɛn kɔl Mɛsaya.’ (Mɛsaya min ‘Krays’ na Grik.)” Andru kɛr Pita go to Jizɔs. Dis gi Pita di chans fɔ bi Jizɔs in disaypul.—Jɔn 1:35-42.

Afta lɛk siks ia so, Pita bin go de na wan ples we dɛn kɔl Jopa. Wan de, dɛn kam tɛl am fɔ go na Sizeria fɔ go to wan sojaman we nem Kɔnilyɔs. Udat dɛn bin gɛda na Kɔnilyɔs in os we Pita bin go de? Di Baybul se: “Kɔnilyɔs bin de wet [Pita ɛn di wan dɛn we go wit am], i bin dɔn kɔl in fambul dɛn ɛn in padi dɛn.” Dis tin we Kɔnilyɔs du, gi in fambul dɛn di chans fɔ lisin to Pita ɛn disayd wetin fɔ du.—Akt 10:22-33.

Wetin wi lan frɔm di we aw Andru ɛn Kɔnilyɔs mek dɛn fambul dɛn lan bɔt Gɔd?

Andru ɛn Kɔnilyɔs nɔ bin se dɛn fambul dɛn go yɛri bɔt Gɔd ɔda tɛm. Na Andru insɛf sɛf kɛr Pita go to Jizɔs, ɛn na Kɔnilyɔs insɛf bin arenj fɔ mek in fambul dɛn kam lisin to Pita. Bɔt Andru ɛn Kɔnilyɔs nɔ bin fos dɛn fambul dɛn ɔ yuz kɔni kɔni we fɔ mek dɛn bi Krays in disaypul. Wetin wi lan frɔm dat? I go fayn mek wisɛf du di sem tin. Aw wi go du dat? Wi kin tɛl wi fambul dɛn bɔt sɔm tin dɛn we wi dɔn lan, fɛn we fɔ mek dɛn lan di tru tin dɛn we de na di Baybul, ɛn tray fɔ mek dɛn sabi wi Kristian brɔda ɛn sista dɛn. Bɔt wi fɔ mɛmba se dɛn gɛt di rayt fɔ chuz fɔ lan ɔ nɔ fɔ lan di tru tin dɛn we de na di Baybul, so wi nɔ fɔ fos dɛn. Fɔ no aw wi kin ɛp wi fambul dɛn, lɛ wi tɔk smɔl bɔt wan man ɛn in wɛf we de na Jamani. Dɛn nem dɛn na Yɔgan ɛn Petra.

Petra bin bigin stɔdi di Baybul wit Jiova Witnɛs dɛn ɛn leta i baptayz. In man we na Yɔgan, na bin sojaman. We Petra bigin fɔ stɔdi di Baybul, Yɔgan nɔ bin lɛk dat. Bɔt leta, i bin kam fɔ no se Jiova Witnɛs dɛn de prich di tru tin dɛn we de na di Baybul. So insɛf gi in layf to Jiova, ɛn naw in na ɛlda na dɛn kɔngrigeshɔn. Dis brɔda tɔk sɔntin we go ɛp wi fɔ no aw fɔ tɔk to wi fambul dɛn we nɔto Jiova Witnɛs.

Yɔgan tɔk se: “Wi nɔ fɔ fos wi fambul dɛn fɔ mek dɛn bi Jiova Witnɛs ɛn nɔto ɔltɛm wi fɔ de tɔk to dɛn bɔt di Baybul. Dat go mek dɛn nɔ go de gri fɔ lisin to wi. I go fayn if na wan wan tɛm wi de tɔk to dɛn bɔt dat. I go fayn bak fɔ mek wi fambul dɛn sabi di brɔda ɛn sista dɛn we dɛn ɔl na di sem ej, ɛn we dɛn ɔl lɛk fɔ du di sem tin. Dat go ɛp dɛn.”

Di apɔsul Pita ɛn Kɔnilyɔs in fambul dɛn, nɔ bin westɛm fɔ du wetin di Baybul se. Bɔt ɔda wan dɛn we bin de di tɛm we di apɔsul dɛn bin de, bin nid mɔ tɛm fɔ disayd fɔ bi Kristian.

JIZƆS IN BRƆDA DƐN

Bɔku pan Jizɔs in fambul dɛn bin sho se dɛn gɛt fet pan am. Fɔ ɛgzampul, i go bi se tu pan in apɔsul dɛn we na Jems ɛn Jɔn, na bin in kɔzin dɛn; ɛn dɛn mama we nem Salomi, na bin in anti. I go bi se Salomi na bin wan pan di “plɛnti ɔda uman dɛn we bin de pul pan wetin dɛn gɛt gi Jizɔs ɛn in lanin bɔy dɛn.”—Lyuk 8:1-3.

Bɔt nɔto ɔlman pan Jizɔs in fambul dɛn bin biliv am wantɛm wantɛm. Fɔ ɛgzampul, wan ia afta Jizɔs bin baptayz, bɔku pipul dɛn bin gɛda na wan os fɔ lisin to am. “Wɛn Jizɔs in fambul dɛn yɛri dat, dɛn go pul am kɔmɔt de, bikɔs pipul se, ‘I de mek lɛkɛ se in ed nɔ de.’” Wan ɔda tɛm bak, we Jizɔs in brɔda dɛn bin de tɔk bɔt usay i fɔ go, i nɔ bin ɛksplen to dɛn klia wan. Wetin mek i du dat? Na bikɔs “in brɔda dɛnsɛf nɔ bin biliv pan am.”—Mak 3:21; Jɔn 7:5.

Wetin wi lan frɔm di we aw Jizɔs bin de trit in fambul dɛn? I nɔ bin vɛks we sɔm dɛn se in ed nɔ de. Ivin afta i day ɛn gɛt layf bak, i bin sho in fambul dɛn se i kia fɔ dɛn bay we i sho insɛf to wan pan in brɔda dɛn we na Jems. Bikɔs Jizɔs sho insɛf to Jems, dat bin mek Jems ɛn Jizɔs in ɔda brɔda dɛn no klia wan se na in na di Mɛsaya. We dɛn biliv se na Jizɔs na di Mɛsaya, dɛn go de wit di apɔsul ɛn ɔda pipul dɛn ɔp wan rum na Jerusɛlɛm. Ɛn i go bi se na pan dɛn ɔl Gɔd put in oli spirit. Leta, Jems ɛn Jizɔs in ɔda brɔda we na Jud, bin kɔntinyu fɔ du spɛshal tin dɛn.—Akt 1:12-14; 2:1-4; 1 Kɔr. 15:7.

SƆM PIPUL DƐN NID MƆ TƐM

Bɔku pan wi fambul dɛn tide nid mɔ tɛm bifo dɛn go disayd fɔ bi Kristian, jɔs lɛk trade we di apɔsul dɛn bin de. Fɔ ɛgzampul, Roswita na bin Katlik we in man baptayz fɔ bi Jiova Witnɛs insay 1978. Di tin dɛn we Roswita biliv na in Katlik Chɔch, mek i nɔ bin de trit in man fayn we i baptayz. Bɔt as tɛm de go, i bigin trit in man fayn bikɔs i bigin si se na di tru tin na di Baybul Jiova Witnɛs dɛn de tich. Insay 2003, insɛf baptayz. Wetin ɛp am fɔ chenj? Na bikɔs in man nɔ bin de vɛks we i bin de trit am bad. In man bin de gi am chans fɔ chenj di we aw i de tink bɔt Jiova Witnɛs dɛn. Roswita tɔk sɔntin we wi kin lan frɔm. I se: “Wi go gɛt bɛnifit if wi bia. So, bia ɛn kɔntinyu fɔ bia.”

Wan ɔda sista we nem Mɔnika baptayz insay 1974, ɛn in tu bɔy pikin dɛn baptayz tɛn ia afta dat. Mɔnika in man we na Ans, nɔ bin de trit dɛn bad; bɔt i nɔ baptayz te 2006. Afta ɔlman na di famili dɔn baptayz, dɛn tɔk sɔntin we wi ɔl kin lan frɔm. Dɛn se: “Tinap tranga wan fɔ Jiova, ɛn nɔ alaw pɔsin fɔ mek yu du sɔntin we nɔ de na di Baybul.” Mɔnika ɛn in pikin dɛn bin de sho Ans ɔltɛm se dɛn lɛk am. Ɛn dɛn nɔ bin de ɛva tink se i nɔ go baptayz.

DRINK DI WATA WE DE GI LAYF

Wan tɛm, Jizɔs bin se di mɛsej we de insay di Baybul tan lɛk wata we di gi layf we go de sote go. (Jɔn 4:13, 14) Wi want wi fambul dɛn fɔ fil fayn we dɛn de drink dis wata we kol ɛn klin. Wi nɔ go rili want fɔ chok dɛn wit dis wata bikɔs dɛn dɔn fos dɛn fɔ drink plɛnti wata na di rilijɔn we dɛn de. So na di we aw wi ɛksplen to dɛn di tin dɛn we wi dɔn lan na di Baybul go mek dɛn drink fayn ɔ go mek dɛn chok. Di Baybul tɔk se: “Pɔsin we de waka tret na PAPA GƆD in yay de tink gud bifo i ansa” kwɛstyɔn ɛn “man we gɛt gud sɛns de tek tɛm tɔk, i kin kɔnvins pɔsin bay wetin i de tɔk.” Aw wi go ebul fala dɛn advays ya?—Prɔv. 15:28; 16:23.

Lɛ wi se wan sista want fɔ ɛksplen to in man bɔt wetin i dɔn lan na di Baybul. Fɔ sho se i de “tink gud bifo i ansa,” i fɔ pik di kayn wɔd dɛn we i de tɔk ɛn i nɔ fɔ tɔk kwik kwik wan. Di sista nɔ fɔ tray fɔ sho se na in nɔmɔ sabi Gɔd ɔ i bɛtɛ pas in man. We i tek tɛm pik di kayn wɔd dɛn we i fɔ tɔk to in man, kin mek dɛn gɛt pis ɛn gladi at. I go fayn mek di sista tink bɔt dɛn kwɛstyɔn ya: Ustɛm i kin izi fɔ tɔk wit in man? Uskayn tin dɛn di man kin lɛk fɔ tɔk bɔt ɔ rid bɔt? Na pɔsin we lɛk sayɛns, pɔlitiks, ɔ gem? Aw i go ebul tɔk bɔt di Baybul to in man we go mek di man rɛdi fɔ lisin? We di sista tink bɔt dɛn tin ya, dat go ɛp am fɔ no aw fɔ tɔk ɛn wetin fɔ du.

Fɔ ɛp wi fambul dɛn we nɔ bi Jiova Witnɛs yet, wi nɔ fɔ jɔs de ɛksplen to dɛn wetin wi biliv. Bɔt wi fɔ de du di tin dɛn we wi de tɔk. Wi fɔ gɛt gud abit.

WI FƆ GƐT GUD ABIT

Yɔgan we wi bin tɔk bɔt, bin se: “Di we aw wi de liv wi layf ɛvride, fɔ bi di we aw di Baybul se. Dat na wan fayn tin we wi fambul dɛn go de si, pan ɔl we dɛn nɔ go tɔk am.” Ans we baptayz afta lɛk 30 ia so frɔm we in wɛf baptayz, gri wit dat. I se: “I impɔtant fɔ gɛt gud Kristian abit, bikɔs i go mek wi fambul dɛn ebul fɔ si se di tru tin dɛn na di Baybul, de rili ɛp wi.” Wi fambul dɛn fɔ ebul si se di tin dɛn we wi biliv, de mek wi gɛt gud abit we go sho se wi difrɛn frɔm ɔda pipul dɛn.

Di apɔsul Pita bin gi wan impɔtant advays to uman dɛn we dɛn man nɔto Jiova Witnɛs. I se: “Semwe so, una dɛn [mareduman] fɔ de du ɔl wetin una man dɛn tɛl una fɔ du, so dat if ɛni wan pan dɛn de we nɔ biliv Gɔd in wɔd, una go mek dɛnsɛf kam biliv pan Gɔd bay aw una de du. Una nɔ go gɛt fɔ tɔk to dɛn bɔt Gɔd igen sɛf, bikɔs dɛn go si se una de waka tret ɛn una de fred Gɔd. Nɔto dɛn tin we pɔsin de si una fɔ de tek mek unasɛf fayn, lɛkɛ di stayl dɛn we una de mek pan una ia, dɛn chen we una de ɛŋ, ɔ dɛn klos we una de wɛr. Bifo dat, ɔl una yon fayn fɔ de insay; una fɔ de tɔk ɛn du tin saful saful, una ed nɔ fɔ de wam, na dɛn kayn tin ya Gɔd luk se fayn, ɛn na dɛn kayn fayn de go de sote go.”—1 Pit. 3:1-4.

Pita bin de tɔk bɔt di we aw mareduman dɛn gud abit, go mek dɛn man bi Kristian. Na dat wan sista we nem Krista de tray fɔ du frɔm we i baptayz insay 1972. Tɛm bin de we in man bin de stɔdi di Baybul wit Jiova Witnɛs dɛn, bɔt i nɔ disayd fɔ bi Jiova Witnɛs yet. I bin dɔn de go na sɔm mitin dɛn, ɛn i yus to di brɔda ɛn sista dɛn na di kɔngrigeshɔn, i nɔ gɛt wan prɔblɛm wit dɛn. Bɔt di brɔda ɛn sista dɛn nɔ ɛva tray fɔ fos am fɔ baptayz. Wetin Krista de du fɔ ɛp in man?

Krista se: “A rɛdi fɔ fala ɔl di tin dɛn we Jiova want mi fɔ du. Dɔn a de tray bak fɔ ɛp mi man so dat insɛf go bi Jiova Witnɛs; nɔto bay wetin a de tɔk, bɔt na bay mi gud abit. We i tɛl mi fɔ du sɔntin we nɔ pwɛl Gɔd in lɔ, a de tray tranga wan fɔ du wetin i se. Ɛn a de rɛspɛkt in rayt fɔ chuz wetin i want ɛn lɛf ɔltin na Jiova in an.”

Di tin we Krista de du, sho wi wetin mek i fayn fɔ bia wit pipul dɛn we nɔto Jiova Witnɛs. Krista de kɔntinyu fɔ go mitin ɛn prich to pipul dɛn ɔltɛm. Pan ɔl we i de du dɛn tin ya, i stil de fɛn tɛm fɔ sho in man se i lɛk am, spɛn tɛm wit am, ɛn lisin to am. I go fayn mek ɛni Kristian we gɛt fambul we nɔto Jiova Witnɛs, du dɛn sem tin ya we Krista du; dat na fɔ rɛspɛkt di pɔsin in rayt ɛn fɔ kɔntinyu fɔ lɛk am. Di Baybul se: “Fɔ ɛnitin we pɔsin wan du, di rayt tɛm de.” Sɔm pan dɛn tin ya kin bi fɔ spɛn tɛm wit wi fambul dɛn we nɔto Jiova Witnɛs, mɔ wit di pɔsin we wi mared to. We wi spɛn tɛm wit dɛn, wi go ebul fɔ de tɔk wit dɛn. Bɔku pipul dɛn stori dɔn sho se we wi tɔk fayn wit wi fambul dɛn, i go mek dɛn nɔ de fil lɛk se wi nɔ kia fɔ dɛn, ɛn dɛn nɔ go jɛlɔs we dɛn si wi ɛn ɔda pipul dɛn de tɔk.—Ɛkli. 3:1.

NƆ ƐVA TAYA

Wan man we nem Ɔlga we in papa bin baptayz 20 ia afta ɔda pipul dɛn na in famili baptayz bin tɔk se: “I impɔtant fɔ sho se wi lɛk di pɔsin we nɔto Jiova Witnɛs ɛn fɔ de pre fɔ am.” Krista tɔk bak se i ‘go kɔntinyu fɔ op se wande wande in man go kam fɔ sav Jiova.’ Wi fɔ biev fayn ɔltɛm to wi fambul dɛn we nɔto Jiova Witnɛs. Wi fɔ de op se wande wande dɛn go kam fɔ sav Jiova.

Di men tin we wi want fɔ du na fɔ mek shɔ se natin nɔ pwɛl di tayt padi biznɛs we wi gɛt wit wi fambul dɛn. Wi fɔ gi dɛn di chans fɔ lan di trut, ɛn wi fɔ ɛp dɛn fɔ du wetin di Baybul se. Wi fɔ mek shɔ se wi biev fayn pan ɛnitin we wi de du, ɛn wi ‘nɔ fɔ fos pipul dɛn fɔ biliv Krays ɛn wi fɔ de lisin to wetin dɛn de tɔk.’—1 Pit. 3:15, 16a.