DI BAYBUL IN ANSA TO SƆM KWƐSTYƆN DƐN

Udat rili de rul dis wɔl?

Bɔku pipul dɛn fil se na Gɔd de rul dis wɔl. Bɔt if dat na tru, yu tink se pipul dɛn go de sɔfa so na di wɔl? (Ditarɔnɔmi 32:4, 5) Di Baybul se na wan wikɛd pɔsin de rul di wɔl.—Rid Jɔn In Fɔs Lɛta 5:19.

Aw dat apin? We Gɔd bin jɔs mek mɔtalman, wan enjɛl bin tɔn in bak pan Gɔd, ɛn dis enjɛl bin mek di fɔs man ɛn uman dɛnsɛf tɔn dɛn bak pan Gɔd. (Jɛnɛsis 3:1-6) Di fɔs man ɛn uman bin disayd fɔ obe dis enjɛl we na Setan, so dis bin mek i bigin fɔ rul dɛn. Bɔt na Papa Gɔd nɔmɔ gɛt di rayt fɔ rul, bɔt pan ɔl dat, i nɔ de fos pipul dɛn fɔ lɛ i rul dɛn; i want mek dɛn chuz am as dɛn rula bikɔs dɛn lɛk am. (Ditarɔnɔmi 6:6; 30:16, 19) I sɔri fɔ no se Setan dɔn ful plɛnti pipul dɛn fɔ tɔn dɛn bak pan Gɔd, jɔs lɛk aw i bin du to di fɔs man ɛn uman.—Rid Rɛvɛleshɔn 12:9.

Udat go sɔlv mɔtalman in prɔblɛm dɛn?

Yu tink se Gɔd go alaw Setan we wikɛd so, fɔ kɔntinyu fɔ rul mɔtalman? Nɔ, i nɔ go du dat! Bifo dat, Gɔd go yuz Jizɔs fɔ stɔp ɔl di bad tin dɛn we Setan bin dɔn de du ɛn mek ɔltin fayn bak fɔ mɔtalman.—Rid Jɔn In Fɔs Lɛta 3:8.

Gɔd go gi Jizɔs di pawa fɔ dɔnawe wit Setan. (Lɛta Fɔ Rom 16:20) Dɔn Gɔd go rul mɔtalman, ɛn i go mek dɛn de wit gladi at ɛn pis jɔs lɛk aw i bin want dɛn fɔ de.—Rid Rɛvɛleshɔn 21:3-5.