DI TƆPIK NA DI FRƆNT PEJ | YU TINK SE GƆD BISIN BƆT YU?
Gɔd Want Lɛ Yu Bi In Padi
“Nɔbɔdi nɔ go kam to mi pas mi Papa we sɛn mi briŋ di pɔsin kam to mi.”—JƆN 6:44.
WETIN MEK SƆM PIPUL DƐN DE DAWT? Bɔku pipul dɛn we biliv Gɔd, kin fil se dɛn de fa frɔm Gɔd. Wan uman we kɔmɔt na Ayriland, we nem Kristina, bin de go chɔch ɛvri wik. Dis uman bin tɔk se: “A jɔs bin de si Gɔd as di Pɔsin we mek ɔltin. Bɔt a nɔ bin no am. A nɔ wande fil se a de nia Gɔd.”
WETIN GƆD IN WƆD SE? We wi kin fil se wi de fa frɔm Jiova, Jiova kin stil tray fɔ ɛp wi fɔ no am. Jizɔs bin gi wan ɛgzampul we sho aw Gɔd bisin bɔt wi. I bin se: “If wan man gɛt wan ɔndrɛd ship, ɛn wan pan di ship dɛn lɔs, di man nɔ go lɛf di naynti-nayn ship na di il, ɛn tɔn bak go luk fɔ di wan ship we lɔs?” Wetin na di lɛsin? I bin kɔntinyu fɔ se: “Semwe so, una Papa we de na ɛvin nɔ want mek ɛni wan pan dɛn lili pikin we biliv pan Jizɔs, lɔs.”—Matyu 18:12-14.
Gɔd valyu “ɛni wan pan dɛn lili pikin” ya. Aw Gɔd kin ‘luk fɔ pɔsin we dɔn lɔs’? Frɔm di skripchɔ we wi tɔk bɔt ɔp, wi si se na Jiova de briŋ pipul dɛn kam to am.
Udat dɛn tide de go prich bɔt Gɔd to pipul dɛn na dɛn os, na strit, ɛn ɔdasay dɛn?
Udat dɛn tide de go prich bɔt Gɔd to pipul dɛn na dɛn os, na strit, ɛn ɔdasay dɛn?
Lɛ wi si sɔm ɛgzampul dɛn we de sho aw Gɔd dɔn briŋ pipul dɛn we rili want fɔ no am. Di tɛm we di apɔsul dɛn bin de, Gɔd bin sɛn wan pan di disaypul dɛn we nem Filip, fɔ go mit wan Itiopian bigman we bin de rid wan tin we di prɔfɛt Ayzaya bin rayt. Filip bin ɛp am fɔ ɔndastand wetin i de rid. (Di Apɔsul Dɛn Wok [Akt] 8:26-39) Leta, Gɔd bin tɛl di apɔsul Pita fɔ go fɛn wan Roman sojaman we bin nem Kɔnilyɔs. Dis man bin de pre ɔltɛm ɛn i bin de tray tranga wan fɔ wɔship Gɔd. (Di Apɔsul Dɛn Wok [Akt] 10:1-48) Gɔd bin mek di apɔsul Pɔl ɛn in kɔmpin dɛn go na wan riva we de nia wan tɔŋ we dɛn kɔl Filipay. We dɛn go de, dɛn mit wan “uman we bin fred Gɔd.” Di uman bin nem Lidia ɛn ‘Jiova mek i lisin gud wan to wetin Pɔl tɔk.’—Di Apɔsul Dɛn Wok [Akt] 16:9-15.
Ɔl dɛn ɛgzampul ya de sho se Jiova de mek shɔ se di wan dɛn we de luk fɔ am, gɛt di chans fɔ sabi am. Udat dɛn tide de go prich bɔt Gɔd to pipul dɛn na dɛn os, na strit, ɛn ɔdasay dɛn? Bɔku pipul dɛn go se, “Na Jiova Witnɛs dɛn.” Aks yusɛf dis kwɛstyɔn, ‘Fɔ se Gɔd de yuz dɛn fɔ lɛ mi ɛn in bi padi?’ Wi de beg yu fɔ pre to Gɔd fɔ lɛ i ɛp yu fɔ kam nia am.a
a If yu want fɔ no mɔ, na fɔ wach wan fim we dɛn kɔl Wetin Mek I Fayn fɔ Stɔdi di Baybul? Dis fim de na www.jw.org/kri.