Mama ɛn Papa dɛn—Una Mɛn Una Pikin dɛn di We Aw Jiova Want

1, 2. (a) Wetin na sɔm wok dɛn we di shɛpad dɛn na Izrɛl bin de du? (b) Aw mama ɛn papa dɛn tan lɛk shɛpad?

NƆTO izi wok di shɛpad dɛn na Izrɛl bin de du. Dɛn bin gɛt fɔ bia we di san wam ɛn we di ples kol. Bɔt nɔto dat nɔmɔ, dɛn bin gɛt fɔ protɛkt dɛn ship dɛn frɔm animal ɛn mɔtalman dɛn we go want fɔ kil dɛn. Shɛpad dɛn kin wach dɛn ship dɛn ɔltɛm fɔ no uswan sik ɔ wund so dat dɛn go ebul fɔ mɛn dɛn. Dɛn kin pe atɛnshɔn mɔ to di smɔl pikin ship dɛn bikɔs dɛn wik ɛn dɛn nɔ gɛt bɛtɛ trɛnk lɛk di big ship dɛn.—Jɛn. 33:13.

² Mama ɛn papa dɛn we na Kristian, tan lɛk shɛpad bikɔs dɛn kin du sɔm tin dɛn we shɛpad dɛn kin du. Mama ɛn papa dɛn gɛt di wok “fɔ kɔrɛkt” dɛn pikin dɛn ɛn “tich dɛn di we aw Jiova want.” (Ɛfi. 6:4) Yu tink se dis na izi wok? Nɔ, nɔto izi wok atɔl! Pikin dɛn kin mitɔp ɔlkayn bad tin we Setan de briŋ kam na dis wɔl, ɛn bikɔs dɛn nɔ pafɛkt, i nɔ kin izi fɔ dɛn. (2 Tim. 2:22; 1 Jɔn 2:16) If yu na mama ɔ papa, aw yu go ebul fɔ ɛp yu pikin dɛn? Naw, lɛ wi tɔk bɔt tri tin dɛn we go ɛp mama ɛn papa dɛn fɔ mɛn dɛn pikin dɛn di we aw Jiova want. (1) Dɛn fɔ no dɛn pikin dɛn, (2) dɛn fɔ fid dɛn pikin dɛn wit Gɔd in wɔd, ɛn (3) dɛn fɔ gayd dɛn pikin dɛn.

NO YU PIKIN DƐN

3. Aw mama ɛn papa dɛn go ebul fɔ “no” dɛn pikin dɛn?

³ Shɛpad we lɛk in ship dɛn de tek tɛm wach dɛn ɔl fɔ mek shɔ se dɛn gɛt wɛlbɔdi. Mama ɛn papa dɛnsɛf fɔ du dis sem tin to dɛn pikin dɛn. Di Baybul se: “Yu fɔ no di ship dɛn we yu de mɛn, gud gud wan.” (Prɔv. 27:23) Fɔ lɛ mama ɛn papa dɛn no dɛn pikin dɛn, dɛn nid fɔ no aw dɛn pikin dɛn de biev ɛn aw dɛn de tink ɛn fil. Aw mama ɛn papa dɛn go ebul fɔ no ɔl dɛn tin ya? Wan pan di bɛst we we mama ɛn papa dɛn go ebul fɔ no dɛn pikin dɛn, na we dɛn de tɔk wit dɛn ɔltɛm.

4, 5. (a) Wetin mama ɛn papa dɛn go du fɔ mek dɛn pikin dɛn fil fri fɔ tɔk to dɛn? (Luk di pikchɔ nia dis atikul in taytul.) (b) Wetin yu dɔn du fɔ mek yu pikin dɛn fil fri fɔ tɔk to yu?

⁴ Sɔm mama ɛn papa dɛn dɔn tɔk se i nɔ kin izi fɔ tɔk to dɛn pikin dɛn we dɛn kin dɔn pas 12 ia. Dɛn se dɛn pikin dɛn kin kip to dɛnsɛf ɛn dɛn kin shem fɔ tɔk bɔt aw dɛn de tink ɛn fil. If na so i de bi wit yu pikin, wetin yu go du? Nɔ fos yu pikin fɔ kam sidɔm we yu want fɔ tɔk bɔt siriɔs tin to am, bifo dat, i go fayn lɛ yu tɔk to yu pikin we una de du ɔda tin dɛn. (Dyut. 6:6, 7) Mama ɛn papa dɛn fɔ tray fɔ mek dɛn ɛn dɛn pikin dɛn du difrɛn difrɛn tin dɛn togɛda. Dɛn fɔ waka wit dɛn, ple wit dɛn, ɔ du sɔm os wok dɛn togɛda. We mama ɛn papa dɛn de du ɔl dɛn tin ya, dɛn pikin dɛn go fil fri fɔ tɛl dɛn wetin de na dɛn at.

⁵ Lɛ wi se yu dɔn du ɔl dɛn tin ya, bɔt yu pikin stil nɔ de fil fri fɔ tɔk to yu, wetin yu go du? Tray fɔ du ɔda tin. Fɔ ɛgzampul, bifo yu aks yu gyal pikin: “Wetin apin to yu?” Ɔ “wetin yu du tide?,” tɛl am bɔt wetin apin to yu ɔ wetin yu du tide. Dat go mek i fil fri fɔ tɛl yu bɔt wetin apin to am ɔ wetin i du da de de. Ɔ if yu want fɔ no wetin yu pikin tink bɔt sɔm tɔpik dɛn lɛk smok ɔ tif, nɔ aks am kwɛstyɔn dɛn we go mek i fil se na in yu want fɔ no bɔt, bifo dat, aks am aw in padi dɛn fil bɔt dɛn tin dɛn de. Dɔn yu kin aks us advays we in go gi to in padi dɛn.

6. Aw yu pikin dɛn go no se yu na pɔsin we rɛdi fɔ lisin to dɛn ɛn yu izi fɔ tɔk to?

⁶ Fɔ lɛ yu pikin dɛn fil fri fɔ tɔk to yu, dɛn fɔ si yu as pɔsin we rɛdi fɔ lisin to dɛn ɛn izi fɔ tɔk to. We mama ɛn papa dɛn nɔ gɛt tɛm fɔ tɔk to dɛn pikin dɛn, dat kin mek di pikin dɛn kip dɛn prɔblɛm to dɛnsɛf. Aw mama ɛn papa dɛn go sho se dɛn izi fɔ tɔk to? Nɔto fɔ jɔs tɛl di pikin dɛn se: “Una kin kam to mi ɛnitɛm fɔ tɔk.” Yu pikin dɛn nid fɔ si am pan yu se yu nɔ go vɛks we dɛn tɛl yu dɛn prɔblɛm ɛn dɛn fɔ si se dɛn prɔblɛm impɔtant to yu. Bɔku mama ɛn papa dɛn de we de du dis. Wan 19 ia ol titi we nem Kela, bin tɔk se: “A kin fil fri fɔ tɛl mi papa bɔt ɛnitin. I nɔ de kɔt wɔd na mi mɔt we a de tɔk to am, i nɔ de jɔj mi; i kin jɔs lisin. Ɛn i kin gi mi gud advays ɔltɛm.”

7. (a) Aw mama ɛn papa dɛn go tɔk to dɛn pikin dɛn bɔt bɔy frɛnd ɛn gal frɛnd biznɛs? (b) Aw mama ɛn papa dɛn kin mek dɛn pikin dɛn fil bad?

⁷ We yu de tɔk to yu pikin dɛn bɔt sɔm tin we nɔ kin izi fɔ tɔk bɔt, lɛk bɔy frɛnd ɛn gal frɛnd biznɛs, tek tɛm lɛ yu nɔ lɛf fɔ wɔn dɛn te yu fɔgɛt fɔ tɛl dɛn di rayt tin we dɛn fɔ du. Fɔ ɛgzampul: Lɛ wi se yu go na wan rɛstɔrant fɔ go it, dɔn dɛn gi yu wan pepa we de sho di difrɛn difrɛn it dɛn we dɛn gɛt. Bɔt dɛn rayt de se ɔl di it dɛn na di rɛstɔrant gɛt pɔyzin. Wetin yu go du? Yu go mɔs kɔmɔt na da rɛstɔrant de ɛn luk fɔ ɔda wan. Na di sem tin yu pikin dɛn go du if na wɔn nɔmɔ yu de wɔn dɛn ɛnitɛm we dɛn kam to yu fɔ advays. Dɛn go fil bad ɛn stɔp fɔ kam to yu fɔ advays. (Rid Lɛta Fɔ Kɔlɔse 3:21.) So fɔ lɛ dat nɔ apin, yu fɔ no aw fɔ advays yu pikin. Wan yɔŋ sista we nem Ɛmili bin tɔk se: “We mi mama ɛn papa kin tɔk to mi bɔt bɔy frɛnd biznɛs, dɛn nɔ kin mek lɛk se na bad bad tin. Dɛn kin tɛl mi bɔt aw pɔsin kin fil fayn we i de tray fɔ no di pɔsin we i go want fɔ mared. Dis dɔn ɛp mi fɔ fil fri fɔ tɔk to dɛn bɔt dɛn kayn tin dɛn de. Infakt, a want fɔ mek dɛn no bɔt ɛni bɔy frɛnd we a go gɛt. A nɔ go ayd am pan dɛn.”

8, 9. (a) Wetin mek i fayn fɔ lisin to yu pikin we i de tɔk ɛn nɔ kɔt wɔd na in mɔt? (b) Us bɛnifit yu dɔn gɛt we yu de lisin to yu pikin?

⁸ Jɔs lɛk wetin Kela bin se bɔt in papa, yu kin sho se yu na pɔsin we izi fɔ tɔk to bay we yu de tek tɛm fɔ lisin to yu pikin dɛn. (Rid Jems 1:19.) Wan uman we nem Katya, ɛn we nɔ gɛt man, bin tɔk se: “A nɔ bin de peshɛnt fɔ lisin to mi pikin. A nɔ bin de alaw am fɔ ɛksplen wetin i want fɔ tɔk. A kin taya fɔ lisin to am, ɔ a nɔ bin jɔs want fɔ mek i ambɔg mi. Naw we a dɔn chenj di we aw a de biev to am, mi pikin sɛf dɔn chenj. Naw i de biev fayn ɛn i kin fil fri fɔ tɔk to mi.”

⁹ Dis sem tin bin dɔn apin to wan man we nem Rɔnald. Rɔnald gɛt wan gyal pikin we ol 16 ia. Rɔnald se: “We mi gyal pikin bin tɛl mi se i dɔn gɛt bɔy frɛnd na skul, a bin vɛks fɔs we i tɛl mi. Bɔt leta we a mɛmba aw Jiova kin peshɛnt wit wi ɛn aw i kin sho se i rɛdi fɔ lisin to in savant dɛn, a si am se i go fayn fɔ gi mi pikin di chans fɔ tɔk bɔt aw i de fil bifo a tray fɔ kɔrɛkt am. A gladi we a du dis! Bikɔs dis na bin di fɔs tɛm we a ebul fɔ ɔndastand aw mi pikin de fil. We i dɔn fɔ tɔk, i mek am izi fɔ mi fɔ tɔk to am fayn wan. A bin sɔprayz we i fala di advays we a gi am. Ɛn i tɛl mi wit ɔl in at se i go chenj di we aw i de biev.” We mama ɛn papa dɛn de tɔk to dɛn pikin dɛn ɔltɛm, i go mek dɛn no aw dɛn pikin dɛn de tink ɛn fil. Ɛn dat go mek yu ebul fɔ ɛp dɛn fɔ disayd fɔ du di rayt tin.a

FID YU PIKIN WIT GƆD IN WƆD

10, 11. Aw yu go ɛp yu pikin dɛn so dat dɛn padi biznɛs wit Jiova nɔ go pwɛl?

¹⁰ Shɛpad we lɛk in ship dɛn no se ɛniwan pan in ship dɛn kin lɛf di ɔda wan dɛn ɛn go fa say. Aw dat kin apin? Sɔntɛm i kin si fayn gras we de fa say smɔl, dɔn i go de fɔ it am, we i si ɔda fayn gras bak, i go de, na so i go de go smɔl smɔl te i lɔs pan in kɔmpin ship dɛn. Na di sem tin kin apin to pikin dɛn. Smɔl smɔl, dɛn kin put an pan tin dɛn we kin pwɛl dɛn padi biznɛs wit Jiova. Fɔ ɛgzampul, dɛn kin put an pan bad padi ɔ ɛnjɔy dɛnsɛf di we aw Jiova nɔ want. (Prɔv. 13:20) Aw yu go ebul fɔ ɛp yu pikin dɛn fɔ lɛ dɛn kayn tin ya nɔ apin to dɛn?

¹¹ As yu notis se yu pikin gɛt sɔm say dɛn we i nɔ de du wɛl, na fɔ ɛp am wantɛm wantɛm. Ɛn tray bak fɔ ɛp am na di say dɛn we i de du wɛl. (2 Pit. 1:5-8) Di Famili Wɔship we una kin gɛt ɔltɛm na fayn tɛm fɔ mek yu du dis. We di Ɔktoba 2008 Kiŋdɔm Ministri bin de tɔk bɔt famili wɔship, i bin se: “Papa dɛn fɔ tek di wok we Jiova dɔn gi dɛn siriɔs, dɛn fɔ mek shɔ se di Famili Wɔship bɛnifit ɔlman na di famili, ɛn dɛn fɔ mek shɔ se dɛn famili stɔdi di Baybul ɔltɛm.” Yu de yuz di Famili Wɔship fɔ mɛn yu pikin dɛn di we aw Jiova want? Wan tin we yu fɔ no na dat, yu pikin dɛn go rili gladi we yu de ɛp dɛn fɔ du wetin Jiova want.—Mat. 5:3; Fil. 1:10.

12. (a) Aw yɔŋ pipul dɛn dɔn bɛnifit frɔm di Famili Wɔship we dɛn kin gɛt ɔltɛm? (Tɔk bɔt di bɔks we se “Dɛn Gladi fɔ di Famili Wɔship.”) (b) Aw yusɛf dɔn bɛnifit frɔm famili wɔship?

¹² Wan 19 ia ol sista we nem Karisa bin tɔk bɔt aw di Famili Wɔship dɔn bɛnifit in ɛn in famili. I bin tɔk se: “A lɛk we wi ɔl kin sidɔm togɛda ɛn tɔk. We wi de du dis, wi de lɛk wisɛf mɔ, ɛn dis de mek wi gɛt gud tin dɛn fɔ de mɛmba. Mi papa de mek shɔ se wi gɛt di Famili Wɔship ɔltɛm. A rili gladi we mi papa tek di Famili Wɔship as siriɔs tin ɛn dat dɔn mek misɛf tek am as siriɔs tin. Dis dɔn mek a rɛspɛkt mi papa mɔ ɛn si am as sɔmbɔdi we de bifo fɔ ɛp di famili fɔ lan bɔt Jiova.” Wan yɔŋ sista we nem Britni bin tɔk se: “Famili wɔship dɔn ɛp mi fɔ kam nia mi mama ɛn papa mɔ. I dɔn ɛp mi fɔ no se mi mama ɛn papa want fɔ no bɔt mi prɔblɛm dɛn ɛn dɛn rili bisin bɔt mi. I de ɛp wi fɔ lɛk wisɛf mɔ, fɔ tinap tranga wan fɔ sav Jiova, ɛn fɔ gɛt wanwɔd na di famili.” Frɔm ɔl wetin dɛn yɔŋ pipul ya dɔn tɔk, wi dɔn si se i rili impɔtant fɔ tich yu pikin bɔt Jiova, ɛn famili wɔship na wan men tin we go ɛp yu fɔ du so.b

GAYD YU PIKIN DƐN

13. Wetin mama ɛn papa dɛn go du fɔ ɛp dɛn pikin dɛn fɔ sav Jiova?

¹³ Shɛpad we lɛk in ship dɛn kin yuz in tik fɔ sho in ship dɛn usay fɔ go ɛn protɛkt dɛn. Wan men tin we i kin du na fɔ kɛr in ship dɛn go “usay frɛsh gras de.” (Izi. 34:13, 14) Mama ɛn papa, una nɔ tink se unasɛf fɔ du dis sem tin? Yu go mɔs want fɔ gayd yu pikin dɛn fɔ sav Jiova. Yu go want fɔ mek yu pikin dɛn fil lɛk aw wan pan di man dɛn we rayt di Sam buk bin fil, we i rayt se: “O mi Gɔd, a de ɛnjɔy fɔ du wetin yu want, ɛn yu lɔ de rayt insay mi at.” (Sam 40:8) If yu pikin dɛn fil lɛk aw dis man bin fil, dɛn go gi dɛn layf to Jiova ɛn baptayz. Bɔt dɛn fɔ ɔndastand di tin dɛn we dɛn de lan bɔt Jiova bifo dɛn disayd fɔ baptayz, ɛn dɛn fɔ rili want fɔ sav Jiova.

14, 15. (a) Wetin mama ɛn papa dɛn we na Kristian fɔ du fɔ ɛp dɛn pikin dɛn? (b) Wetin kin mek sɔm yɔŋ wan dɛn dawt if dɛn de na di tru rilijɔn?

¹⁴ If yu dɔn du difrɛn difrɛn tin dɛn fɔ ɛp yu pikin, bɔt stil, yu pikin in padi biznɛs wit Jiova nɔ de go bifo, wetin yu go du? Nɔ giv ɔp. Tray tranga wan fɔ ɛp dɛn fɔ lɛk Jiova ɛn fɔ gladi fɔ ɔl wetin Jiova Gɔd dɔn du fɔ dɛn. (Rɛv. 4:11) Dɔn we dɛn dɔn rɛdi, dɛn go ebul fɔ disayd fɔ dɛnsɛf fɔ sav Gɔd.

¹⁵ Wetin yu go du if yu pikin dɛn dɔn bigin dawt if Jiova Witnɛs dɛn gɛt di trut? Aw yu go ebul fɔ ɛp yu pikin dɛn fɔ no se fɔ sav Jiova na di bɛst tin we dɛn go du na layf? Ɛp dɛn fɔ no se na dis go mek dɛn gɛt gladi at te go. Ɛn tray fɔ no wetin na di men tin we de mek dɛn dawt. Fɔ ɛgzampul, fɔ se na di tin dɛn we di Baybul de tich yu bɔy pikin nɔ gri wit, ɔ na maynd i nɔ gɛt fɔ tɔk bɔt wetin i biliv we i de bifo in kɔmpin dɛn? Fɔ se yu gyal pikin de dawt if i rili mek sɛns fɔ fala Gɔd in lɔ, ɔ i jɔs de fil se i nɔ gɛt nɔbɔdi fɔ mek padi wit, ɔ i de fil se pipul dɛn nɔ gɛt in tɛm?

16, 17. Aw mama ɛn papa dɛn go ɛp dɛn pikin dɛn fɔ disayd fɔ dɛnsɛf fɔ sav Jiova?

¹⁶ No mata wetin de mek yu pikin de dawt, yu go ebul fɔ ɛp am fɔ lɛf fɔ dawt. Aw yu go ebul fɔ ɛp am? Wan tin we dɔn ɛp bɔku mama ɛn papa dɛn na we dɛn de aks dɛn pikin dɛn kwɛstyɔn dɛn lɛk: “Yu tink se i izi fɔ bi Kristian? Wetin na di bɛnifit dɛn we pɔsin go gɛt we i bi Kristian? Wetin na di tin dɛn we yu go lɔs we yu bi Kristian? Yu tink se di tin dɛn we yu go lɔs naw go pas di bɔku bɛnifit dɛn we wi go gɛt naw ɛn tumara bambay? Wetin mek yu se so?” I go fayn mek yu aks yu pikin, dɛn kwɛstyɔn ya, bɔt nɔ aks am wɔd fɔ wɔd; tɔk am yu yon we. Ɛn yu fɔ du so di we we go sho se yu bisin bɔt am. Nɔ aks am lɛk se na in nɔ want fɔ sav Jiova. We una de tɔk, i go fayn mek yu tɔk bɔt Mak 10:29, 30. Dɔn yu kin ɛnkɔrej di pikin fɔ du wetin sɔm yɔŋ wan dɛn kin du. Dɛn kin rayt wetin dɛn go lɔs we dɛn bi Kristian ɛn di bɛnifit dɛn we dɛn go gɛt we dɛn bi Kristian. We yu si wetin i rayt, yu go ebul fɔ no wetin na in prɔblɛm dɛn ɛn ɛp am fɔ sɔlv dɛn. Tink bɔt dis: If yu kin go stɔdi ɔda pipul dɛn di Baybul Tich buk ɛn di ‘Gɔd Lɛk Yu’ buk, yu nɔ tink se yu fɔ stɔdi wit yu pikin dɛn mɔ? Yu de stɔdi wit yu pikin dɛn?

¹⁷ Tɛm go kam we yu pikin dɛn go disayd fɔ dɛnsɛf udat dɛn go sav. Nɔ fil se yu pikin go tek wetin yu biliv jɔs lɛk dat. I nɔ min se bikɔs yu na Jiova Witnɛs, yu pikin bak go bi Jiova Witnɛs wantɛm wantɛm. Dɛn fɔ disayd fɔ dɛnsɛf fɔ sav Jiova. (Prɔv. 3:1, 2) If yu pikin nɔ want fɔ du dat, tray fɔ stɔdi am bak dɛn simpul simpul tin dɛn. Ɛp am fɔ tink bɔt dɛn kwɛstyɔn ya: “Wetin mek yu biliv se Gɔd de? Wetin mek yu biliv se Jiova Gɔd rili valyu yu? Yu rili biliv se yu go bɛnifit we yu du wetin Jiova want?” Yu go ebul fɔ mɛn yu pikin dɛn di we aw Jiova want we yu de peshɛnt wit dɛn. Ɛn sho dɛn se fɔ sav Jiova na di bɛst tin we dɛn go du na layf.c—Rom 12:2.

18. Aw mama ɛn papa dɛn go ebul falamakata Jiova we na di Shɛpad we pas ɔl di ɔda shɛpad dɛn?

¹⁸ Ɔlman we na tru Kristian fɔ falamakata Jiova we na di Shɛpad we pas ɔl di ɔda shɛpad dɛn. (Ɛfi. 5:1; 1 Pit. 2:25) Bɔt na mama ɛn papa dɛn mɔ fɔ du dat, dɛn fɔ no dɛn pikin dɛn, ɛn du ɔl wetin dɛn ebul fɔ du fɔ ɛp dɛn pikin dɛn fɔ gɛt di blɛsin dɛn we Jiova dɔn kip fɔ dɛn. So mama ɛn papa dɛn, una kɔntinyu fɔ du ɔl wetin una ebul fɔ du fɔ mɛn una pikin dɛn di we aw Jiova want!