Wetin Mek Wi Fɔ Oli?
“Una fɔ oli.”—LƐV. 11:45.
1. Aw di Baybul buk we nem Lɛvitikɔs go ɛp wi?
DI WƆD “oli” de insay di Baybul buk we nem Lɛvitikɔs pas ɛni ɔda buk na di Baybul. Jiova se ɔl di wan dɛn we de wɔship am, fɔ oli. Fɔ lɛ wi go ebul fɔ du wetin Jiova se, i go fayn lɛ wi ɔndastand ɛn lɛk di Baybul buk we nem Lɛvitikɔs.
2. Wetin na sɔm tin dɛn we de na Lɛvitikɔs?
2 Na Mozis rayt di Baybul buk we nem Lɛvitikɔs. Ɛn Lɛvitikɔs na wan pan di buk dɛn na di Baybul we de tich wi tin dɛn we go bɛnifit wi. (2 Tim. 3:16) Jiova in nem de lɛk tɛn tɛm so insay ɔl di chapta dɛn na Lɛvitikɔs. If wi rili ɔndastand di tin dɛn we de na Lɛvitikɔs, i go ɛp wi lɛ wi nɔ du ɛnitin we go briŋ badnem pan Gɔd. (Lɛv. 22:32) We yu de rid Lɛvitikɔs, yu go si bɔku say we dɛn rayt “Mi na Jiova.” Dis na fɔ mɛmba wi se wi fɔ obe Gɔd. Insay dis atikul ɛn di ɔda wan, wi go lan fayn fayn tin dɛn we de na Lɛvitikɔs, we go ɛp wi fɔ oli we wi de wɔship Jiova.
WI FƆ OLI
3, 4. Wetin di was we dɛn bin was Erɔn ɛn in bɔy pikin dɛn, min? (Luk di pikchɔ nia dis atikul in taytul.)
3 Rid Lɛvitikɔs 8:5, 6. Jiova bin pik Erɔn fɔ bi ay prist na Izrɛl ɛn Erɔn in bɔy pikin dɛn fɔ bi prist dɛn fɔ di Izrɛlayt dɛn. Erɔn tinap fɔ Jizɔs Krays ɛn Erɔn in pikin dɛn tinap fɔ di anɔyntɛd Kristian dɛn we de fala Jizɔs. Fɔ se di was we dɛn bin was Erɔn min se dɛn bin gɛt fɔ klin Jizɔs? Nɔ, Jizɔs nɔ bin gɛt wan sin, i bin “pafɛkt,” so nid nɔ bin de fɔ lɛ dɛn klin am. (Ibru 7:26; 9:14) So di was we dɛn bin was Erɔn de sho se Jizɔs klin ɛn i de du wetin rayt ɔltɛm. Bɔt wetin i min we dɛn was Erɔn in bɔy pikin dɛn?
4 Di was we dɛn bin was Erɔn in bɔy pikin dɛn bin de sho di klin we dɛn gɛt fɔ klin di wan dɛn we dɛn dɔn pik fɔ bi prist na ɛvin. Yu tink se di baptayz we di anɔyntɛd Kristian dɛn baptayz gɛt sɔntin fɔ du wit di klin we dɛn bin klin Erɔn in bɔy pikin dɛn? Nɔ, di baptayz we pɔsin de baptayz nɔ de pul sin kɔmɔt pan am; bifo dat, i de sho se di pɔsin dɔn gi in layf to Jiova Gɔd wit ɔl in at. Gɔd de was di anɔyntɛd Kristian dɛn wit “in wɔd,” di Baybul, we min se dɛn fɔ du ɔl di tin dɛn we Krays bin de tich wit ɔl dɛn at. (Ɛfi. 5:25-27) Na dis go mek dɛn oli ɛn klin. Wetin wi go se bɔt di “ɔda ship dɛn”?—Jɔn 10:16.
5. Wetin mek wi go se Gɔd in Wɔd de klin di ɔda ship dɛn?
5 Erɔn in bɔy pikin dɛn nɔ tinap fɔ Jizɔs in ɔda ship dɛn we na di “bɔku bɔku pipul dɛn” we gɛt fɔ de na dis wɔl tumara bambay. (Rɛv. 7:9) Bɔt Gɔd in Wɔd de klin di ɔda ship dɛn ɛn mek dɛn oli. We di wan dɛn we gɛt di op fɔ liv na dis wɔl, kin rid bɔt aw Jizɔs in blɔd impɔtant ɛn gɛt pawa, dɛn kin biliv wetin dɛn rid ɛn wɔship Jiova “oli wan de ɛn nɛt.” (Rɛv. 7:13-15) Gɔd in Wɔd de klin di anɔyntɛd dɛn ɛn di ɔda ship dɛn ɔltɛm. So dis de mek dɛn de “biev fayn” ɔltɛm. (1 Pit. 2:12) Jiova kin gladi bad we i de si se di anɔyntɛd dɛn ɛn di ɔda ship dɛn klin ɛn gɛt wanwɔd. Ɛn i kin gladi bad we dɛn de lisin to Jizɔs we na dɛn Shɛpad!
6. Aw wi kin chɛk wisɛf?
6 Jiova bin se di prist dɛn na Izrɛl fɔ klin, so tide sɛf, Jiova in pipul dɛn fɔ klin. Wi Baybul stɔdi dɛn kin si se di ples dɛn we wi de wɔship Jiova, kin klin ɛn dɛn kin si bak se wi klin ɛn de drɛs fayn ɔltɛm. Di we aw di prist dɛn na Izrɛl bin klin, de mek wi no se ɛnibɔdi we de wɔship Jiova fɔ gɛt “klin at.” (Rid Sam 24:3, 4; Ayz. 2:2, 3.) Wi fɔ wɔship Gɔd wit klin maynd, klin at, ɛn klin bɔdi. Dis min se wi fɔ de chɛk wisɛf ɔltɛm. Sɔntɛm wi go si se wi nid fɔ pul an pan sɔm bad tin dɛn so dat wi go oli na Jiova in yay. (2 Kɔr. 13:5) Fɔ ɛgzampul, pɔsin we dɔn baptayz, bɔt we de wach dɛn rud rud pikchɔ dɛn bay wilful fɔ aks insɛf se, ‘A de sho se a oli we a de wach dɛn rud rud pikchɔ dɛn ya?’ Pɔsin lɛk dis fɔ mek dɛn ɛp am fɔ lɛf dis bad abit.—Jems 5:14.
OBE JIOVA FƆ SHO SE YU OLI
7. Us ɛgzampul Jizɔs sɛt we fiba di tin dɛn we apin na Lɛvitikɔs 8:22-24?
7 Bifo Erɔn ɛn in bɔy pikin dɛn bigin fɔ du di prist wok na Izrɛl, dɛn bin rɔb ship blɔd na dɛn rayt yes, dɛn big finga, ɛn dɛn big to. (Rid Lɛvitikɔs 8:22-24.) Dis blɔd we dɛn yuz bin de sho se di prist dɛn go tray tranga wan fɔ du dɛn wok wit ɔl dɛn at. Semweso, Jizɔs we na di Ay Prist, sɛt fayn ɛgzampul fɔ di anɔyntɛd dɛn ɛn di ɔda ship dɛn. I bin de lisin to di tin dɛn we Gɔd de tɛl am ɔltɛm. Jizɔs bin de du wetin Jiova want, ɛn i bin de waka di rayt we ɔltɛm.—Jɔn 4:31-34.
8. Wetin ɔlman we de wɔship Jiova fɔ du?
8 Anɔyntɛd Kristian dɛn ɛn Jizɔs in ɔda ship dɛn fɔ fala di fayn ɛgzampul we dɛn Ay Prist sɛt. Ɔl di wan dɛn we de wɔship Jiova fɔ du di tin dɛn we de na in Wɔd ɛn dɛn nɔ fɔ mek Jiova in spirit fil bad. (Ɛfi. 4:30) Dɛn fɔ waka stret wit Gɔd.—Ibru 12:13.
9. Wetin tri brɔda dɛn we dɔn wok wit Gɔvnin Bɔdi mɛmba dɛn fɔ lɔng tɛm dɔn se? Aw di tin dɛn we dɛn tɔk go ɛp yu fɔ kɔntinyu fɔ sho se yu oli?
9 Lɛ wi tɔk bɔt wetin tri brɔda dɛn we gɛt di op fɔ liv na dis wɔl ɛn we dɔn wok fɔ lɔng tɛm wit sɔm brɔda dɛn na di Gɔvnin Bɔdi bin se. Di fɔs wan se: “Dis wok rili spɛshal, bɔt di wok we a dɔn wok wit dɛn fɔ lɔng tɛm dɔn ɛp mi fɔ no se pan ɔl we Gɔd anɔynt dɛn wit in spirit, dɛn stil nɔ pafɛkt. Bɔt wan tin we a kin tray fɔ du ɔltɛm na fɔ obe di wan dɛn we de bifo na di ɔganayzeshɔn.” Di sɛkɔn brɔda se: “Di advays we de na skripchɔ dɛn lɛk Sɛkɔn Lɛta Fɔ Kɔrint 10:5 we se wi fɔ obe Krays, dɔn ɛp mi fɔ obe ɛn wok wit di wan dɛn we de bifo na di ɔganayzeshɔn. Dis dɔn ɛp mi fɔ du wetin dɛn se wit ɔl mi at.” Di tɔd brɔda se: “Fɔ lɛk wetin Jiova lɛk ɛn fɔ et wetin i et, ɛn fɔ tray ɔltɛm fɔ no wetin i want ɛn du wetin go mek i gladi, min se wi fɔ du wetin in ɔganayzeshɔn se ɛn obe di wan dɛn we i de yuz fɔ du wetin i want na di wɔl.” Dis brɔda bin kam fɔ no se brɔda Netan Nɔ we bin leta kam bi Gɔvnin Bɔdi mɛmba, bin gri wit wetin de na di 1925 Wach Tawa atikul we gɛt di taytul “Birth of the Nation.” Dis na bin atikul we ɔda brɔda dɛn nɔ bin gri wit. Dis bin mek dis brɔda kɔle brɔda Nɔ. We yu tink gud wan bɔt wetin dɛn tri brɔda ya dɔn tɔk, i go ɛp yu fɔ obe Gɔd ɛn sho se yu oli.
OBE DI LƆ WE GƆD GI BƆT BLƆD
10. Wetin mek i impɔtant fɔ obe di lɔ we Gɔd gi bɔt blɔd?
10 Rid Lɛvitikɔs 17:10. Jiova bin tɛl di Izrɛlayt dɛn se dɛn nɔ fɔ it “ɛnikayn blɔd.” Kristian dɛnsɛf nɔ fɔ gɛt ɛnitin fɔ du wit blɔd, ilɛksɛf na animal blɔd ɔ mɔtalman blɔd. (Akt 15:28, 29) Wi kin fred lɛ Gɔd nɔ vɛks pan wi ɛn pul wi na in kɔngrigeshɔn. Wi lɛk am ɛn want fɔ obe am. Wi dɔn mekɔp wi maynd se ilɛksɛf wi gɛt fɔ day, wi nɔ go ɛva obe pipul dɛn we nɔ no Jiova ɛn we nɔ want fɔ obe am. Na tru se, pipul dɛn go provok wi we wi nɔ gri fɔ tek blɔd, bɔt wi want fɔ obe Gɔd. (Jud 17, 18) Wetin go ɛp wi fɔ ‘mekɔp wi maynd’ nɔ fɔ it blɔd ɔ tek blɔd we wi sik?—Dyut. 12:23.
11. Wetin mek wi go se di De fɔ Fɔgiv Sin nɔto bin jɔs ɛmti sɛrimɔni?
11 Di we aw di ay prist na Izrɛl bin de yuz animal blɔd di De fɔ Fɔgiv Sin ɛp wi fɔ ɔndastand aw Gɔd de si blɔd. Di ay prist bin de yuz blɔd fɔ du spɛshal tin. I bin de yuz am fɔ beg fɔ di wan dɛn we bin want mek Jiova fɔgiv dɛn sin dɛn. I bin de sɛn sɛn di kaw ɛn got blɔd bifo di kɔba we de na di bɔks we bin gɛt di agrimɛnt. (Lɛv. 16:14, 15, 19) Dis tin we di ay prist bin de du bin mek we fɔ lɛ Jiova fɔgiv di Izrɛlayt dɛn sin. Apat frɔm dat, Jiova bin pas lɔ se ɛnibɔdi we kil animal fɔ it, fɔ tɔn di blɔd na grɔn ɛn kɔba am wit dɔti “bikɔs na insay di blɔd layf de.” (Lɛv. 17:11-14) Yu tink se ɔl dis na bin jɔs ɛmti sɛrimɔni? Nɔ. Di we aw di ay prist bin de yuz blɔd di De fɔ Fɔgiv Sin, ɛn di lɔ we bin se dɛn fɔ tɔn blɔd na grɔn de mɛmba wi bɔt wetin Jiova bin tɛl Noa ɛn in pikin dɛn bɔt blɔd. (Jɛn. 9:3-6) Jiova Gɔd bin tɛl dɛn se dɛn nɔ fɔ it blɔd. Wetin dis min fɔ Kristian dɛn?
12. Aw di lɛta we Pɔl rayt di Ibru Kristian dɛn sho se na blɔd de mek Gɔd fɔgiv wi sin dɛn?
12 We di apɔsul Pɔl bin de rayt to di Ibru Kristian dɛn bɔt di pawa we blɔd gɛt fɔ klin wi, i bin ɛksplen se: “Ɔnda di Lɔ, blɔd bin de klin bɔku bɔku tin, ɛn na blɔd nɔmɔ bin de mek Gɔd fɔgiv sin.” (Ibru 9:22) Pɔl bin tɔk bak se pan ɔl we animal sakrifays dɛn bin gɛt valyu, dɛn bin jɔs de mɛmba di Izrɛlayt dɛn se dɛn na sina dɛn ɛn dɛn nid sɔntin we go pul ɔl dɛn sin kɔmɔt pan dɛn. Fɔ tru, “di Lɔ bin de sho di gud tin dɛn we gɛt fɔ kam, bɔt nɔ bin min di rial tin dɛn.” (Ibru 10:1-4) Wetin go mek Gɔd fɔgiv wi sin dɛn?
13. Aw yu fil we Jizɔs gi in pafɛkt blɔd to Jiova?
13 Rid Lɛta Fɔ Ɛfisɔs 1:7. Di gi we Jizɔs gi in layf fɔseka wi min big tin to di wan dɛn we lɛk in ɛn in Papa. (Gal. 2:20) Bɔt na wetin Jizɔs bin du afta i day ɛn gɛt layf bak na in rili fri wi ɛn mek Gɔd de fɔgiv wi sin dɛn. Jizɔs bin du wetin di ay prist bin de du di De fɔ Fɔgiv Sin. Da de de, di ay prist kin tek sɔm blɔd pan di animal dɛn we dɛn dɔn kil ɛn go na di say we oli pas ɔl insay di tabanakul. Leta, we Sɔlɔmɔn bil di tɛmpul, di ay prist bin de go na di say we oli pas ɔl, ɛn gi di blɔd to Gɔd lɛk se na bifo Gɔd i de. (Lɛv. 16:11-15) Semweso, Jizɔs bin go na ɛvin ɛn gi Jiova in pafɛkt blɔd we i sakrifays fɔ wi. (Ibru 9:6, 7, 11-14, 24-28) Wi gladi we Gɔd de fɔgiv wi sin dɛn ɛn we wi gɛt klin kɔnshɛns bikɔs wi de sho se wi biliv pan Jizɔs in blɔd we i sakrifays fɔ wi!
14, 15. Wetin mek i impɔtant fɔ ɔndastand ɛn obe di lɔ we Jiova gi bɔt blɔd?
14 Yu dɔn si klia wan naw wetin mek Jiova se wi nɔ fɔ it ‘ɛni blɔd’? (Lɛv. 17:10) Yu dɔn ɔndastand di rizin we mek Gɔd si blɔd as sɔntin we oli? To am, blɔd na layf. (Jɛn. 9:4) Yu nɔ tink se wi fɔ si blɔd di we aw Gɔd de si am ɛn nɔ gɛt ɛnitin fɔ du wit am? Di tin nɔmɔ we go mek wi bi Gɔd in padi na we wi biliv se Jizɔs sakrifays in layf fɔ wi ɛn no se blɔd valyu na Gɔd in yay.—Kɔl. 1:19, 20.
15 Sɔntɛm sɔntin go apin to wi we go mek dɛn tɛl wi fɔ tek blɔd. Ɔ sɔntin go apin to wi fambul ɔ tayt padi we go mek dɛn tɛl dɛn fɔ tek blɔd. We dɛn kayn tin ya apin, wi kin gɛt fɔ disayd us tritmɛnt wi fɔ tek ɛn if wi fɔ tek mɛrɛsin we gɛt dɛn smɔl smɔl tin dɛn we de na di blɔd. So, i rili impɔtant fɔ lɛ wi stɔdi ɛn rɛdi wisɛf fɔ dɛn kayn tin ya we kin jɔs apin lɛk dat. We wi pre ɛn du dɛn tin ya, wi go ebul fɔ tinap tranga wan nɔ fɔ tek blɔd. Fɔ tru, wi nɔ go want fɔ du sɔntin we Jiova in Wɔd se wi nɔ fɔ du ɛn mek Jiova in at pwɛl! Bɔku dɔktɔ dɛn ɛn ɔda pipul dɛn kin beg wi fɔ gi wi blɔd fɔ sev layf. Bɔt Jiova in oli pipul dɛn no se na di Wan we mek dɛn, gɛt di rayt fɔ tɛl dɛn aw dɛn fɔ yuz blɔd. To Jiova, “blɔd” na sɔntin we oli. Wi fɔ mekɔp wi maynd fɔ obe di lɔ we Gɔd gi bɔt blɔd ɛn liv wi layf oli we. We wi du dis, wi de sho Jiova se wi rili valyu di pawa we Jizɔs in blɔd gɛt fɔ sev layf. Na Jizɔs in blɔd nɔmɔ de mek Gɔd fɔgiv wi sin dɛn ɛn gi wi layf we go de sote go.—Jɔn 3:16.
Yu dɔn mekɔp yu maynd fɔ obe di lɔ we Jiova gi bɔt blɔd? (Luk na paregraf 14, 15)
WETIN MEK JIOVA WANT MEK WI OLI?
16. Wetin mek Jiova in pipul dɛn fɔ oli?
16 We Gɔd bin de fri di Izrɛlayt dɛn we na bin slev dɛn na Ijipt, i bin tɛl dɛn se: “Mi na Jiova, di wan we de pul una kɔmɔt na Ijipt fɔ sho una se mi na Gɔd. Una fɔ oli, bikɔs a oli.” (Lɛv. 11:45) Jiova oli so i bin want lɛ di Izrɛlayt dɛnsɛf oli. As Jiova Witnɛs dɛn, wisɛf fɔ oli. Di Baybul buk we nem Lɛvitikɔs ɛp wi fɔ no dis klia wan.
17. Wetin yu go se bɔt di Baybul buk we nem Lɛvitikɔs?
17 Wi si se wi dɔn bɛnifit we wi dɔn tɔk bɔt sɔm tin dɛn we de na di Baybul buk we nem Lɛvitikɔs. I go mɔs bi se dis atikul dɔn mek yu valyu dis Baybul buk mɔ. We yu tink gud wan bɔt di fayn fayn tin dɛn we wi dɔn lan na Lɛvitikɔs, dat go ɛp yu fɔ ɔndastand mɔ bɔt wetin mek wi fɔ oli. Us ɔda fayn fayn tin dɛn wi go lan na Lɛvitikɔs? Aw Lɛvitikɔs go ɛp wi fɔ wɔship Jiova oli wan? Wi go ansa dɛn kwɛstyɔn ya insay wi nɛks atikul.