Yu Kin Tɔk to Gɔd?

Tayt padi dɛn kin tɔk to dɛnsɛf ɛnitɛm we dɛn gɛt chans. Dɛn kin tɔk fes-to-fes, yuz fon, imel, skayp, ɔ lɛta. So if wi want fɔ kam nia Gɔd, wi fɔ de tɔk to am ɔltɛm. Aw wi go ebul fɔ du dis?

Wi kin tɔk to Jiova we wi pre to am. Bɔt we wi de pre to Gɔd, i nɔ tan lɛk we wi de tɔk to wi kɔmpin. We wi de pre, wi fɔ no se wi de tɔk to di Pɔsin we mek wi, ɛn we de pantap ɔlman na di wan ol wɔl. So wi fɔ siriɔs we wi de pre ɛn pre wit rɛspɛkt. If wi want lɛ Gɔd yɛri wi prea, ɔda impɔtant tin dɛn de bak we wi fɔ du. Lɛ wi tɔk bɔt tri pan dɛn.

Fɔs, na to Jiova Gɔd nɔmɔ wi fɔ pre. Wi nɔ fɔ pre to Jizɔs, wi nɔ fɔ pre to “sent,” ɔ to aydɔl. (Ɛksodɔs 20:4, 5) Di Baybul tɛl wi klia wan se: “Una fɔ de pre ɛn beg Gɔd fɔ ɔltin ɛn tɛl am tɛnki; una fɔ mek Gɔd no di tin dɛn we una want.” (Lɛta Fɔ Filipay 4:6) Sɛkɔn, wi fɔ yuz Gɔd in Pikin in nem we wi de pre. Gɔd in Pikin nem Jizɔs Krays. Jizɔs insɛf bin tɔk se: “Nɔbɔdi nɔ go kam to di Papa pas i pas to mi.” (Jɔn 14:6) Tɔd, wi fɔ pre fɔ di tin dɛn we Gɔd want. Di Baybul se: “Ilɛk wetin wi aks am fɔ, i go yɛri wi, wans na dat i want.”a—Jɔn In Fɔs Lɛta 5:14.

Padi biznɛs nɔ go las if na wan pɔsin nɔmɔ de tɔk. Jɔs lɛk aw padi biznɛs kin go bifo we ɔl tu di padi dɛn de tɔk to dɛnsɛf, na so wi padi biznɛs wit Gɔd go go bifo if wi alaw Gɔd fɔ tɔk to wi ɛn wi lisin to am we i de tɔk. Yu no aw Gɔd de tɔk to wi?

Tide, Jiova Gɔd de yuz in Wɔd, di Baybul, fɔ “tɔk” to wi. (Sɛkɔn Lɛta To Timoti 3:16, 17) Wetin mek wi se so? Fɔ ɛp wi fɔ ɔndastand, lɛ wi se wan yu tayt padi rayt yu lɛta. Afta yu dɔn rid di lɛta, yu go mɔs gladi fɔ tɛl ɔda pipul dɛn se, “A jɔs yɛri frɔm mi padi!” Yu go se so pan ɔl we na rayt yu padi rayt yu, nɔto in vɔys yu yɛri. Semweso, we yu rid di Baybul, yu de alaw Jiova fɔ tɔk to yu. Na in mek Gina we wi bin tɔk bɔt na di fɔs atikul, bin tɔk se, “A tink se if a want fɔ mek Gɔd si mi as in padi, a fɔ rid in ‘lɛta’ we i dɔn rayt to wi, we na di Baybul.” I kɔntinyu fɔ tɔk se, “Di rid we a de rid di Baybul ɛvride dɔn mek a kam nia Gɔd mɔ ɛn mɔ.” Yu de alaw Jiova fɔ tɔk to yu ɔltɛm bay we yu de rid in Wɔd, di Baybul, ɛvride? If yu de du dat, i go ɛp yu fɔ kam nia Gɔd mɔ ɛn mɔ.