Di Day we Jizɔs Day ɛn Gɛt Layf Bak Wetin Dat Go Du fɔ Yu?

Gɔd nɔ mek mɔtalman fɔ day

“Jiova Gɔd tek di man ɛn put am na di gadin na Idɛn so dat i go wok de ɛn kia fɔ am. Ɛn Jiova Gɔd tɛl di man se: ‘Yu kin it frɔm ɔl di tik dɛn we de na di gadin te yu satisfay. Bɔt as fɔ di sɛns tik we de sho gud ɛn bad, yu nɔ fɔ it frɔm am, bikɔs di de we yu it frɔm am, natin nɔ go pwɛl am, yu go day.’”—Jɛnɛsis 2:15-17.

Gɔd bin put di fɔs man we na Adam na di gadin we bin de na Idɛn. Na dis wɔl ya di gadin bin de. Gɔd bin mek am fayn fayn wan, i bin put bɔku animal dɛn de ɛn put fayn fayn tin dɛn de fɔ it. Ɛn tik dɛn bin de de we de bia ɔlkayn frut dɛn we Adam fɔ de it. Bɔt Jiova Gɔd bin tɛl Adam klia wan se i nɔ fɔ it frɔm wan patikyula tik, i wɔn Adam se if i it frɔm am i go day.

Adam bin no wetin na day? Yɛs, i bin no wetin na day, bikɔs i bin dɔn si we animal dɛn de day. If Gɔd bin mek Adam fɔ day, dat min se da wɔn we i bin wɔn am na fɔ natin. Bifo dat, Adam bin no se if i obe Gɔd ɛn nɔ it frɔm di tik, i go de sote go, i nɔ go day.

Sɔm pipul dɛn biliv se di tik na mami ɛn dadi biznɛs, bɔt nɔto so i bi, bikɔs Jiova bin want Adam ɛn in wɛf we na Iv, fɔ “bɔn pikin dɛn te” dɛn “bɔku ɛn ful-ɔp di wɔl ɛn mek am fayn.” (Jɛnɛsis 1:28) So dis tik we Jiova tɛl dɛn nɔ fɔ it frɔm na rial tik, nɔto mami ɛn dadi biznɛs. Jiova kɔl am “di sɛns tik we de sho gud ɛn bad.” Dis tik bin de sho se na Jiova gɛt di rayt fɔ tɛl mɔtalman wetin gud ɛn wetin bad. If Adam nɔ bin it di frut we bin de na di tik, i bin fɔ dɔn sho se i de obe Gɔd ɛn i fɔ dɔn sho bak se i gladi fɔ di Pɔsin we mek am ɛn we blɛs am wit ɔl di tin dɛn we i de ɛnjɔy.

Adam day bikɔs i nɔ bin obe Gɔd

“[Gɔd] tɛl Adam se: ‘Bikɔs yu . . . it di frut we a bin dɔn tɛl yu se, yu nɔ fɔ it, . . . yu go swɛt bifo yu it bred te yu go bak na di dɔti, bikɔs na dɔti yu kɔmɔt. Yu na dɔti ɛn na dɔti bak yu go go.’”—Jɛnɛsis 3:17, 19.

Adam it di frut we Gɔd bin dɔn tɛl am nɔ fɔ it. Dis tin we Adam bin du na bin bad bad tin. Adam tɔn in bak pan Jiova, ɛn i sho se i nɔ gladi fɔ ɔl di gud tin dɛn we Jiova dɔn du fɔ am. We Adam it di frut, i sho se i nɔ want lɛ Jiova tɛl am wetin fɔ du, i bin want fɔ de fɔ insɛf, ɛn dat bin kam wit siriɔs prɔblɛm dɛn.

Adam bin ɛnd ɔp fɔ day, jɔs lɛk aw Jiova bin dɔn tɔk. Gɔd bin yuz “di dɔti we de na grɔn” fɔ mek Adam, ɛn i bin tɛl am se i go go bak “na dɔti.” Adam nɔ bin kɔntinyu fɔ liv wit ɔda bɔdi ɔ go liv ɔdasay. We i day, i nɔ bin gɛt layf jɔs lɛk aw di dɔti we Gɔd tek mek am nɔ gɛt layf.—Jɛnɛsis 2:7; Ɛkliziastis 9:5, 10.

Wi de day bikɔs wi kɔmɔt frɔm Adam

“Na wan man briŋ sin na di wɔl ɛn sin briŋ day, so day de mit ɔlman bikɔs ɔlman dɔn sin.”—Lɛta Fɔ Rom 5:12.

Di sin we Adam sin bin briŋ kam bɔku prɔblɛm we de mit ɔlman. We Adam sin, i lɔs di chans we i bin gɛt fɔ de sote go. Apat frɔm dat, i lɔs di pafɛkt layf we i bin gɛt ɛn dis dɔn mek ɔl in pikin dɛn nɔ pafɛkt.

Wi ɔl kɔmɔt frɔm Adam. So wi nɔn nɔ pafɛkt bikɔs Adam dɔn mek wi ɔl de sin ɛn day. Pɔl bin tɔk bɔt dis prɔblɛm we dɔn mit wi. I bin tɔk se: “Mi na mɔtalman, dɛn dɔn sɛl mi to sin. Mi na man we sɔri! Udat go sev mi frɔm dis bɔdi we de mek a day?” Pɔl bin ansa dis kwɛstyɔn we i se: “A tɛl Gɔd tɛnki tru Jizɔs Krays we na wi Masta!”—Lɛta Fɔ Rom 7:14, 24, 25.

Jizɔs bin gi in layf so dat wi go de sote go

“Di Papa dɔn sɛn in Pikin fɔ kam sev di wɔl.”—Jɔn In Fɔs Lɛta 4:14.

Jiova Gɔd dɔn mek we fɔ pul wi kɔmɔt pan sin so dat wi nɔ go day sote go. Aw i du dat? I sɛn in Pikin we i lɛk fɔ kam na dis wɔl. I mek dɛn bɔn am as pafɛkt mɔtalman jɔs lɛk Adam. Adam bin sin, bɔt Jizɔs “nɔ wande sin.” (Pita In Fɔs Lɛta 2:22) Bikɔs Jizɔs bin pafɛkt, i nɔ bin fɔ dɔn day, i fɔ dɔn liv as pafɛkt mɔtalman sote go.

Bɔt stil, Jiova bin alaw Jizɔs in ɛnimi dɛn fɔ kil am. Afta tri dez, Jiova bin gi am layf bak as spirit so dat i go go bak na ɛvin. We Jizɔs go na ɛvin, i go gi Gɔd in pafɛkt layf we i bin dɔn sakrifays, so dat i go pe fɔ di pafɛkt layf we Adam dɔn lɔs fɔ insɛf ɛn in pikin dɛn. Jiova bin tek di sakrifays, ɛn dis bin mek am pɔsibul fɔ lɛ ɔl di wan dɛn we sho se dɛn biliv pan Jizɔs gɛt layf we go de sote go.—Lɛta Fɔ Rom 3:23, 24; Jɔn In Fɔs Lɛta 2:2.

So Jizɔs bin bay bak wetin Adam bin dɔn lɔs. I day fɔ wi so dat wi go de sote go. Di Baybul tɔk se: “Jizɔs . . . sɔfa ɛn day, ɛn bikɔs Gɔd de du gud tin to wi we wi nɔ fit fɔ gɛt, i alaw Jizɔs fɔ day fɔ ɔlman.”—Di Ibru Pipul Dɛn 2:9.

Dis tin we Jiova du mek wi no bɔku tin bɔt am. Bikɔs Jiova de du wetin rayt ɔltɛm, na pafɛkt mɔtalman nɔmɔ go ebul fɔ sev wi, so no mɔtalman nɔ go ebul fɔ sev in kɔmpin mɔtalman bikɔs wi ɔl de sin. Bɔt bikɔs Jiova gɛt lɔv ɛn sɔri-at, i mek in Pikin kam day fɔ pe fɔ wi sin pan ɔl we i nɔ bin izi fɔ am.—Lɛta Fɔ Rom 5:6-8.

Jizɔs bin gɛt layf bak, so ɔda pipul dɛn we dɔn day go gɛt layf bak

“Krays dɔn gɛt layf bak, na in na di fɔs pɔsin we dɔn gɛt layf bak pan ɔl di wan dɛn we dɔn day. Ɛnti na wan man briŋ day kam, so na wan man bak go mek di wan dɛn we dɔn day gɛt layf bak. Jɔs lɛk aw Adam dɔn mek ɔlman de day, na so Krays go mek ɔlman gɛt layf.”—Fɔs Lɛta Fɔ Kɔrint 15:20-22.

Na tru se Jizɔs bin kam na di wɔl ɛn day, bɔt ɛnitin de we go sho se i gɛt layf bak? Wan pan di tin dɛn we sho se Jizɔs bin rili gɛt layf bak, na we i bin apia to bɔku bɔku pipul dɛn. Ɛn nɔto wan tɛm nɔmɔ i bin du dat, i bin du am difrɛn difrɛn tɛm ɛn difrɛn difrɛn say dɛn. Wan tɛm, i apia to pipul dɛn we pas 500. Di apɔsul Pɔl bin tɔk bɔt dat insay in lɛta we i bin rayt to di Kristian dɛn we bin de na Kɔrint. I bin tɔk se sɔm pan di pipul dɛn we bin si Jizɔs afta we i gɛt layf bak, bin stil de alayf. Pɔl bin de tray fɔ tɔk se dɛn pipul ya go ebul fɔ tɔk bɔt wetin dɛn si ɛn yɛri.—Fɔs Lɛta Fɔ Kɔrint 15:3-8.

So we Pɔl bin rayt se Krays na di “fɔs pɔsin” we gɛt layf bak, i bin de tray fɔ sho se ɔda pipul dɛn we dɔn day go gɛt layf bak. Jizɔs insɛf bin tɔk se tɛm go kam we “ɔl di wan dɛn we de na di grev” go “grap.”—Jɔn 5:28, 29.

If wi want fɔ de sote go, wi fɔ sho se wi biliv pan Jizɔs

“Gɔd so lɛk di wɔl dat i gi in wangren Pikin, so dat ɛnibɔdi we sho se i biliv pan am nɔ go day, bɔt i go gɛt layf we go de sote go.”—Jɔn 3:16.

Di fɔs buk na di Baybul tɛl wi wetin mek wi de day ɛn i tɛl wi bak wetin mek di wɔl nɔto Paradays igen. Di las buk na di Baybul tɛl wi bɔt di tɛm we day nɔ go de igen ɛn di tɛm we Gɔd go tɔn di wan ol wɔl to Paradays. Da tɛm de, pipul dɛn go ebul fɔ de sote go wit gladi at. Rɛvɛleshɔn 21:4 tɔk se: “Day nɔ go de igen.” Fɔ sho se dis na tru, vas 5 tɔk se: “Dɛn wɔd ya na tru ɛn dɛn go mɔs bi.” Jiova ebul fɔ du ɛnitin we i prɔmis.

Yu biliv se “dɛn wɔd ya na tru ɛn dɛn go mɔs bi”? If yu biliv, lan mɔ bɔt Jizɔs Krays, ɛn sho se yu biliv pan am. If yu du so, Jiova go gladi fɔ yu. I go blɛs yu naw ɛn i go ivin mek yu de sote go na dis wɔl we i go dɔn bi Paradays. Da tɛm de, “day nɔ go de igen, munin nɔ go de igen, kray nɔ go de igen,” ɛn “pen nɔ go de igen.”