Di Baybul In Ansa To Sɔm Kwɛstyɔn Dɛn
Yu tink se Gɔd mek wi fɔ lɛ dɛn jɔs bɔn wi, wi ol, dɔn wi day?
sɔntɛnde, yu kin fil se layf shɔt?
HYu dɔn ɛva wɔnda if di layf we yu de liv na in dɔn so, dat na fɔ ple, wok, mared, bɔn pikin, ɛn ol? (Job 14:1, 2) Di Baybul sho se ivin pipul dɛn we rili gɛt sɛns bin dɔn tink bɔt dis.—Rid Ɛkliziastis 2:11.
Wi layf gɛt ɛni minin? Fɔs, i go fayn lɛ wi aks, Aw layf bigin? Bɔku pipul dɛn dɔn kam fɔ si se di we aw wi bren ɛn wi bɔdi de wok rili wɔndaful ɛn dis dɔn mek dɛn biliv se na Pɔsin we gɛt sɛns na in mek wi. (Rid Sam 139:14.) If na so i bi, dat min se i gɛt gud rizin fɔ mek wi! We wi tray fɔ no dis rizin, dat go mek wi ɛnjɔy wi layf mɔ.
Wetin mek Gɔd bin mek mɔtalman?
Gɔd bin blɛs di fɔs man ɛn uman we i mek ɛn i gi dɛn fayn wok fɔ du. I bin mek dɛn fɔ lɛ dɛn bɔn pikin dɛn te dɛn ful-ɔp di wɔl, tɔn am to Paradays, ɛn liv de sote go.—Rid Jɛnɛsis 1:28, 31.
Wetin Gɔd bin want nɔ bin apin wantɛm wantɛm bikɔs di fɔs man ɛn uman bin tɔn dɛn bak pan am. Bɔt Gɔd nɔ fɔgɛt bɔt wi ɛn i nɔ fɔgɛt bɔt wetin i bin want fɔ du fɔ wi ɛn di wɔl. Di Baybul ɛp wi fɔ no se Gɔd dɔn de wok fɔ sev pipul dɛn we de du wetin i want ɛn i go mek di wɔl tɔn to Paradays di we aw i bin want am. So Gɔd want lɛ yu ɛnjɔy yu layf di we aw i bin want am! (Rid Sam 37:29.) I go fayn lɛ yu lan frɔm di Baybul aw yusɛf go bɛnifit frɔm wetin Gɔd dɔn prɔmis fɔ du.