Uskayn Pipul Dɛn Jiova Witnɛs Dɛn Bi?

Wi na ɔganayzeshɔn we nɔ de miks wit ɔda rilijɔn dɛn. Pan ɔl we wi ɛdkwata de na Amɛrika, bɔku pan wi brɔda ɛn sista dɛn de na ɔda kɔntri dɛn. Infakt, na lɛk et milyɔn pan wi de tich pipul dɛn di Baybul. I dɔn pas 230 kɔntri dɛn we wi de tich pipul dɛn di Baybul. Wi de du dis bikɔs Jizɔs bin se: “Dɛn go prich dis gud nyus bɔt di Kiŋdɔm ɔlsay na di wɔl so dat ɔl di neshɔn dɛn go yɛri, dɔn di ɛnd go kam.”—Matyu 24:​14.

I nɔ mata usay wi de, wi de tɛk tɛm fɔ obe ɔl di lɔ dɛn. Bɔt wi kin tray nɔ fɔ put an pan pɔlitiks. Dis na bikɔs wi de fala di advays we Jizɔs bin gi Kristian dɛn. I bin se dɛn nɔ fɔ “de du di tin dɛn we di wɔl de du.” So wi nɔ de put an pan pɔlitiks ɔ sɔpɔt ɛni wɔ. (Jɔn 15:​19; 17:​16) Infakt, insay Wɔl Wɔ Tu, dɛn bin put Jiova Witnɛs dɛn na prizin, ɛn dɛn bin du bad bad tin to dɛn, bikɔs dɛn nɔ bin gri fɔ put an pan pɔlitiks ɔ fɛt wɔ. Wan man we na bin bishɔp na Jamani bin rayt se: “Na dɛn na di pipul dɛn nɔmɔ we go ebul fɔ tɔk se dɛn nɔ bin put an pan pɔlitiks ɔ wɔ di tɛm we di Nazi gɔvmɛnt bin de rul.”

Bɔt stil, wi nɔ de kip to wisɛf. We Jizɔs bin de pre to Gɔd fɔ di wan dɛn we de fala am, i bin se: “A nɔ de beg lɛ yu pul dɛn kɔmɔt na di wɔl.” (Jɔn 17:​15) So, yu go si wi we wi de wok, we wi de go bay bay, ɛn we wi de go na skul na di eria.