DI TƆPIK NA DI FRƆNT PEJ | UDAT NA JIOVA WITNƐS DƐN?
Wetin Jiova Witnɛs Dɛn Biliv?
Jiova Witnɛs dɛn biliv se “ɔl di tin dɛn we de na di Baybul, na wetin Gɔd tɛl pipul dɛn fɔ rayt” ɛn dɛn tin ya de bɛnifit wi. (Sɛkɔn Lɛta To Timoti 3:16) Na di Baybul wi kin yuz fɔ gayd wi fɔ lan bɔt di Wan we mek wi ɛn fɔ liv wi layf di rayt we.
Di Baybul tɔk se: “Lɛ pipul dɛn no se, yu we nem Jiova, na yu wangren de oba ɔlman na di wɔl.” (Sam 83:18) Na dat mek na Jiova nɔmɔ wi de wɔship ɛn bikɔs wi na in witnɛs dɛn na in mek wi de tray fɔ lɛ ɔda pipul dɛn no in nem.—Ayzaya 43:10-12.
As Kristian dɛn, wi biliv se Jizɔs, “na Gɔd in Pikin,”a we kam na di wɔl ɛn na in bin bi di Mɛsaya. (Jɔn 1:34, 41; 4:25, 26) Afta i day, i gɛt layf bak ɛn go na ɛvin. (Fɔs Lɛta Fɔ Kɔrint 15:3, 4) Leta, i bi Kiŋ na Gɔd in Kiŋdɔm. (Rɛvɛleshɔn 11:15) Da Kiŋdɔm de na rial gɔvmɛnt we go tɔn di wan ol wɔl to Paradays. (Daniɛl 2:44) Di Baybul tɔk se: “Di wan dɛn we ɔmbul go gɛt di wɔl, ɛn dɛn go gladi ɛn ɛnjɔy pis.”—Sam 37:11, 29.
“We dɛn de rid di Baybul, dɛn biliv se na Gɔd de tɔk to dɛn. Ɛnitɛm we dɛn gɛt prɔblɛm, dɛn de tek Gɔd in Wɔd ɛn luk insay de fɔ sɔlv dɛn prɔblɛm. . . . To dɛn, Gɔd in Wɔd stil gɛt pawa fɔ ɛp dɛn.”—Wan Katolik bigman we nem Bɛnjamin Chirayat, Münsterländische Volkszeitung nyuspepa, Jamani
Jiova witnɛs dɛn biliv se di advays dɛn we de na di Baybul kin ɛp pipul dɛn tide. (Ayzaya 48:17, 18) So, na dat mek wi de tek tɛm fɔ fala ɔl di advays dɛn we de na di Baybul. Fɔ ɛgzampul, bikɔs di Baybul wɔn wi fɔ avɔyd ɛnitin we go dɔti wi bɔdi ɛn wi maynd, na dat mek wi nɔ de smok ɔ tek drɔgs. (Sɛkɔn Lɛta Fɔ Kɔrint 7:1) Apat frɔm dɛn tin ya, ɔda tin dɛn de we di Baybul se wi nɔ fɔ put an pan; tin dɛn lɛk fɔ drink te yu chak, fɔ du mami ɛn dadi biznɛs di we aw Gɔd nɔ want, ɛn fɔ tif.—Fɔs Lɛta Fɔ Kɔrint 6:9-11.
a Di Baybul tɔk bak se Jizɔs na “Gɔd in wangren Pikin.” Dis na bikɔs na in na di fɔs ɛn wangren pɔsin we Jiova insɛf sɛf mek. —Jɔn 3:18; Lɛta Fɔ Kɔlɔse 1:13-15