DI TƆPIK NA DI FRƆNT PEJ | ƐNI BƐNIFIT DE WE PƆSIN DE PRE?
Wetin Mek Pipul dɛn Kin Pre?
“A bin lɛk fɔ ple gambul bad bad wan. A pre fɔ lɛ a win bɔku bɔku mɔni. Bɔt dat nɔ ɛva apin.”—Samiɛl,a Kenya.
“We wi de na skul, wi kin jɔs ripit di prea we dɛn dɔn tich wi.”—Tɛriza, Filipins.
“A kin pre we a gɛt prɔblɛm. A kin pre lɛ Gɔd fɔgiv mi sin dɛn ɛn fɔ lɛ a bi gud Kristian.”—Magdalin, Gana.
Di tin dɛn we Samiɛl, Tɛriza, ɛn Magdalin tɔk sho se pipul dɛn gɛt difrɛn difrɛn rizin dɛn we mek dɛn kin pre. Sɔm kin pre fɔ gud tin dɛn, bɔt ɔda wan dɛn nɔ kin pre fɔ gud tin dɛn. We sɔm pipul dɛn kin pre, di prea kin kɔmɔt frɔm dɛn at, bɔt ɔda wan dɛn nɔ kin pre frɔm dɛn at. Bɔt ilɛksɛf dɛn pre fɔ lɛ dɛn pas dɛn ɛgzam, ɔ pre fɔ lɛ di tim we dɛn de sɔpɔt win, ɔ fɔ lɛ Gɔd gayd dɛn famili, ɔ fɔ plɛnti ɔda rizin dɛn, bɔku bɔku pipul dɛn si am se dɛn nid fɔ pre. Infakt, we dɛn chɛk fɔ no udat-ɛn-udat de pre, dɛn dɔn kam fɔ no se ivin pipul dɛn we nɔ de na ɛni rilijɔn kin pre ɔltɛm.
Yu kin pre? If na so i bi, wetin yu kin pre fɔ? Ilɛksɛf yu gɛt di abit fɔ de pre, ɔ yu nɔ de pre, sɔntɛm yu go de wɔnda: ‘Ɛni bɛnifit de we pɔsin de pre? Ɛnibɔdi de we de lisin?’ Wan man we de rayt buk bin tɔk se prea jɔs de fɔ lɛ “pɔsin fil fayn . . . i jɔs tan lɛk we pɔsin de tɔk to in fish we i de mɛn na in os.” Sɔm bigman dɛn we sabi bɔt mɛrɛsin de tink dis sem we. Dɛn se prea na “ɔda mɛrɛsin.” Fɔ se pipul dɛn we kin pre kin jɔs du am fɔ natin ɔ dat kin mek dɛn fil fayn?
Di Baybul ɛp wi fɔ no se prea nɔto fɔ lɛ pɔsin jɔs fil fayn. Di Baybul tɛl wi se sɔmbɔdi de we rili de lisin we wi pre di rayt we ɛn we wi pre fɔ di rayt tin dɛn. Yu tink se dis na tru? Lɛ wi tɔk bɔt sɔm tin dɛn we sho se dis na tru.
a Dɛn dɔn chenj sɔm nem dɛn na dis atikul.