PREA Wetin I Go Du fɔ Yu?

Bifo yu bigin fɔ du sɔntin, sɔntɛm yu go wɔnda ɛn aks yusɛf se, ‘Aw dis tin go bɛnifit mi?’ Yu tink se i bad fɔ aks dis kayn kwɛstyɔn bɔt prea? Nɔ, i nɔ bad. Wi jɔs want fɔ no if wi go gɛt ɛni bɛnifit frɔm dat. Ivin Job we na bin gud man bin aks se: “If a kɔl am, i go ansa mi?”—Job 9:​16.

Insay di atikul dɛn we de bifo dis wan, wi lan se prea nɔto jɔs sɔntin we pɔsin de ripit ɔltɛm we i de wɔship Gɔd ɔ sɔntin we de mek pɔsin fil fayn. Di tru Gɔd de rili lisin to pɔsin in prea. If wi pre di rayt we ɛn fɔ di rayt tin, i go lisin to wi. Infakt, i tɛl wi fɔ kam nia am. (Jems 4:​8) So, us bɛnifit wi go gɛt if wi de pre? Lɛ wi tɔk bɔt sɔm bɛnifit dɛn we wi go gɛt.

Wi go gɛt kolat.

We prɔblɛm ɔ tin dɛn we nɔ izi kin mit yu na layf, yu kin wɔri tumɔs? Di Baybul ɛnkɔrej wi fɔ “pre ɔltɛm” ɛn fɔ “mek Gɔd no di tin dɛn we [wi] want.” (Fɔs Lɛta Fɔ Tɛsalonayka 5:​17; Lɛta Fɔ Filipay 4:​6) Di Baybul tɛl wi se if wi tɔn to Gɔd ɛn pre to am, “di pis we Gɔd de gi we pas di we aw [wi] ɔndastand, go gayd [wi] at ɛn [wi] maynd.” (Lɛta Fɔ Filipay 4:​7) We wi tɛl wi Papa we de na ɛvin bɔt di tin dɛn we de mek wi wɔri, wi go gɛt kolat. Infakt, i tɛl wi fɔ du dat. Sam 55:​22 tɔk se: “Trowe yu prɔblɛm pan Jiova, ɛn i go ɛp yu.”

Bɔku bɔku pipul dɛn na di wɔl dɔn gɛt dis kolat. Wan uman na Sawt Koria we nem Iran bin tɔk se: “Pan ɔl we a kin gɛt siriɔs prɔblɛm dɛn, as a pre bɔt di prɔblɛm dɛn so, a nɔ kin wɔri tumɔs igen ɛn a kin fil lɛk se a gɛt di pawa fɔ bia di prɔblɛm dɛn.” Sisilia, we de na di Filipins bin tɔk se: “Bikɔs mi na mama, a kin wɔri tumɔs bɔt mi gyal pikin dɛn ɛn mi mama we nɔ kin ebul fɔ mɛmba mi. Bɔt bikɔs a kin pre, a ebul fɔ du ɔda tin dɛn ɛn nɔ wɔri tumɔs. A no se Jiova go ɛp mi fɔ kia fɔ dɛn.”

Gɔd go kɔrej wi ɛn ɛp wi we bad tin mit wi.

Yu gɛt prɔblɛm dɛn we rili de mɔna yu, lɛk sik we nɔ de mɛn ɔ ɔda bad tin we dɔn apin to yu? We yu pre to di “Gɔd we de kɔrej wi” dat go rili ɛp yu. Di Baybul tɔk se i de “kɔrej wi pan ɔl wi prɔblɛm dɛn.” (Sɛkɔn Lɛta Fɔ Kɔrint 1:​3, 4) Fɔ ɛgzampul, wan tɛm we sɔntin bin rili de mɔna Jizɔs, “i nil dɔŋ ɛn bigin fɔ pre.” Wetin bin apin we i du dat? “Wan enjɛl frɔm ɛvin apia to am ɛn gi am kɔrej.” (Lyuk 22:​41, 43) Wan ɔda pɔsin we bin de du wetin Gɔd want, na Nɛimaya. Wikɛd pipul dɛn bin trɛtin am ɛn tray fɔ stɔp am lɛ i nɔ du Gɔd in wok. Nɛimaya pre to Gɔd se: “Naw, a de pre, gi mi an dɛn trɛnk.” Di tin we apin afta dat sho se Gɔd bin rili ɛp am nɔ fɔ fred ɛn i bin ebul du in wok. (Nɛimaya 6:​9-16) Wan man na Gana we nem Rɛjinal bin tɔk bɔt wetin kin apin we i kin pre. I tɔk se: “We a kin pre, mɔ we a gɛt prɔblɛm we de rili mɔna mi, a kin fil lɛk se a dɔn tɛl mi prɔblɛm to sɔmbɔdi we ebul fɔ ɛp mi ɛn we de tɛl mi se a nɔ nid fɔ wɔri.” Fɔ tru, Gɔd kin kɔrej wi we wi pre to am.

Gɔd go gi wi sɛns.

Sɔm tin dɛn we wi kin disayd fɔ du kin afɛkt wi ɛn di wan dɛn we wi lɛk, sote go. Aw wi go disayd fɔ du di rayt tin? Di Baybul se: “If ɛnibɔdi pan una de we nɔ gɛt sɛns [mɔ if i gɛt prɔblɛm dɛn we de mɔna am], lɛ i kɔntinyu fɔ aks Gɔd, i de gi fri wan to ɔlman, i nɔ de luk fɔ mistek ɛn Gɔd go gi am.” (Jems 1:​5) If wi pre to Gɔd fɔ lɛ i gi wi sɛns, i go yuz in oli spirit fɔ gayd wi so dat wi go disayd fɔ du di rayt tin. Infakt, we wi de pre, wi fɔ aks Gɔd fɔ lɛ i gi wi in oli spirit, bikɔs Jizɔs bin mek wi no se “di Papa we de na ɛvin . . . go gi oli spirit to di wan dɛn we de aks am!”—Lyuk 11:​13.

We Jizɔs insɛf bin de pre, i bin de aks in Papa fɔ lɛ i ɛp am we i bin want disayd fɔ du sɔntin we rili impɔtant. Di Baybul tɛl wi se we i bin want fɔ pik di 12 man dɛn we fɔ bi in apɔsul, “i pre to Gɔd ol nɛt.”—Lyuk 6:​12.

Jɔs lɛk Jizɔs, bɔku pipul dɛn dɔn kam fɔ si aw Gɔd de ansa dɛn prea. Dɛn biliv dis bikɔs dɛn dɔn si se we dɛn kin aks Gɔd fɔ ɛp dɛn fɔ disayd fɔ du di rayt tin, i kin ɛp dɛn. Wan uman na di Filipins we nem Rijayna tɔk bɔt di difrɛn difrɛn prɔblɛm dɛn we dɔn mit am. I tɔk bɔt di kia we i bin gɛt fɔ kia fɔ insɛf ɛn in famili afta we in man day, di lɔs we i bin lɔs in wok, ɛn di yagba we i kin gɛt we i de mɛn in tu gyal pikin dɛn. Wetin bin ɛp Rijayna fɔ disayd fɔ du di rayt tin? I tɔk se, “A kin pre to Jiova ɛn abop pan am fɔ ɛp mi.” Wan man na Gana we nem Kwabena bin tɔk wetin mek i pre lɛ Gɔd ɛp am. I tɔk se, “A lɔs mi wok usay dɛn bin de pe mi bɔku mɔni.” We i bin de tink bɔt uskayn wok we i go want bak, i tɔk se, “A bin de pre to Jiova ɔltɛm fɔ lɛ i gayd mi mek a disayd fɔ du di rayt tin.” I kɔntinyu fɔ tɔk se, “A bin biliv gud gud wan se Jiova bin ɛp mi fɔ pik wok we go mek a ebul fɔ kam nia am mɔ ɛn mɔ ɛn we go mek a ebul fɔ gɛt di tin dɛn we a nid.” Yusɛf go si se Gɔd go ɛp yu we yu pre to am bɔt di tin dɛn we go ambɔg yu padi biznɛs wit am.

Wi jɔs dɔn tɔk bɔt sɔm tin dɛn we prea kin du fɔ yu. (Fɔ lan mɔ bɔt ɔda bɛnifit dɛn, rid di bɔks we gɛt di taytul “Bɛnifit dɛn we Yu Go Gɛt we Yu Pre.”) Bɔt fɔ lɛ yu gɛt dɛn bɛnifit dɛn ya, di fɔs tin we yu fɔ du na dat yu nid fɔ no Gɔd ɛn wetin i want. If na dat yu want, wi de ɛnkɔrej yu fɔ aks Jiova Witnɛs dɛn fɔ ɛp yu fɔ.stɔdi di Baybul.a Dis na di fɔs tin we yu go du fɔ kam nia Gɔd we na di “Wan we de yɛri prea.”—Sam 65:​2.