DI TƆPIK NA DI FRƆNT PEJ
Aw Gɔd De Si Wɔ?
Aw yu go ansa dis kwɛstyɔn? Bɔku pipul dɛn tink se Gɔd want lɛ pipul dɛn fɛt wɔ. Dɛn se Gɔd bin dɔn tɛl in savant dɛn trade fɔ fɛt wɔ, ɛn di Baybul sho dat klia wan. Bɔt ɔda pipul dɛn se Gɔd in Pikin, we na Jizɔs bin tich in disaypul dɛn se, dɛn fɔ lɛk di wan dɛn we et dɛn. (Matyu 5:43, 44) So dɛn tink se trade Gɔd bin want lɛ pipul dɛn fɛt wɔ, bɔt tide i nɔ want mek pipul dɛn fɛt wɔ.
Wetin yu tink? Yu tink se Gɔd want lɛ wi fɛt wɔ? If na so i bi, udat in say i de sɔpɔt tide? We yu no di ansa to dɛn kwɛstyɔn ya, i go ɛp yu fɔ chɛk yusɛf fɔ no aw yu de fil ɛn tink bɔt wɔ. Fɔ ɛgzampul, if yu no se Gɔd nɔ jɔs want lɛ pipul dɛn fɛt wɔ bɔt i ivin de sɔpɔt di say we yu de sɔpɔt pan wɔ, sɔntɛm dat go mek yu fil fayn bikɔs yu no se na una go win. Bɔt, aw yu go fil if yu no se Gɔd de sɔpɔt di ɔdasay pan di wɔ? Sɔntɛm yu go bigin de tink if yu fɔ chenj di say we yu de sɔpɔt.
Sɔntin de we rili impɔtant we yu fɔ no. We yu no aw Gɔd de si wɔ dat go afɛkt wetin yu tink bɔt Gɔd. If yu na wan pan di bɔku bɔku pipul dɛn we wɔ dɔn ambɔg bad bad wan, yu nid fɔ no di ansa to dis kwɛstyɔn: Fɔ se na Gɔd de alaw ɔ ɛnkɔrej wɔ we de mek pipul dɛn sɔfa? Ɔ fɔ se Gɔd nɔ bisin we bɔku pipul dɛn we nɔ du natin de sɔfa pan wɔ?
Yu go sɔprayz fɔ no se di Baybul in ansa rili difrɛn frɔm wetin dɛn pipul dɛn ya tink. Ɛn di we aw Gɔd bin de si wɔ trade na di sem we i de si am tide. Lɛ wi tɔk bɔt wetin di Baybul se bɔt aw Gɔd bin de si wɔ fɔs fɔstɛm ɛn di tɛm we di fɔstɛm Kristian dɛn bin de na di wɔl. Dat go ɛp wi fɔ no aw Gɔd de si wɔ tide ɛn if mɔtalman go kɔntinyu fɔ fɛt wɔ sote go.