We Pɔsin Nɔ Ɔnɛs, Aw Dat Kin Afɛkt Yu?

Yu gri wit wetin Samanta se? Jɔs lɛk Samanta, prɔblɛm dɛn we nɔ izi fɔ sɔlv go mɔs dɔn mit wi ɔl. Wetin wi du we sɔntin tɛmt wi fɔ du tin we nɔ fayn de sho wetin wi rili valyu. Fɔ ɛgzampul, wi nɔ kin want fɔ shem, bɔt if dat impɔtant to wi pas ɛni ɔda tin, wi go du sɔntin we nɔ ɔnɛs jɔs fɔ lɛ wi nɔ shem. Bɔt we pipul dɛn no di tru, i kin briŋ kam prɔblɛm. Lɛ wi si sɔm ɛgzampul dɛn.

WE PƆSIN NƆ ƆNƐS, I KIN MEK PIPUL DƐN NƆ BILIV AM

Wan men tin we go mek padi biznɛs go bifo na we di tu pipul dɛn biliv dɛnsɛf. We tu pipul dɛn biliv dɛnsɛf, dɛn kin fil sef ɛn dɛn nɔ kin wɔri. Bɔt dɛn nɔ go biliv dɛnsɛf wantɛm wantɛm. Pipul dɛn go biliv dɛnsɛf we dɛn de spɛn tɛm togɛda, tɔk tru to dɛnsɛf, ɛn we dɛn put wetin dɛn kɔmpin want bifo wetin dɛn want. Bɔt we wan pɔsin du sɔntin we nɔ ɔnɛs, i kin mek di ɔda pɔsin nɔ biliv am igen. Ɛn we pɔsin lɛf fɔ biliv yu, i kin at fɔ lɛ i biliv yu bak.

Sɔmbɔdi we yu tink se na yu gud padi dɔn ɛva lay pan yu? If na so i bi, aw yu bin fil? Sɔntɛm yu go dɔn fil bad ɔ si am se i kɔmɔt biɛn yu. Dis na sɔntin we ɔlman kin ɔndastand. Nɔbɔdi nɔ go dawt se tayt padi biznɛs kin pwɛl if wan pɔsin du sɔntin we nɔ ɔnɛs.

WE PƆSIN NƆ ƆNƐS, I KIN MEK ƆDA PIPUL DƐN NƆ ƆNƐS

Wan masta sabi bukman we nem Rɔbɔt Inas na di University of California bin du wan stɔdi. Insay da stɔdi de, i kam fɔ no se we “pɔsin nɔ ɔnɛs, i kin mek ɔda pipul dɛn bak nɔ ɔnɛs.” So, wi go se we pɔsin nɔ ɔnɛs, i tan lɛk bad sik we de transfa to ɔda pɔsin. Di mɔ we yu spɛn tɛm wit pɔsin we nɔ ɔnɛs, na di mɔ i nɔ go izi fɔ yu fɔ bi pɔsin we ɔnɛs.

Wetin go ɛp yu fɔ bi pɔsin we ɔnɛs? Di Baybul go ɛp yu. Duya wach sɔm advays dɛn na di Baybul.