Wi Ɔl Nid Pɔsin Fɔ Kɔrej Wi

Yu mɛmba wan tɛm we yu bin smɔl we yu fɔdɔm? Sɔntɛm yu bin wund na yu an ɔ yu brus yu ni. Yu mɛmba di we aw yu mama bin kɔrej yu? Sɔntɛm i bin klin di say we yu wund ɛn put plasta de. Yu kray, bɔt di fayn wɔd dɛn we yu mama bin yuz fɔ kɔrej yu ɛn we i ɔg yu, mek i nɔ tu te yu fil fayn. Da tɛm de, pɔsin bin de we de kɔrej yu ɔltɛm.

Bɔt as yu de big, layf nɔ kin izi fɔ yu. Yu go gɛt siriɔs prɔblɛm dɛn ɛn i go tranga fɔ gɛt pɔsin we de kɔrej yu. I sɔri fɔ no se di prɔblɛm dɛn we de mit big pipul dɛn na wan dɛn we plasta ɔ di ɔg we yu mama go ɔg yu, nɔ go pul kɔmɔt. Lɛ wi tɔk bɔt sɔm ɛgzampul dɛn.

• Dɛn dɔn ɛva sak yu usay yu de wok? Julian se we dɛn sak am, i bin shɔk ɛn i bigin fɔ wɔri. I bin de aks insɛf se, ‘Aw a go kia fɔ mi famili? Wetin mek di kɔmni fil se a nɔ gɛt wan yus, we i bi se a dɔn wok tranga wan fɔ dɛn fɔ lɔng lɔng tɛm?’

• Sɔntɛm yu at pwɛl bikɔs yu mared-os dɔn skata. Rakɛl bin ɛksplen se: “I dɔn pas wan ia siks mɔnt we mi man jɔs lɛf mi lɛk dat; mi at bin rili pwɛl. I bin tan lɛk we pɔsin tek nɛf plit mi at. A bin de fil di pen na mi bɔdi ɛn a nɔ bin de fil fayn. A bin de fred wetin go apin tumara bambay.”

• Sɔntɛm yu gɛt siriɔs sik we de mɔna yu ɛn i nɔ luk lɛk se i de bɛtɛ. Sɔntɛnde yu go fil lɛk Job we bin de kray se: “A et mi layf: a dɔn taya wit dis layf.” (Job 7:​16) Sɔntɛm yu de fil lɛk wan man we nem Luis we dɔn pas 80 ia. I bin tɔk se, “Sɔntɛnde a kin fil lɛk se a jɔs de wet fɔ lɛ a day.”

• Ɔ sɔntɛm pɔsin we yu lɛk dɔn day ɛn dat dɔn mek yu rili want pɔsin fɔ kɔrej yu. Rɔbɔt bin ɛksplen se: “We mi bɔy pikin bin day pan wan bad bad plen aksidɛnt, a nɔ bin biliv fɔs. Dɔn a bigin fil pen, lɛk di pen we di Baybul kɔmpia to aw pɔsin kin fil we in at de blid.”—Lyuk 2:​35.

Rɔbɔt, Luis, Rakɛl, ɛn Julian, dɛn ɔl bin gɛt pɔsin we kɔrej dɛn pan ɔl we dɛn bin gɛt siriɔs prɔblɛm dɛn. Dɛn bin gɛt di bɛst Pɔsin we bin kɔrej dɛn, we na di Ɔlmayti Gɔd. Aw i bin kɔrej dɛn? Yu tink se i go kɔrej wi di sem we, we wi gɛt prɔblɛm?