Wetin Di Baybul Se?
Wetin na Gɔd in Kiŋdɔm?
SƆM PIPUL DƐN BILIV SE na di rul we Gɔd de rul na pɔsin in at; ɔda wan dɛn tink se na di tin we mɔtalman de du fɔ mek pis de na di wan ol wɔl ɛn fɔ mek wi lɛk wisɛf lɛk brɔda ɛn sista dɛn. Wetin yu tink?
WETIN DI BAYBUL SE?
“PAPA GƆD na ɛvin go briŋ in yon kindɔm we nɔ go ɛva fɔdɔm . . . I go brok ɔl dɛn [mɔtalman] kindɔm we bin dɔn de bifo am pyɛt pyɛt, ɛn dɔn dɛn kpatakpata.” (Daniɛl 2:44) Gɔd in Kiŋdɔm na rial gɔvmɛnt.
WETIN BAK WI LAN FRƆM DI BAYBUL?
Gɔd in Kiŋdɔm de rul frɔm ɛvin.—Matyu 10:7; Lyuk 10:9.
Gɔd de yuz in Kiŋdɔm fɔ du wetin i want na ɛvin ɛn na dis wɔl.—Matyu 6:10.
Ustɛm Gɔd in Kiŋdɔm go kam?
WETIN YU GO SE?
Nɔbɔdi nɔ no
I go kam jisnɔ
I nɔ go ɛva kam
WETIN DI BAYBUL SE?
“Pipul go tɛl ɔlman na [di] wɔl di Gud Nyuz bɔt wɛn Gɔd go rul di wɔl, so dat ɔlman go gɛt di chans fɔ yɛri ɛn biliv di Gud Nyuz; na da tɛm de di wɔl go dɔn.” (Matyu 24:14) As dɛn dɔn fɔ prich di gud nyus gud gud wan na di wɔl, Gɔd in Kiŋdɔm go kam fɔ dɔnawe wit dis wikɛd wɔl.
WETIN BAK WI LAN FRƆM DI BAYBUL?
No mɔtalman nɔ no di rayt tɛm we Gɔd in Kiŋdɔm go kam.—Matyu 24:36.
Di tin dɛn we di Baybul bin dɔn tɔk, de sho se Gɔd in Kiŋdɔm go kam jisnɔ.—Matyu 24:3, 7, 12.