Wan Skrol we Bin De Trade Trade we Dɛn Dɔn Ebul fɔ “Opin”

INSAY di ia 1970, di wan dɛn we de stɔdi bɔt aw pipul dɛn bin de du tin trade trade bin kam fɔ fɛn wan skrol we bin bɔn bad bad wan insay Izrɛl na wan say we dɛn kɔl Ɛngiday, nia di wɛstɛn bich na di Dɛd Si. Dɛn fɛn di skrol we dɛn bin de dig wan sinagɔg, we bin bɔn di tɛm we dɛn bin dɔnawe wit di vilej. I go mɔs bi se dis bin apin bitwin di ia 500 ɛn di ia 550. Bikɔs di skrol bin rili bɔn bad bad wan, dat bin mek i nɔ izi fɔ rid wetin de insay de. Bɔt wi gladi we wan 3-D skana ɛp wi fɔ si wetin de insay di skrol ɛn i bin tan lɛk se dɛn “opin di skrol.” Ɛn so wan nyu dijital pikchɔ sɔftwia ɛp dɛn fɔ ebul rid wetin bin de na di skrol.

Wetin di skan bin sho? Di skrol gɛt vas dɛn we de na di Baybul. Dis pat pan di skrol gɛt sɔm vas dɛn we de insay di fɔs pat na di Baybul buk we nem Lɛvitikɔs. Dɛn yuz di Tɛtragrametin fɔ rayt Gɔd in nem insay Ibru na dɛn vas dɛn ya. I tan lɛk se dis skrol bin dɔn de bitwin di ia 50 ɛn di ia 400, na dat mek i bi di Ibru Baybul skrol we ol pas ɔl frɔm we dɛn fɛn di Dɛd Si skrol we dɛn kin kɔl bak di Kumran manyuskript. Wan man we nem Gil Zoa rayt insay The Jerusɛlɛm Post se: “Te to di tɛm we wi ebul fɔ rid di Ɛngiday skrol we gɛt smɔl pat pan Lɛvitikɔs, na lɛk wan tawzin ia de bitwin di Dɛd Si Skrol we ol lɛk 2,000 ia ɛn di ɔda ol skrol we na di Alipo Kodɛks we dɛn rayt insay di ia 930.” Akɔdin to masta sabi buk man dɛn, di tin dɛn we rayt pan dis skrol de sho se di Masorɛtik tɛks pan di Tora, “nɔ chenj pan ɔl we i dɔn tek lɔng lɔng tɛm, ɛn so di mistek dɛn we pipul dɛn we de kɔpi buk kin mek, nɔ bin ebul fɔ chenj wetin de insay de.”