Prich fɔ Ɛp di Wan dɛn We Nɔ De na Ɛni Rilijɔn fɔ Sav Jiova

1. Wetin dɔn chenj dɛn biɛn tɛm ya na sɔm kɔntri dɛn?

FƆ LƆNG tɛm, bɔku pipul dɛn ɔlsay na di wɔl bin gɛt sɔntin we dɛn biliv we i kam pan rilijɔn. Bɔt dɛn biɛn tɛm ya, bɔku tin dɔn chenj. Mɔ ɛn mɔ pipul dɛn nɔ biliv ɛnitin igen we i kam pan rilijɔn. Infakt, na sɔm kɔntri dɛn bɔku pipul dɛn we de de kin se dɛn nɔ de na ɛni rilijɔn.b—Mat. 24:​12.

2. Wetin na sɔm pan di rizin dɛn we mek bɔku pipul dɛn nɔ de na ɛni rilijɔn igen?

² Wetin mek mɔ ɛn mɔ pipul dɛn de tink se dɛn nɔ biliv ɛnitin we i kam pan rilijɔn?c Sɔm pipul dɛn de pe atɛnshɔn mɔ pan ɛnjɔymɛnt ɔ dɛn prɔblɛm dɛn. (Lyuk 8:​14) Sɔm pipul dɛn we bin de na rilijɔn de tink naw se Gɔd nɔ de. Ɔda wan dɛn de we biliv se Gɔd de bɔt dɛn de tink se rilijɔn nɔ de na stayl igen, i nɔ impɔtant, ɛn i nɔ gri wit wetin sayɛns se ɛn di we aw pipul dɛn de tink. Dɛn go dɔn yɛri we dɛn padi dɛn, ticha dɛn, ɔ di midia de tɔk se layf jɔs kam bay chans, bɔt nɔto ɔltɛm dɛn kin yɛri tin dɛn we go mek dɛn biliv Gɔd gud gud wan. Sɔm pan dɛn dɔn gens wit di bigman dɛn pan rilijɔn we want mɔni ɛn pawa. Na sɔm say dɛn, di gɔvmɛnt dɛn dɔn put lɔ we de mek rilijɔn dɛn nɔ fri fɔ du ɔltin.

3. Wetin mek dɛn mek dis atikul?

³ Jizɔs want wi fɔ ‘go ɛn mek pipul dɛn bi in disaypul na ɔl di neshɔn dɛn.’ (Mat. 28:​19, NW) Aw yu go ɛp pipul dɛn we nɔ de na ɛni rilijɔn fɔ lɛk Gɔd ɛn bi Krays in disaypul dɛn? Wi fɔ no se di we aw pɔsin go biev we wi prich to am gɛt sɔntin fɔ du wit aw i mɛn. Fɔ ɛgzampul, pipul dɛn we mɛn na Yurop nɔ kin lisin to wi we wi prich to dɛn lɛk aw di wan dɛn na Eshia kin lisin we wi prich to dɛn. Wetin mek? Na bikɔs insay Yurop, bɔku pipul dɛn no smɔl tin bɔt di Baybul ɛn dɛn no se na Gɔd mek ɔltin. Bɔt na smɔl tin bɔku pipul dɛn na Eshia no bɔt di Baybul ɔ dɛn nɔ ivin no natin bɔt di Baybul ɛn dɔn nɔ biliv se Pɔsin de we mek ɔltin. Dis atikul na fɔ ɛp wi fɔ prich to ɔl di wan dɛn we wi de mit na wi tɛritri ɛn tɔch dɛn at wit wi mɛsej ilɛk usay dɛn kɔmɔt ɔ wetin dɛn biliv.

TINK DI RAYT WE BƆT DƐN

4. Wetin mek wi fɔ tink di rayt we bɔt di wan dɛn we nɔ biliv ɛnitin we i kam pan rilijɔn?

⁴ Tink di Rayt We. Ɛni ia, di wan dɛn we nɔ biliv ɛnitin we i kam pan rilijɔn kin bi Jiova Witnɛs dɛn. Bɔku pan dɛn kin liv klin layf ɛn dɛn dɔn gens wit di we aw rilijɔn ipokrit. Ɔda wan dɛn nɔ de liv klin layf ɛn dɛn gɛt bɔku bad abit dɛn we dɛn nid fɔ lɛf. Wi biliv tranga wan se Jiova go ɛp wi fɔ fɛn di wan dɛn we “want fɔ gɛt layf we go de sote go.”—Akt 13:​48, NW; 1 Tim. 2:​3, 4.

5. Wetin mek bɔku tɛm pipul dɛn kin lisin to wi mɛsej?

⁵ Du Gud ɛn Tek Tɛm Tɔk: Bɔku tɛm, nɔto wetin wi de se de mek pipul dɛn lisin to wi mɛsej, bɔt na di we aw wi de tɔk am. Dɛn kin lɛk we wi nays to dɛn, we wi tek tɛm tɔk, ɛn we wi de sho se wi rili bisin bɔt dɛn. Wi nɔ de fos dɛn fɔ mek dɛn lisin to wetin wi de tɔk. Bifo dat, wi de tray fɔ ɔndastand wetin mek dɛn de tink da we de bɔt rilijɔn. Fɔ ɛgzampul, sɔm nɔ lɛk fɔ tɔk bɔt rilijɔn wit strenja dɛn. Ɔda wan dɛn tink se i nɔ fayn fɔ aks pɔsin wetin i tink bɔt Gɔd. Stil ɔda pipul dɛn kin shem fɔ lɛ pɔsin si dɛn we dɛn de rid di Baybul, mɔ wit Jiova Witnɛs dɛn. Ilɛk wetin na di rizin we dɛn gɛt, wi de tray tranga wan fɔ ɔndastand di we aw dɛn de fil.—2 Tim. 2:​24.

6. Aw di apɔsul Pɔl bin de sho se i de ajɔst to wetin di pipul dɛn want? Aw wi go falamakata am?

⁶ Wetin wi go du if sɔmbɔdi nɔ lɛk we wi de yuz wɔd dɛn lɛk “Baybul,” “di tin dɛn we Gɔd mek,” “Gɔd,” ɔ “rilijɔn”? Wi kin falamakata di apɔsul Pɔl ɛn ajɔst di we aw wi de tɔk to dɛn. We Pɔl bin de tɔk to di Ju pipul dɛn, i bin de yuz di Skripchɔ dɛn fɔ tɔk to dɛn. Bɔt we i bin de tɔk to di bukman dɛn we na Grik na di Ariopagɔs, i nɔ bin de tɔk se na frɔm di Skripchɔ dɛn i de kot. (Akt 17:​2, 3, 22-31, NW) Aw wi go falamakata Pɔl in ɛgzampul? If yu mit pɔsin we nɔ gri wit wetin di Baybul se, i go fayn fɔ mek wi nɔ tɔk se na frɔm di Baybul wi de kot we wi de tɔk to am. If yu notis se di pɔsin nɔ want mek ɔda pipul dɛn si am we i de rid di Baybul wit yu, yu kin tray ɔda we lɛk fɔ yuz yu fon ɔ tablet fɔ sho am di Skripchɔ dɛn.

7. Frɔm wetin de na Fɔs Lɛta Fɔ Kɔrint 9:​20-23, wetin wi go du fɔ falamakata Pɔl in ɛgzampul?

⁷ Na fɔ Ɔndastand Dɛn ɛn Lisin to Dɛn. Wi fɔ tray fɔ ɔndastand wetin mek di pipul dɛn we wi de prich to de fil da kayn we de. (Prɔv. 20:​5) Lɛ wi tɔk bak bɔt Pɔl in ɛgzampul. I bin mɛn usay Ju pipul dɛn de. I bin nid fɔ ajɔst di we aw i de prich to di Jɛntayl dɛn bikɔs dɛn nɔ bin no natin bɔt Jiova ɛn di Skripchɔ dɛn ɔ na smɔl tin dɛn nɔmɔ dɛn bin no. I go fayn fɔ mek wi du risach ɔ tɔk to machɔ wan dɛn na di kɔngrigeshɔn so dat wi go ɔndastand gud gud wan aw di pipul dɛn na wi tɛritri de tink ɛn fil.—Rid Fɔs Lɛta Fɔ Kɔrint 9:​20-23.

8. Wetin na wan we we wi kin yuz fɔ stat fɔ tɔk bɔt di Baybul?

⁸ Wi gol na fɔ prich to di wan dɛn we rili want fɔ no bɔt Gɔd. Fɔ lɛ wi go ebul du dis, wi fɔ aks pipul dɛn wetin dɛn tink ɛn tek tɛm lisin to dɛn. Wan brɔda na Ingland kin aks pipul dɛn wetin dɛn tink bɔt aw fɔ gɛt gladi-at na mared-os, aw fɔ mɛn pikin dɛn, ɔ aw fɔ bia we dɛn nɔ trit wi di rayt we. Afta i dɔn lisin to wetin dɛn de se, di brɔda kin aks dɛn se, “Wetin yu tink bɔt dis advays we dɛn bin dɔn rayt lɛk 2,000 ia so?” Dɔn, i nɔ kin yuz di wɔd “Baybul,” bifo dat, i kin yuz in fon fɔ sho dɛn fayn skripchɔ we i dɔn pik.

PRICH DI KAYN WE WE GO ƐP DƐN

9. Aw wi go ɛp pipul dɛn we nɔ kin want fɔ tɔk bɔt Gɔd?

⁹ Wi kin prich to pipul dɛn we nɔ want fɔ tɔk bɔt Gɔd bay we wi tɔk to dɛn bɔt sɔntin we de afɛkt dɛn. Fɔ ɛgzampul, bɔku pipul dɛn kin kɔle di tin dɛn we Gɔd mek. So sɔntɛm wi kin tɛl dɛn se: “Yu go mɔs no se sayɛnsman dɛn kin falamakata di tin dɛn we de arawnd wi fɔ mek nyu tin dɛn. Fɔ ɛgzampul, di wan dɛn we mek maykrofon stɔdi bɔt animal yes, ɛn di wan dɛn we mek kamɛra, stɔdi bɔt animal yay. Wetin de kam na yu maynd we yu tink bɔt di tin dɛn we de arawnd wi? Yu tink se dɛn jɔs kam fɔ dɛnsɛf, na pɔsin mek dɛn, ɔ na ɔda tin?” Afta we yu dɔn lisin to wetin i de tɔk, yu kin tɔk bak se: “We injinia dɛn de falamakata di yes ɛn di yay dɛn, wi go de wɔnda udat dɛn de lan frɔm. Sɔntin de we wan man bin rayt na in pɔym trade trade we a rili lɛk. I bin se: ‘Di Wan we mek yes mɔs de yɛri ɛn in we mek yay, mɔs de si. . . . Ɔ in we de tich, yu go se i nɔ gɛt sɛns?’ Sɔm sayɛnsman dɛn dɔn gri wit dɛn wɔd dɛn ya ɛn dɛn biliv se pɔsin de we mek ɔltin.” (Sam 94:​9, 10) Dɔn, wi kin sho di pɔsin wan fim na jw.org^® ɔnda “Interviews and Experiences” na di say we “Viewpoints on the Origin of Life” de. (Luk ɔnda PUBLICATIONS > VIDEOS.) Ɔ wi kin gi dɛn wan pan di brosho dɛn we gɛt di taytul Was Life Created? ɔ The Origin of Life—Five Questions Worth Asking.

10. Aw wi go stat fɔ tɔk to sɔmbɔdi we nɔ want fɔ tɔk bɔt Gɔd?

¹⁰ Bɔku pipul dɛn want fɔ lɛ tumara bambay go fayn. Bɔt bɔku de fred se dis wɔl gɛt fɔ pwɛl kpatakpata ɔ nɔbɔdi nɔ gɛt fɔ de de. Wan sakit ovasia na Nɔwe bin se bɔku tɛm, pipul dɛn we nɔ want fɔ tɔk bɔt Gɔd kin want fɔ tɔk bɔt wetin de apin na di wɔl. Afta we i dɔn grit pipul dɛn, i kin tɔk se: “Yu tink se tumara bambay go bɛtɛ? Fɔ se na pɔlitiks, sayɛnsman dɛn, ɔ ɔda pɔsin go du dis?” Afta we i kin dɔn tek tɛm lisin to dɛn, i kin rid ɔ kot skripchɔ we gɛt pɔynt dɛn we de sho aw tumara bambay go bɛtɛ. Sɔm kin rili gladi fɔ di prɔmis we di Baybul gi fɔ se dis wɔl go de sote go ɛn gud pipul dɛn go de de sote go.—Sam 37:​29; Ɛkli. 1:​4.

11. Wetin mek wi nid fɔ tray difrɛn we dɛn fɔ stat fɔ tɔk to pɔsin? Frɔm wetin de na Lɛta Fɔ Rom 1:​14-16, aw wi go falamakata Pɔl in ɛgzampul?

¹¹ Wi fɔ yuz difrɛn difrɛn we dɛn fɔ stat fɔ tɔk to di wan dɛn we wi de mit. Wetin du? Na bikɔs ɔlman difrɛn. Sɔntin we wan pɔsin go want fɔ lisin to nɔto in ɔda pɔsin go want fɔ lisin to. Sɔm kin gri fɔ tɔk bɔt Gɔd ɔ di Baybul, bɔt ɔda wan dɛn kin gladi mɔ fɔ tɔk bɔt ɔda tin dɛn fɔs. Ilɛk wetin apin, wi fɔ yuz ɛni chans we wi gɛt fɔ tɔk to ɔlkayn pipul dɛn. (Rid Lɛta Fɔ Rom 1:​14-16.) Bɔt wi fɔ mɛmba se na Jiova de mek di trut gro insay pɔsin in at.—1 Kɔr. 3:​6, 7.

PRICH TO PIPUL DƐN WE KƆMƆT ESHIA

12. Wetin wi go du fɔ prich to Eshian pipul dɛn we nɔ ɛva tink se pɔsin de we mek ɔltin?

¹² Ɔlsay na di wɔl, bɔku pɔblisha dɛn de mit pipul dɛn we kɔmɔt Eshia, ivin di wan dɛn we kɔmɔt na Eshian kɔntri dɛn usay di gɔvmɛnt nɔ de alaw rilijɔn fɔ du ɔltin. Na bɔku Eshian kɔntri dɛn, plɛnti pipul dɛn nɔ ɛva tink if Pɔsin de we mek ɔltin. Sɔm kin rili want fɔ no mɔ ɛn dɛn kin gri fɔ stɔdi di Baybul, bɔt ɔda wan dɛn nɔ kin want fɔ lan nyu tin dɛn. Aw wi go ɛp dɛn? Sɔm machɔ pɔblisha dɛn dɔn lan se i fayn fɔ mek padi wit dɛn fɔs, sho se yu rili bisin bɔt dɛn, dɔn we yu gɛt di chans, yu kin tɛl dɛn bɔt aw di prinsipul dɛn we de na di Baybul go ɛp dɛn na layf.

13. Wetin go mek pipul dɛn want fɔ no mɔ bɔt di Baybul? (Luk di pikchɔ na di frɔnt pej.)

¹³ Di fɔs tin we bɔku pipul dɛn kin rili lɛk na di fayn prinsipul dɛn we de na di Baybul. (Ɛkli. 7:​12) Insay Nyu Yɔk, wan sista we bin de go fɛn Chayniz-Mandarin pipul dɛn bin se: “A kin tray fɔ sho se a bisin bɔt di pipul dɛn ɛn lisin to dɛn. If a notis se dɛn jɔs kam na di kɔntri, a kin aks dɛn se: ‘Aw yu de ajɔst to di nyu ples? Yu dɔn gɛt wok? Di pipul dɛn de trit yu fayn?’” Sɔntɛnde, dis kin gi am di chans fɔ tɔk bɔt wetin di Baybul de tich. Dɔn, if chans de, di sista kin aks se: “Wetin yu tink se na di tin we rili impɔtant fɔ lɛ wi du so dat wi go bi padi wit pipul dɛn? Mek a sho yu wan parebul na di Baybul? I se: ‘Plaba kin bigin lɛkɛ we wata de lik, so na fɔ tap am bifo i prɛd.’ Yu tink se dis advays go ɛp wi fɔ lɛ wi bi padi wit ɔda pipul dɛn”? (Prɔv. 17:​14) Dɛn kayn we ya we wi de tɔk kin ɛp wi fɔ no di pipul dɛn we want fɔ lan mɔ bɔt di Baybul.

14. Aw wan brɔda na di Fa Ist de ɛp pipul dɛn we tink se Gɔd nɔ de?

¹⁴ Wetin yu go tɛl di wan dɛn we de tɔk se dɛn nɔ biliv se Gɔd de? Wan brɔda we dɔn de prich fɔ lɔng tɛm to pipul dɛn we nɔ biliv ɛnitin we i kam pan rilijɔn na di Fa Ist bin ɛksplen se: “Na ya, we pɔsin tɛl yu se, ‘A nɔ biliv se Gɔd de,’ di pɔsin min se i nɔ de wɔship di gɔd dɛn we bɔku pipul dɛn na da eria de de wɔship. So plɛnti tɛm a kin gri wit dɛn se bɔku pan di gɔd dɛn we pipul dɛn de wɔship na mɔtalman mek dɛn ɛn dɛn nɔ rial. A kin rid Jɛrimaya 16:​20 we se: ‘Mɔtalman go ebul mek gɔd fɔ insɛf? Dɛn wan dɛn de nɔto gɔd dɛm!’ Dɔn a kin aks se: ‘Aw wi go no us gɔd na di rial wan ɛn us gɔd mɔtalman mek?’ A kin tek tɛm lisin to dɛn, ɛn rid Ayzaya 41:​23 we se: ‘Tɛl mi wetin gɛt fɔ bi tumara; so dat wi go no se una na gɔd dɛm.’ Dɔn a kin sho wan ɛgzampul bɔt aw Jiova dɔn tɔk bɔt wetin gɛt fɔ apin tumara bambay.”

15. Wetin wi lan frɔm wan brɔda we de na Ist Eshia in ɛgzampul?

¹⁵ Wan brɔda na Ist Eshia kin yuz dɛn we ya we i kin mek ritɔn visit dɛn. I tɔk se: “A kin sho dɛn ɛgzampul dɛn na di Baybul we de sho se wetin di Baybul de tɔk mek sɛns, di prɔfɛsi dɛn we di Baybul tɔk bɔt we dɔn bi, ɛn di lɔ dɛn we de kɔntrol di sta dɛn, di planɛt dɛn, ɛn ɔda tin dɛn na di wɔl. Dɔn, a kin sho dɛn aw ɔl dɛn pɔynt dɛn ya tich se Pɔsin de we gɛt sɛns ɛn we mek ɔltin. We di pɔsin gri se Gɔd mɔs de, a kin stat fɔ sho am wetin di Baybul tɔk bɔt Jiova.”

16. Frɔm wetin de na Di Ibru Pipul Dɛn 11:​6, wetin mek wi Baybul stɔdi dɛn nid fɔ gɛt fet pan Gɔd ɛn di Baybul? Aw wi go ɛp dɛn fɔ du dat?

¹⁶ We wi kɔndɔkt Baybul stɔdi wit pipul dɛn we nɔ biliv ɛnitin we i kam pan rilijɔn, wi fɔ de tray ɔltɛm fɔ ɛp dɛn fɔ gɛt fet se Gɔd de. (Rid Di Ibru Pipul Dɛn 11:​6.) Ɛn wi nid fɔ ɛp dɛn fɔ gɛt fet pan di Baybul. Dis go min se wi nid fɔ ripit sɔm pɔynt dɛn tu-tri tɛm. Ɛnitɛm we wi de stɔdi wit dɛn, wi nid fɔ tɔk bɔt di tin dɛn we de sho klia wan se di Baybul na Gɔd in Wɔd. Dis kin min se yu kin tɔk smɔl bɔt di prɔfɛsi dɛn we de na di Baybul we dɔn bi, wetin sayɛns ɛn istri tɔk bɔt we di Baybul gri wit, ɔ aw di Baybul kin ɛp wi na layf.

17. We wi sho se wi lɛk ɔda pipul dɛn, aw dat de afɛkt dɛn?

¹⁷ Fɔ ɛp pipul dɛn fɔ bi Krays in disaypul dɛn wi nid fɔ sho se wi lɛk dɛn ilɛksɛf dɛn biliv ɔ dɛn nɔ biliv ɛnitin we i kam pan rilijɔn. (1 Kɔr. 13:​1) We wi de tich dɛn, wi gol na fɔ sho dɛn se Gɔd lɛk wi ɛn i want wi fɔ lɛk am. Ɛvri ia bɔku bɔku pipul dɛn we nɔ bin rili want fɔ gɛt ɛnitin fɔ du wit rilijɔn dɔn baptayz bikɔs dɛn dɔn kam fɔ lɛk Gɔd. So na fɔ tink di rayt we bɔt dɛn, sho se yu lɛk dɛn ɛn yu bisin bɔt ɔlman. Lisin to dɛn. Tray fɔ ɔndastand wetin mek dɛn de fil da we de. Yuz yu ɛgzampul fɔ tich dɛn fɔ bi Krays in disaypul dɛn.