Jiova Dɔn Mek Am Pɔsibul fɔ Mek Yu Fri

1-2 (a) Wetin na jubili? (Luk di bɔks we gɛt di taytul “Wetin Na Bin di Jubili?”) (b) Wetin Jizɔs bin tɔk bɔt na Lyuk 4:​16-18?

NA SƆM kɔntri dɛn, dɛn gɛt spɛshal sɛlibreshɔn dɛn we dɛn kin arenj insay di 50 ia we kiŋ ɔ kwin de rul. Bɔku tɛm dɛn kin kɔl da 50 ia de di rula in Jubili ia. Di fɛstival dɛn we dɛn bin de gɛt insay di Jubili kin las fɔ wan de, wan wik, ɔ ivin pas dat, bɔt smɔl smɔl dɛn sɛlibreshɔn dɛn de kin dɔn, ɛn pipul dɛn kin kwik fɔ fɔgɛt bɔt dɛn.

² Wi go tɔk bɔt wan Jubili we bɛtɛ fa fawe pas di wan we dɛn bin de sɛlibret afta ɛvri 50 ia na Izrɛl. Di Jubili ia we dɛn bin de sɛlibret trade trade bin de briŋ fridɔm to di Izrɛlayt dɛn. Wetin mek wi fɔ lan bɔt di Jubili? Na bikɔs di Jubili ia we di Izrɛlayt dɛn bin de sɛlibret de mek wi mɛmba wan wɔndaful arenjmɛnt we Jiova dɔn mek fɔ wi. I go mek wi gɛt fridɔm we go de sote go, ɛn wi kin ivin bɛnifit frɔm am rayt naw. Jizɔs bin tɔk bɔt dis wɔndaful fridɔm.—Rid Lyuk 4:​16-18.

3. Frɔm wetin de na Livitikɔs 25:​8-12 (NWT), aw di Izrɛlayt dɛn bin de bɛnifit frɔm di Jubili?

³ Wi kin ebul fɔ ɔndastand gud gud wan wetin Jizɔs bin min we i tɔk bɔt fridɔm bay we wi go lan bɔt di Jubili we Gɔd bin arenj fɔ in pipul dɛn na Izrɛl. Jiova bin tɛl di Izrɛlayt dɛn se: “Una fɔ mek di 50 ia oli ɛn tɛl ɔlman na di land se di wan dɛn we na slev go fri. I go bi Jubili fɔ una, ɛn ɛni wan pan una go gɛt in prɔpati bak ɛn ɛni wan pan una fɔ go bak to in famili.” (Rid Livitikɔs 25:​8-12, NWT.) Insay di atikul bifo dis wan, wi bin tɔk bɔt aw di Izrɛlayt dɛn bin de bɛnifit frɔm di Sabat we dɛn bin de gɛt ɛni wik. Bɔt aw di Izrɛlayt dɛn bin de bɛnifit frɔm di Jubili? Fɔ ɛgzampul, imajin se wan Izrɛlayt gɛt bɔku dɛt fɔ pe, ɛn dis mek i sɛl in land fɔ pe in dɛt. Insay di Jubili ia, dɛn fɔ gi am bak in land. So dat di man “go gɛt in prɔpati bak,” ɛn i go lɛf di land fɔ in pikin dɛn tumara bambay. Ɔ if tin tranga fɔ sɔmbɔdi ɛn i sɛl insɛf ɔ wan pan in pikin dɛn as slev fɔ pe in dɛt, insay di Jubili ia, di slev go “go bak to in famili.” So nɔbɔdi nɔ go bi slev sote go ɛn nɔ gɛt no op! Dis arenjmɛnt sho se Jiova rili bisin bɔt in pipul dɛn!

4-5. Wetin mek i impɔtant fɔ lɛ wi lan bɔt di Jubili we di Izrɛlayt dɛn bin de sɛlibret?

⁴ Us ɔda we we di Izrɛlayt dɛn bin de bɛnifit frɔm di Jubili? Jiova bin tɔk se: “Nɔn pan dɛn nɔ go de we nɔ go gɛt bɛtɛ tin, bikɔs PAPA GƆD [“Jiova,” NWT] we na dɛn PAPA GƆD [“Jiova,” NWT] go blɛs dɛn ɔl na di land we i gi dɛn fɔ prɔpati.” (Dit. 15:​4) Dis difrɛn frɔm wetin de apin tide na di wɔl, usay bɔku tɛm di wan we jɛntri de gɛt mɔ jɛntri ɛn di wan we po de po mɔ ɛn mɔ.

⁵ As tru Kristian dɛn, wi nɔ de ɔnda di Lɔ we Gɔd bin gi Mozis. Dis min se wi nɔ de fala di lɔ we bin de trade trade bɔt di Jubili, we di wan dɛn we na slev go fri, di wan dɛn we gɛt dɛt nɔ go pe igen, ɛn di wan dɛn we bin dɔn sɛl dɛn land go gɛt dɛn land bak. (Rom 7:​4; 10:​4; Ɛfi. 2:​15) Bɔt i rili impɔtant fɔ mek wi lan bɔt di Jubili. Wetin mek? Na bikɔs wi de ɛnjɔy fridɔm we de mek wi mɛmba bɔt di arenjmɛnt we Jiova bin mek fɔ di Izrɛlayt dɛn.

JIZƆS BIN TƆK BƆT FRIDƆM

6. Wetin mɔtalman nid fridɔm frɔm?

⁶ Wi ɔl nid fridɔm bikɔs wi na slev dɛn to sin, we na wan kayn bad bad we aw mɔtalman bi slev. Bikɔs wi ɔl de sin, na dat mek wi de ol, sik, ɛn day. Bɔku pipul dɛn go gri se dis na tru we dɛn luk dɛnsɛf na mirɔ ɔ we dɛn go to dɔktɔ fɔ tritmɛnt. Dɔn, wi at kin pwɛl we wi du bad tin dɛn. Di apɔsul Pɔl bin tɔk se in na “slev to sin in lɔ we [bin de insay in] bɔdi.” I bin kɔntinyu fɔ tɔk bak se: “Mi na man we sɔri! Udat go sev mi frɔm dis bɔdi we de mek a day dis kayn day?”—Rom. 7:​23, 24, NWT.

7. Wetin Ayzaya bin tɔk bɔt fridɔm?

⁷ Wi gladi fɔ no se Gɔd dɔn mek we fɔ wi fɔ sev ɔ fɔ fri wi frɔm sin. Na Jizɔs na di wan we go mek dis fridɔm pɔsibul. Fɔ lɛk 800 ia bifo Jizɔs kam na di wɔl, di prɔfɛt Ayzaya bin dɔn tɔk se tumara bambay pipul dɛn go gɛt wan wɔndaful fridɔm. Da wɔndaful fridɔm de go du tin dɛn we pas di wan we di Izrɛlayt dɛn bin de gɛt insay di Jubili ia. I bin rayt se: “Papa Gɔd [“Jiova,” NWT] we na Gɔd in Spirit de pan mi, bikɔs PAPA GƆD [“Jiova,” NWT] dɔn anɔynt mi fɔ briŋ gud yus to di wan dɛn we de sɔfa; i dɔn sɛn mi fɔ mɛn dɛn wan we gɛt brok at, fɔ anawns to dɛn wan we dɛn bin dɔn kapchɔ, se, dɛn dɔn fri.” (Ayz. 61:​1) Udat dɛn dis prɔfɛsi bin de tɔk bɔt?

8. Udat Ayzaya bin tɔk bɔt na in prɔfɛsi bɔt fridɔm?

⁸ Di impɔtant prɔfɛsi bɔt fridɔm bin bigin fɔ apin afta we Jizɔs stat in prichin wok. We Jizɔs bin go na di sinagɔg we bin de na in om-tɔŋ na Nazarɛt, i bin rid di prɔfɛsi we Ayzaya bin rayt to di Ju pipul dɛn we bin gɛda de. Jizɔs bin yuz di wɔd dɛn na Ayzaya in prɔfɛsi fɔ tɔk bɔt insɛf se: “Gɔd [“Jiova,” NWT] in Spirit de wit mi, bikɔs Gɔd dɔn pik mi fɔ mek a tɛl dɛn po pipul di Gud Nyuz. I sɛn mi fɔ mek a tɛl dɛn slev se dɛn go fri ɛn dɛn blɛnyay pipul se dɛn go si. I sɛn mi fɔ fri dɛn wan we de lɛkɛ slev, ɛn fɔ mek a tɛl ɔlman se di tɛm dɔn kam we Gɔd go sev in pipul dɛn.” (Lyuk 4:​16-19) Aw Jizɔs bin du ɔl wetin de na dis prɔfɛsi?

DI FƆS PIPUL DƐN WE BIN FRI

9. Uskayn fridɔm bɔku pipul dɛn bin de op fɔ insay Jizɔs in tɛm?

⁹ Insay Jizɔs in tɛm, pipul dɛn bin bigin fɔ gɛt di fridɔm we Ayzaya bin tɔk bɔt ɛn we Jizɔs bin rid bɔt. Wi fɔ biliv dis bikɔs Jizɔs bin tɔk se: “Dis pat pan Gɔd in Buk we a rid, dɔn bi, fɔ tru, tide.” (Lyuk 4:​21) I go bi se bɔku pipul dɛn we bin yɛri wetin Jizɔs bin rid bin de op se dɛn go fri frɔm di Roman gɔvmɛnt. Ɔ sɔntɛm, dɛn bin de fil di sem we lɛk dɛn tu man dɛn ya we bin tɔk se: “Wi bin abop se na dis man we nem Jizɔs, Gɔd dɔn sɛn fɔ kam fri Izrɛl.” (Lyuk 24:​13, 21) Bɔt wi no se Jizɔs nɔ bin tɛl in disaypul dɛn fɔ tɔn agens di bad we aw di Roman dɛn bin de rul dɛn. Bifo dat, i bin tɛl dɛn se dɛn fɔ “gi di kiŋ na Rom wetin blant am.” (Mat. 22:​21) So aw Jizɔs bin fri pipul dɛn da tɛm de?

10. Wetin Jizɔs bin fri pipul dɛn frɔm?

¹⁰ Gɔd in Pikin bin kam fɔ ɛp pipul dɛn fɔ gɛt fridɔm frɔm tu tin dɛn. Fɔs, Jizɔs bin ɛp pipul dɛn fɔ fri frɔm lay lay tichin dɛn we di bigman dɛn pan rilijɔn bin de tich. Dɛn bin de fos bɔku Ju pipul dɛn da tɛm de fɔ fala mɔtalman tradishɔn ɛn di lay lay tin dɛn we dɛn biliv. (Mat. 5:​31-37; 15:​1-11) Di wan dɛn we se dɛn de ɛp ɔda pipul dɛn fɔ sav Gɔd nɔ bin de sav am di rayt we, so i bin tan lɛk se dɛn blaynd. Bikɔs dɛn nɔ biliv di Mɛsaya ɛn di tru tin dɛn we i bin de tich, dɛn nɔ bin kam fɔ no Gɔd, we min se dɛn bin kɔntinyu fɔ de as blaynman dɛn. (Jɔn 9:​1, 14-16, 35-41) Jizɔs bin sho di ɔmbul pipul dɛn aw dɛn go fri frɔm lay lay tichin dɛn bay di tru tin dɛn we i bin de tich ɛn di gud ɛgzampul we i sɛt.—Mak 1:​22; 2:​23–3:​5.

11. Us sɛkɔn we we Jizɔs fri pipul dɛn?

¹¹ Sɛkɔn, Jizɔs bin mek am pɔsibul fɔ lɛ mɔtalman fri frɔm sin. Bikɔs Jizɔs bin gi in layf as sakrifays, dat dɔn mek am pɔsibul fɔ lɛ Gɔd fɔgiv di wan dɛn we gɛt fet pan Krays in day wan ɛn we de sho dat bay di tin dɛn we dɛn de du. (Ibru 10:​12-18) Jizɔs bin tɔk se: “If Gɔd in Pikin mek una fri, dɛn una go fri fɔ tru.” (Jɔn 8:​36) Da fridɔm de bɛtɛ fa fawe pas di fridɔm we pipul dɛn bin de gɛt na Izrɛl insay di Jubili ia! Fɔ ɛgzampul, sɔmbɔdi we dɛn fri insay di Jubili ia kin bi slev bak, ɛn i kin ɛnd-ɔp fɔ day.

12. Udat na bin di fɔs pipul dɛn we bɛnifit frɔm di fridɔm we Jizɔs bin tɔk bɔt?

¹² Insay Pɛntikɔst 33, Jiova bin yuz in oli spirit fɔ anɔynt di apɔsul dɛn ɛn ɔda fetful man ɛn uman dɛn. I bin adɔpt dɛn as in pikin dɛn so dat tumara bambay dɛn go gɛt layf bak fɔ go de na ɛvin fɔ rul wit Jizɔs. (Rom 8:​2, 15-17) Dɛn na bin di fɔs pipul dɛn we bɛnifit frɔm di fridɔm we Jizɔs bin tɔk bɔt na di sinagɔg na Nazarɛt. Dɛn man ɛn uman dɛn ya bin fri frɔm di lay lay tichin dɛn ɛn kɔstɔm dɛn we di Ju bigman dɛn bin de fos pipul dɛn fɔ du. Gɔd bin mek am pɔsibul bak fɔ lɛ dɛn fri frɔm sin we de mek pɔsin day. Jiova in arenjmɛnt fɔ lɛ fridɔm de bak bin bigin di tɛm we I bin anɔynt Krays in disaypul dɛn ɛn i go ɛnd di tɛm we Jizɔs in Wan Tawzin Ia Rul go dɔn. Wetin go dɔn apin te to da tɛm de?

FRIDƆM FƆ BƆKU ƆDA PIPUL DƐN

13-14. Apat frɔm di anɔyntɛd Kristian dɛn, udat dɛn bak go bɛnifit frɔm di fridɔm we Jizɔs bin tɔk bɔt?

¹³ Tide, na bɔku bɔku ɔmbul pipul dɛn we kɔmɔt na difrɛn difrɛn neshɔn dɛn mekɔp di “ɔda ship.” (Jɔn 10:​16) Gɔd nɔ pik dɛn fɔ rul wit Jizɔs na ɛvin. Bifo dat, di Baybul se dɛn gɛt di op fɔ de na dis wɔl sote go. Yu gɛt da sem op de?

¹⁴ Yu kin ivin ɛnjɔy naw sɔm pan di gud tin dɛn we di anɔyntɛd dɛn gɛt. Bikɔs yu gɛt fet pan Jizɔs in sakrifays, yu kin aks Jiova fɔ mek i fɔgiv yu sin dɛn. Dis go mek Gɔd gladi fɔ yu ɛn yu go gɛt kolat. (Ɛfi. 1:​7, NWT; Rɛv. 7:​14, 15) Tink bak bɔt di blɛsin dɛn we yu go ɛnjɔy bikɔs yu fri frɔm lay lay tichin dɛn. Jizɔs bin tɔk se: “Una go no wetin tru bɔt Gɔd, ɛn dat go mek una fri.” (Jɔn 8:​32) Wi rili gladi fɔ gɛt dis kayn fridɔm!

15. Us fridɔm ɛn blɛsin dɛn wi de op fɔ gɛt tumara bambay?

¹⁵ Yu kin op fɔ di fridɔm we gɛt fɔ kam we pas ɔl ɔda fridɔm. I nɔ go te igen, Jizɔs go dɔnawe wit ɔl dɛn lay lay rilijɔn dɛn ɛn ɔl dɛn kɔrɔpt mɔtalman gɔvmɛnt dɛn. Gɔd go protɛkt “bɔku bɔku pipul” dɛn we de wɔship am ɛn i go alaw dɛn fɔ ɛnjɔy blɛsin dɛn insay Paradays na dis wɔl. (Rɛv. 7:​9, 14) Bɔku bɔku pipul dɛn go gɛt layf bak ɛn dɛn go gɛt di chans fɔ fri frɔm ɔl di bad bad tin dɛn we bin de apin bikɔs ɔf Adam in sin.—Akt 24:​15.

16. Us wɔndaful fridɔm we mɔtalman dɛn de wet fɔ?

¹⁶ Insay di Wan Tawzin Ia Rul, Jizɔs ɛn di wan dɛn we go rul wit am go ɛp mɔtalman dɛn fɔ gɛt pafɛkt wɛlbɔdi ɛn tayt padi biznɛs wit Gɔd. Dis kayn fridɔm go tan lɛk di Jubili we di Izrɛlayt dɛn bin de gɛt. Dis go mek ɔl di wan dɛn we de sav Jiova fetful wan go pafɛkt ɛn dɛn nɔ go sin igen.

17. Wetin Ayzaya 65:​21-23 tɔk se go apin to Gɔd in pipul dɛn? (Luk di pikchɔ na di frɔnt pej.)

¹⁷ Ayzaya 65:​21-23 (Rid) tɔk bɔt aw layf go tan lɛk tumara bambay. Bɔt wi nɔ go de aydul wan ɛn nɔ de du natin. Bifo dat, di Baybul se Gɔd in pipul dɛn da tɛm de go de du wok we go mek dɛn satisfay. Bifo di Wan Tawzin Ia go dɔn, wi go biliv tranga wan se: “Gɔd go fri” mɔtalman dɛn “so dat dɛn nɔ go rɔntin igen, dɛn go fri, lɛkɛ aw Gɔd in pikin dɛn dɔn fri.”—Rom 8:​21.

18. Wetin mek wi fɔ biliv tranga wan se wi go gɛt gladi-at tumara bambay?

¹⁸ Jɔs lɛk aw Jiova bin arenj fɔ lɛ di Izrɛlayt dɛn gɛt tɛm fɔ wok ɛn tɛm fɔ rɛst, na di sem tin i go du fɔ in pipul dɛn insay di Wan Tawzin Ia we Krays go rul. Tɛm go mɔs de fɔ wɔship Jiova. Fɔ lɛ wi gɛt gladi-at tide, i rili impɔtant fɔ lɛ wi wɔship Gɔd, ɛn wi go gɛt tɛm fɔ dat insay di nyu wɔl. Fɔ tru, ɔl di fetful wan dɛn we de sav Jiova go gladi insay di Wan Tawzin Ia we Krays go rul bikɔs wi ɔl go de du wok we go mek wi satisfay, ɛn wi ɔl go de sav Gɔd.