Yu No Jiova Gud Gud Wan?

1-2. Wetin Anjɛlito in ɛkspiriɛns de tich wi fɔ du?

YU MAMA ɛn papa na Jiova Witnɛs? If na so i bi, na fɔ mɛmba se yu nɔto Jiova in padi jɔs bikɔs yu mama ɛn papa na Jiova in padi. Ilɛk wi mama ɛn papa de sav Gɔd ɔ dɛn nɔ de sav am, na wisɛf sɛf nid fɔ mek Jiova bi wi padi.

² Tink bɔt wetin bin apin to wan brɔda we nem Anjɛlito. Ɔlman na in famili na Jiova Witnɛs. Bɔt we i bin yɔŋ, i nɔ bin rili fil se i gɛt tayt padi biznɛs wit Gɔd. Anjɛlito bin tɔk se, “A bin de sav Jiova jɔs bikɔs a want fɔ du wetin mi fambul dɛn bin de du.” Bɔt Anjɛlito bin disayd fɔ spɛn mɔ tɛm fɔ rid Gɔd in Wɔd ɛn tink gud gud wan bɔt am. I bigin fɔ pre to Jiova pas aw i bin de pre. Wetin bin apin we i du dat? I tɔk se, “A kam fɔ no se di wangren we aw a go gɛt tayt padi biznɛs wit mi Papa, Jiova, na we a kam fɔ no am misɛf sɛf.” Di tin we bin apin to Anjɛlito go mek wi tink bɔt sɔm impɔtant kwɛstyɔn dɛn lɛk: Us difrɛns de bitwin fɔ no smɔl tin bɔt Jiova ɛn fɔ no am gud gud wan? Ɛn wetin wi fɔ du fɔ no Jiova gud gud wan?

3. Us difrɛns de bitwin fɔ no smɔl tin bɔt Jiova ɛn fɔ no am gud gud wan?

³ Wi go de tink se wi no Jiova bikɔs wi sabi in nem ɔ sɔm pan di tin dɛn we i dɔn tɔk ɔ du. Bɔt dat nɔ min se wi no Jiova gud gud wan. Wi nid fɔ du mɔ. Wi nid fɔ spɛn tɛm fɔ no bɔt Jiova ɛn in wɔndaful kwaliti dɛn. Na da tɛm de, wi go bigin fɔ ɔndastand wetin mek i tɔk ɛn du sɔntin. Dat go ɛp wi fɔ no if Jiova lɛk wetin wi de tink ɛn wetin wi de du. We wi no wetin Jiova want wi fɔ du, wi nid fɔ du am.

4. We wi tɔk bɔt sɔm ɛgzampul dɛn na di Baybul, aw dat go ɛp wi?

⁴ Sɔm pipul dɛn go de provok wi bikɔs wi want fɔ sav Jiova, ɛn dɛn kin de agens wi mɔ we wi stat fɔ atɛnd di mitin dɛn. If wi abop pan Jiova, i nɔ go ɛva lɛf wi. Wi go stat fɔ mek tayt padi biznɛs wit Gɔd we go de sote go. Yu tink se wi go ebul no Jiova gud gud wan? Yɛs, wi go ebul! Di ɛgzampul dɛn we Mozis ɛn Kiŋ Devid bin sɛt sho se dat pɔsibul. As wi de kam tɔk bɔt wetin dɛn bin du, wi go ansa tu kwɛstyɔn dɛn lɛk: Aw dɛn bin kam fɔ no Jiova? Us lɛsin dɛn wi go lan frɔm dɛn ɛgzampul?

MOZIS BIN SI “GƆD WE MƆTALMAN NƆ DE SI”

5. Wetin Mozis bin disayd fɔ du?

⁵ Mozis bin du wetin i de lan. We Mozis bin ol lɛk 40 ia, i bin disayd fɔ de wit Gɔd in pipul dɛn we na di Ibru dɛn; i nɔ gri fɔ lɛ dɛn se na “di Kiŋ na Ijipt in gyal pikin bɔn am.” (Ibru 11:​24) Mozis bin giv-ɔp in ay pozishɔn. We Mozis bin disayd fɔ sɔpɔt di Ibru pipul dɛn, i bin no se Fɛro go vɛks pan am bad bad wan. Fɛro na bin pawaful kiŋ, ɛn di Ijipshian dɛn bin de tink se in na gɔd. Dis sho se Mozis bin gɛt strɔng fet! Mozis bin abop pan Jiova, ɛn dis bin mek i gɛt tayt padi biznɛs wit Jiova te i day.—Prɔv. 3:​5.

6. Wetin wi lan frɔm Mozis in ɛgzampul?

⁶ Wetin na di lɛsin fɔ wi? Jɔs lɛk Mozis, wi ɔl gɛt fɔ disayd fɔ du sɔntin: Yu tink se wi go disayd fɔ sav Gɔd ɛn de wit in pipul dɛn? Wi go nid fɔ mek sakrifays fɔ sav Gɔd, ɛn i go bi se di wan dɛn we nɔ no Jiova go de agens wi. Bɔt if wi abop pan wi Papa we de na ɛvin, wi go biliv tranga wan se i go sɔpɔt wi!

7-8. Wetin Mozis bin kɔntinyu fɔ lan?

⁷ Mozis bin kɔntinyu fɔ lan bɔt Jiova in kwaliti dɛn ɛn du wetin I want. Fɔ ɛgzampul, we Jiova bin tɛl Mozis fɔ pul di Izrɛlayt dɛn na Ijipt, Mozis nɔ bin gɛt kɔnfidɛns se i go ebul du am ɛn i bin de tɛl Jiova ɔltɛm se i nɔ fit fɔ du am. Di we aw Gɔd bin ansa Mozis bin sho se i gɛt sɔri-at, we min se i bin ɔndastand aw Mozis bin de fil ɛn i bin ɛp am. (Ɛks. 4:​10-16) Dat bin mek Mozis bin ebul fɔ gi pawaful jɔjmɛnt mɛsej to Fɛro. Mozis bin si aw Jiova yuz in pawa fɔ sev di Izrɛlayt dɛn ɛn dɔnawe wit Fɛro ɛn ɔl in sojaman dɛn na di Rɛd Si.—Ɛks. 14:​26-31; Sam 136:​15.

⁸ Afta we Jiova bin yuz Mozis fɔ fri di Izrɛlayt dɛn na Ijipt, di pipul dɛn bin de kɔmplen ɔltɛm. Bɔt pan ɔl dat, Mozis bin si aw Jiova rili peshɛnt wit di pipul dɛn we I bin dɔn fri na Ijipt as slev dɛn. (Sam 78:​40-43) Mozis bin si bak aw Jiova rili ɔmbul we I nɔ dɔnawe wit di Izrɛlayt dɛn afta we i bin beg Am fɔ lɛ I nɔ du dat.—Ɛks. 32:​9-14.

9. Frɔm wetin de na Di Ibru Pipul Dɛn 11:​27, aw Mozis in padi biznɛs wit Jiova bin tan lɛk?

⁹ Afta Jiova fri in pipul dɛn na Ijipt, Mozis in padi biznɛs wit Jiova bin so tayt dat i bin tan lɛk se i de si in Papa we de na ɛvin. (Rid Di Ibru Pipul Dɛn 11:​27.) Fɔ sho aw dɛn padi biznɛs bin rili tayt, di Baybul tɔk se: “PAPA GƆD [“Jiova,” NWT] kin de tɔk to Mozis fes to fes lɛkɛ aw pɔsin kin tɔk to in padi.”—Ɛks. 33:​11.

10. Wetin i min fɔ no Jiova gud gud wan?

¹⁰ Wetin na di lɛsin fɔ wi? Fɔ no Jiova gud gud wan nɔ jɔs min fɔ lan bɔt in kwaliti dɛn nɔmɔ bɔt i min bak fɔ du wetin i want. Tide, Jiova want lɛ “ɔlkayn pipul dɛn sev ɛn no di kɔrɛkt tin bɔt di trut.” (1 Tim. 2:​3, 4, NWT) Wan we aw wi go du wetin Jiova want na bay we wi de tich ɔda pipul dɛn bɔt am.

11. We wi de tich ɔda pipul dɛn bɔt Jiova, aw dat de ɛp wi fɔ no bɔt am gud gud wan?

¹¹ Bɔku tɛm, na we wi de tich ɔda pipul dɛn bɔt Jiova de mek wisɛf kam fɔ no am gud gud wan. Fɔ ɛgzampul, wi de si klia wan se Jiova gɛt sɔri-at fɔ pipul dɛn bay we i de ɛp wi fɔ fɛn di wan dɛn we want fɔ bi in padi. (Jɔn 6:​44; Akt 13:​48) Wi de si di pawa we Gɔd in Wɔd gɛt we wi si di wan dɛn we wi de stɔdi di Baybul wit de lɛf dɛn bad abit dɛn ɛn tray fɔ gɛt di nyu abit dɛn. (Kol. 3:​9, 10) Ɛn wi de si bak se Gɔd peshɛnt wit pipul dɛn bikɔs i de sɛn wi to dɛn plɛnti tɛm fɔ ɛp dɛn fɔ lan bɔt am so dat dɛn go sev.—Rom. 10:​13-15, NWT.

12. Frɔm wetin de na Ɛksodɔs 33:​13, wetin Mozis bin aks fɔ? Wetin mek?

¹² Mozis bin valyu in padi biznɛs wit Jiova. Pan ɔl we Jiova bin yuz Mozis fɔ du bɔku pawaful tin dɛn, Mozis bin stil aks Jiova fɔ ɛp am fɔ no am gud gud wan. (Rid Ɛksodɔs 33:​13.) Mozis bin dɔn pas 80 ia we i aks Jiova fɔ ɛp am, i bin no se i stil nid fɔ lan mɔ tin dɛn bɔt in Papa na ɛvin.

13. Wetin na wan we aw wi go sho se wi valyu wi padi biznɛs wit Gɔd?

¹³ Wetin na di lɛsin fɔ wi? Ilɛk aw lɔng wi dɔn de sav Jiova, wi stil nid fɔ valyu wi padi biznɛs wit am. Wan we aw wi go sho se wi valyu wi padi biznɛs wit Gɔd na we wi de pre to am.

14. Wetin mek prea rili impɔtant fɔ ɛp wi fɔ lan mɔ bɔt Gɔd?

¹⁴ If yu want fɔ gɛt tayt padi biznɛs wit sɔmbɔdi, yu nid fɔ de tɔk to am ɔltɛm. So fɔ gɛt tayt padi biznɛs wit Gɔd, yu nid fɔ de pre to am ɔltɛm ɛn nɔ ɛva fred fɔ tɛl am wetin yu de tink ɛn aw yu de fil. (Ɛfi. 6:​18) Wan sista we nem Krista we de na Tɔki bin tɔk se: “A kin lɛk Jiova ɛn abop pan am mɔ ɛn mɔ ɛnitɛm we a de pre to am ɛn si we i de ɛp mi. We a de si aw Jiova de ansa mi prea dɛn, dat de mek a kam nia am mɔ ɛn mɔ. A de si Jiova naw as Papa ɛn Padi.”

MAN WE BIN DE MEK JIOVA IN AT GLADI

15. Wetin Jiova bin tɔk bɔt Devid?

¹⁵ Di tɛm we dɛn bɔn Devid, in mama ɛn papa ɛn ɔl di wan dɛn we bin de arawnd am bin de wɔship Jiova. Bɔt Devid nɔ bin wɔship Jiova jɔs bikɔs in fambul dɛn bin de wɔship Am. I bin mek in yon padi biznɛs wit Gɔd ɛn Jiova bin rili lɛk am. Jiova insɛf sɛf bin tɔk bɔt Devid se i “gladi fɔ am.” (Akt 13:​22) Aw Devid bin kam fɔ gɛt tayt padi biznɛs wit Jiova?

16. Wetin Devid bin lan bɔt Jiova we i bin de luk di tin dɛn we I mek?

¹⁶ Devid bin lan bɔt Jiova frɔm di tin dɛn we Jiova mek. We Devid bin yɔŋ, i bin spɛn bɔku tɛm na do de kia fɔ in papa in ship dɛn. Sɔntɛm, na da tɛm de i bin de tink gud gud wan bɔt di tin dɛn we Jiova mek. Fɔ ɛgzampul, we Devid bin de luk ɔp di skay na nɛt, i bin de si bɔku bɔku sta dɛn. Bɔt nɔto sta dɛn nɔmɔ i bin de si, i bin de si bak di wɔndaful kwaliti dɛn we di Wan we mek di sta dɛn gɛt. Dat bin mek Devid rayt se: “Di ɛvin de tɔk bɔt Gɔd in glori; di skay de sho di wok we i dɔn du wit in an.” (Sams 19:​1, 2, NWT) We Devid tink bɔt di wɔndaful we aw Jiova mek pipul dɛn, i bin kam fɔ si se Jiova rili gɛt sɛns. (Sam 139:​14) We Devid bin tink gud gud wan bɔt di tin dɛn we Jiova mek, i bin kam fɔ no se i rili smɔl we i kɔmpia insɛf wit Jiova.—Sam 139:​6.

17. Wetin wi go lan frɔm di tin dɛn we Jiova mek if wi tek tɛm tink gud gud wan bɔt dɛn?

¹⁷ Wetin na di lɛsin fɔ wi? Wi fɔ tray fɔ no bɔt di tin dɛn we Jiova mek. Tek tɛm wach dis fayn fayn wɔl we Jiova dɔn mek; ɛn kɔle am! Ɛvride, yu fɔ de tek tɛm tink gud gud wan bɔt di tin dɛn we Jiova mek we de arawnd yu; tin dɛn lɛk plant dɛn, animal dɛn, ɛn pipul dɛn, fɔ ɛp yu fɔ lan mɔ bɔt Jiova. Dɔn, ɛnide yu go de lan mɔ tin dɛn bɔt yu Papa we lɛk yu. (Rom 1:​20) Ɛn yu go si se yu go kam fɔ lɛk am mɔ ɛn mɔ.

18. Frɔm wetin de na Sams 18 (NWT), wetin Devid bin no?

¹⁸ Devid bin no se na Jiova bin de ɛp am. Fɔ ɛgzampul, we Devid bin de protɛkt in papa in ship dɛn frɔm layɔn ɛn bia, i bin no se na Jiova bin de ɛp am fɔ kil dɛn bad bad animal dɛn de. We i bin win di jayant we nem Golaya pan fɛt, Devid bin si klia wan se na Jiova bin de gayd am. (1 Sam. 17:​37) Ɛn we i bin rɔnawe frɔm Kiŋ Sɔl we bin de jɛlɔs am, Devid bin no se na Jiova bin de sev am. (Sams 18, NWT, di ɛdin) If Devid na bin prawnd pɔsin, i bin fɔ dɔn tink se na insɛf sɛf bin ebul du ɔl dɛn tin dɛn ya. Bɔt Devid bin ɔmbul, ɛn dat bin mek i no se na Jiova bin de ɛp am na in layf.—Sam 138:​6.

19. Wetin wi kin lan frɔm Devid in ɛgzampul?

¹⁹ Wetin na di lɛsin fɔ wi? I nɔ jɔs du fɔ aks Jiova fɔ ɛp wi, bɔt wi nid fɔ tray bak fɔ no ustɛm ɛn aw i de ɛp wi. If wi ɔmbul ɛn no se nɔto ɔltin wi ebul fɔ du, wi go si klia wan fɔ se na Jiova de ɛp wi fɔ du wetin wi nɔ ebul fɔ du. Ɛn ɛnitɛm we wi si aw Jiova de ɛp wi, dat de mek wi gɛt tayt padi biznɛs wit am mɔ ɛn mɔ. Wan brɔda na Fiji we nem Ayzak we dɔn sav Jiova fɔ lɔng tɛm bin kam fɔ si se dis na tru. I tɔk se: “We a tink bɔt aw mi layf bin tan lɛk, a kin si aw Jiova bin ɛp mi frɔm di tɛm we a bigin fɔ stɔdi di Baybul te to dis tɛm. Ɛn dat dɔn mek Jiova dɔn tan lɛk pɔsin we rial to mi.”

20. Wetin wi kin lan frɔm Devid in padi biznɛs wit Jiova?

²⁰ Devid bin falamakata Jiova in kwaliti dɛn. Jiova mek wi di kayn we aw wi go ebul falamakata in kwaliti dɛn. (Jɛn. 1:​26) Di mɔ wi lan bɔt Jiova in kwaliti dɛn, na di mɔ wi go ebul fɔ falamakata am. Devid bin kam fɔ no in Papa we de na ɛvin gud gud wan, so dat bin mek i ebul fɔ falamakata Am we i de du tin wit ɔda pipul dɛn. Tink bɔt wan ɛgzampul. Devid bin sin agens Jiova we i du mami ɛn dadi biznɛs wit Batshiba, ɛn i mek dɛn kil in man. (2 Sam. 11:​1-4, 15) Bɔt Jiova bin disayd fɔ sho sɔri-at to Devid, we na man we bin dɔn sho sɔri-at to ɔda pipul dɛn. Bikɔs Devid bin gɛt tayt padi biznɛs wit Jiova, dat bin mek di Izrɛlayt dɛn rili lɛk am ɛn Jiova bin yuz am as ɛgzampul fɔ ɔda kiŋ dɛn na Izrɛl.—1 Kiŋ 15:​11; 2 Kiŋ 14:​1-3.

21. Frɔm wetin de na Ɛfishians 4:​24; 5:​1 (NWT), us bɛnifit wi go gɛt we wi “falamakata Gɔd”?

²¹ Wetin na di lɛsin fɔ wi? Wi nid fɔ “falamakata Gɔd.” We wi du dat, wi de bɛnifit wisɛf ɛn i de ɛp wi fɔ lan mɔ bɔt am. We wi falamakata Gɔd in kwaliti dɛn, wi de sho bak se wi na in pikin dɛn.—Rid Ɛfishians 4:​24; 5:​1, NWT.

LAN BƆT JIOVA GUD GUD WAN

22-23. Wetin go apin if wi du wetin wi de lan bɔt Jiova?

²² Frɔm wetin wi dɔn lan, Jiova de yuz in Wɔd di Baybul ɛn di tin dɛn we i dɔn mek, fɔ mek wi lan mɔ bɔt am. Di Baybul ful-ɔp wit ɛgzampul dɛn bɔt Gɔd in fetful savant dɛn we wi kin falamakata, lɛk Mozis ɛn Devid. Jiova dɔn du in yon pat. Wisɛf nid fɔ du wi pat ɛn lan ɔl wetin wi ebul fɔ lan bɔt am.

²³ Wi nɔ go ɛva stɔp fɔ lan bɔt Jiova. (Ɛkli. 3:​11) Di tin we impɔtant pas ɔl na dat, nɔto wetin wi no bɔt am, bɔt na wetin wi du wit wetin wi no bɔt am. If wi du di tin dɛn we wi de lan ɛn tray fɔ falamakata wi Papa we lɛk wi, i go kɔntinyu fɔ kam nia wi. (Jems 4:​8) Jiova de yuz in Wɔd, fɔ mek wi biliv tranga wan se i nɔ go ɛva lɛf di wan dɛn we de tray fɔ no am gud gud wan.